Jeremiah Chapter 29
ירמיהו פרק כט
Source: https://ajew.org/reader/tanach-yirmiyahu/1/29

Segment 1
HE:
ואלה דברי הספר אשר שלח ירמיה הנביא מירושלם אל יתר זקני הגולה ואל הכהנים ואל הנביאים ואל כל העם אשר הגלה נבוכדנאצר מירושלם בבלה:

Segment 2
HE:
אחרי צאת יכניה המלך והגבירה והסריסים שרי יהודה וירושלם והחרש והמסגר מירושלם:

Segment 3
HE:
ביד אלעשה בן שפן וגמריה בן חלקיה אשר שלח צדקיה מלך יהודה אל נבוכדנאצר מלך בבל בבלה לאמר:

Segment 4
HE:
כה אמר יהוה צבאות אלהי ישראל לכל הגולה אשר הגליתי מירושלם בבלה:

Segment 5
HE:
בנו בתים ושבו ונטעו גנות ואכלו את פרין:

Segment 6
HE:
קחו נשים והולידו בנים ובנות וקחו לבניכם נשים ואת בנותיכם תנו לאנשים ותלדנה בנים ובנות ורבו שם ואל תמעטו:

Segment 7
HE:
ודרשו את שלום העיר אשר הגליתי אתכם שמה והתפללו בעדה אל יהוה כי בשלומה יהיה לכם שלום:

Segment 8
HE:
כי כה אמר יהוה צבאות אלהי ישראל אל ישיאו לכם נביאיכם אשר בקרבכם וקסמיכם ואל תשמעו אל חלמתיכם אשר אתם מחלמים:

Segment 9
HE:
כי בשקר הם נבאים לכם בשמי לא שלחתים נאם יהוה: (ס)

Segment 10
HE:
כי כה אמר יהוה כי לפי מלאת לבבל שבעים שנה אפקד אתכם והקמתי עליכם את דברי הטוב להשיב אתכם אל המקום הזה:

Segment 11
HE:
כי אנכי ידעתי את המחשבת אשר אנכי חשב עליכם נאם יהוה מחשבות שלום ולא לרעה לתת לכם אחרית ותקוה:

Segment 12
HE:
וקראתם אתי והלכתם והתפללתם אלי ושמעתי אליכם:

Segment 13
HE:
ובקשתם אתי ומצאתם כי תדרשני בכל לבבכם:

Segment 14
HE:
ונמצאתי לכם נאם יהוה ושבתי את (שביתכם) שבותכם וקבצתי אתכם מכל הגוים ומכל המקומות אשר הדחתי אתכם שם נאם יהוה והשבתי אתכם אל המקום אשר הגליתי אתכם משם:

Segment 15
HE:
כי אמרתם הקים לנו יהוה נבאים בבלה: (ס)

Segment 16
HE:
כי כה אמר יהוה אל המלך היושב אל כסא דוד ואל כל העם היושב בעיר הזאת אחיכם אשר לא יצאו אתכם בגולה:

Segment 17
HE:
כה אמר יהוה צבאות הנני משלח בם את החרב את הרעב ואת הדבר ונתתי אותם כתאנים השערים אשר לא תאכלנה מרע:

Segment 18
HE:
ורדפתי אחריהם בחרב ברעב ובדבר ונתתים (לזועה) לזעוה לכל ממלכות הארץ לאלה ולשמה ולשרקה ולחרפה בכל הגוים אשר הדחתים שם:

Segment 19
HE:
תחת אשר לא שמעו אל דברי נאם יהוה אשר שלחתי אליהם את עבדי הנבאים השכם ושלח ולא שמעתם נאם יהוה:

Segment 20
HE:
ואתם שמעו דבר יהוה כל הגולה אשר שלחתי מירושלם בבלה: (ס)

Segment 21
HE:
כה אמר יהוה צבאות אלהי ישראל אל אחאב בן קוליה ואל צדקיהו בן מעשיה הנבאים לכם בשמי שקר הנני נתן אתם ביד נבוכדראצר מלך בבל והכם לעיניכם:

Segment 22
HE:
ולקח מהם קללה לכל גלות יהודה אשר בבבל לאמר ישמך יהוה כצדקיהו וכאחב אשר קלם מלך בבל באש:

Segment 23
HE:
יען אשר עשו נבלה בישראל וינאפו את נשי רעיהם וידברו דבר בשמי שקר אשר לוא צויתם ואנכי (הוידע) היודע ועד נאם יהוה: (ס)

Segment 24
HE:
ואל שמעיהו הנחלמי תאמר לאמר:

Segment 25
HE:
כה אמר יהוה צבאות אלהי ישראל לאמר יען אשר אתה שלחת בשמכה ספרים אל כל העם אשר בירושלם ואל צפניה בן מעשיה הכהן ואל כל הכהנים לאמר:

Segment 26
HE:
יהוה נתנך כהן תחת יהוידע הכהן להיות פקדים בית יהוה לכל איש משגע ומתנבא ונתתה אתו אל המהפכת ואל הצינק:

Segment 27
HE:
ועתה למה לא גערת בירמיהו הענתתי המתנבא לכם:

Segment 28
HE:
כי על כן שלח אלינו בבל לאמר ארכה היא בנו בתים ושבו ונטעו גנות ואכלו את פריהן:

Segment 29
HE:
ויקרא צפניה הכהן את הספר הזה באזני ירמיהו הנביא: (פ)

Segment 30
HE:
ויהי דבר יהוה אל ירמיהו לאמר:

Segment 31
HE:
שלח על כל הגולה לאמר כה אמר יהוה אל שמעיה הנחלמי יען אשר נבא לכם שמעיה ואני לא שלחתיו ויבטח אתכם על שקר:

Segment 32
HE:
לכן כה אמר יהוה הנני פקד על שמעיה הנחלמי ועל זרעו לא יהיה לו איש יושב בתוך העם הזה ולא יראה בטוב אשר אני עשה לעמי נאם יהוה כי סרה דבר על יהוה: (ס)