Jeremiah Chapter 3
ירמיהו פרק ג
Source: https://ajew.org/reader/tanach-yirmiyahu/1/3

Segment 1
HE:
לאמר הן ישלח איש את אשתו והלכה מאתו והיתה לאיש אחר הישוב אליה עוד הלוא חנוף תחנף הארץ ההיא ואת זנית רעים רבים ושוב אלי נאם יהוה:

Segment 2
HE:
שאי עיניך על שפים וראי איפה לא (שגלת) שכבת על דרכים ישבת להם כערבי במדבר ותחניפי ארץ בזנותיך וברעתך:

Segment 3
HE:
וימנעו רבבים ומלקוש לוא היה ומצח אשה זונה היה לך מאנת הכלם:

Segment 4
HE:
הלוא מעתה (קראתי) קראת לי אבי אלוף נערי אתה:

Segment 5
HE:
הינטר לעולם אם ישמר לנצח הנה (דברתי) דברת ותעשי הרעות ותוכל: (פ)

Segment 6
HE:
ויאמר יהוה אלי בימי יאשיהו המלך הראית אשר עשתה משבה ישראל הלכה היא על כל הר גבה ואל תחת כל עץ רענן ותזני שם:

Segment 7
HE:
ואמר אחרי עשותה את כל אלה אלי תשוב ולא שבה (ותראה) ותרא בגודה אחותה יהודה:

Segment 8
HE:
וארא כי על כל אדות אשר נאפה משבה ישראל שלחתיה ואתן את ספר כריתתיה אליה ולא יראה בגדה יהודה אחותה ותלך ותזן גם היא:

Segment 9
HE:
והיה מקל זנותה ותחנף את הארץ ותנאף את האבן ואת העץ:

Segment 10
HE:
וגם בכל זאת לא שבה אלי בגודה אחותה יהודה בכל לבה כי אם בשקר נאם יהוה: (ס)

Segment 11
HE:
ויאמר יהוה אלי צדקה נפשה משבה ישראל מבגדה יהודה:

Segment 12
HE:
הלך וקראת את הדברים האלה צפונה ואמרת שובה משבה ישראל נאם יהוה לוא אפיל פני בכם כי חסיד אני נאם יהוה לא אטור לעולם:

Segment 13
HE:
אך דעי עונך כי ביהוה אלהיך פשעת ותפזרי את דרכיך לזרים תחת כל עץ רענן ובקולי לא שמעתם נאם יהוה:

Segment 14
HE:
שובו בנים שובבים נאם יהוה כי אנכי בעלתי בכם ולקחתי אתכם אחד מעיר ושנים ממשפחה והבאתי אתכם ציון:

Segment 15
HE:
ונתתי לכם רעים כלבי ורעו אתכם דעה והשכיל:

Segment 16
HE:
והיה כי תרבו ופריתם בארץ בימים ההמה נאם יהוה לא יאמרו עוד ארון ברית יהוה ולא יעלה על לב ולא יזכרו בו ולא יפקדו ולא יעשה עוד:

Segment 17
HE:
בעת ההיא יקראו לירושלם כסא יהוה ונקוו אליה כל הגוים לשם יהוה לירושלם ולא ילכו עוד אחרי שררות לבם הרע: (ס)

Segment 18
HE:
בימים ההמה ילכו בית יהודה על בית ישראל ויבאו יחדו מארץ צפון על הארץ אשר הנחלתי את אבותיכם:

Segment 19
HE:
ואנכי אמרתי איך אשיתך בבנים ואתן לך ארץ חמדה נחלת צבי צבאות גוים ואמר אבי (תקראו) תקראי לי ומאחרי לא (תשובו) תשובי:

Segment 20
HE:
אכן בגדה אשה מרעה כן בגדתם בי בית ישראל נאם יהוה:

Segment 21
HE:
קול על שפיים נשמע בכי תחנוני בני ישראל כי העוו את דרכם שכחו את יהוה אלהיהם:

Segment 22
HE:
שובו בנים שובבים ארפה משובתיכם הננו אתנו לך כי אתה יהוה אלהינו:

Segment 23
HE:
אכן לשקר מגבעות המון הרים אכן ביהוה אלהינו תשועת ישראל:

Segment 24
HE:
והבשת אכלה את יגיע אבותינו מנעורינו את צאנם ואת בקרם את בניהם ואת בנותיהם:

Segment 25
HE:
נשכבה בבשתנו ותכסנו כלמתנו כי ליהוה אלהינו חטאנו אנחנו ואבותינו מנעורינו ועד היום הזה ולא שמענו בקול יהוה אלהינו: (ס)