Jeremiah Chapter 31
ירמיהו פרק לא
Source: https://ajew.org/reader/tanach-yirmiyahu/1/31

Segment 1
HE:
כה אמר יהוה מצא חן במדבר עם שרידי חרב הלוך להרגיעו ישראל:

Segment 2
HE:
מרחוק יהוה נראה לי ואהבת עולם אהבתיך על כן משכתיך חסד:

Segment 3
HE:
עוד אבנך ונבנית בתולת ישראל עוד תעדי תפיך ויצאת במחול משחקים:

Segment 4
HE:
עוד תטעי כרמים בהרי שמרון נטעו נטעים וחללו:

Segment 5
HE:
כי יש יום קראו נצרים בהר אפרים קומו ונעלה ציון אל יהוה אלהינו: (פ)

Segment 6
HE:
כי כה אמר יהוה רנו ליעקב שמחה וצהלו בראש הגוים השמיעו הללו ואמרו הושע יהוה את עמך את שארית ישראל:

Segment 7
HE:
הנני מביא אותם מארץ צפון וקבצתים מירכתי ארץ בם עור ופסח הרה וילדת יחדו קהל גדול ישובו הנה:

Segment 8
HE:
בבכי יבאו ובתחנונים אובילם אוליכם אל נחלי מים בדרך ישר לא יכשלו בה כי הייתי לישראל לאב ואפרים בכרי הוא: (ס)

Segment 9
HE:
שמעו דבר יהוה גוים והגידו באיים ממרחק ואמרו מזרה ישראל יקבצנו ושמרו כרעה עדרו:

Segment 10
HE:
כי פדה יהוה את יעקב וגאלו מיד חזק ממנו:

Segment 11
HE:
ובאו ורננו במרום ציון ונהרו אל טוב יהוה על דגן ועל תירש ועל יצהר ועל בני צאן ובקר והיתה נפשם כגן רוה ולא יוסיפו לדאבה עוד:

Segment 12
HE:
אז תשמח בתולה במחול ובחרים וזקנים יחדו והפכתי אבלם לששון ונחמתים ושמחתים מיגונם:

Segment 13
HE:
ורויתי נפש הכהנים דשן ועמי את טובי ישבעו נאם יהוה: (ס)

Segment 14
HE:
כה אמר יהוה קול ברמה נשמע נהי בכי תמרורים רחל מבכה על בניה מאנה להנחם על בניה כי איננו: (ס)

Segment 15
HE:
כה אמר יהוה מנעי קולך מבכי ועיניך מדמעה כי יש שכר לפעלתך נאם יהוה ושבו מארץ אויב:

Segment 16
HE:
ויש תקוה לאחריתך נאם יהוה ושבו בנים לגבולם: (ס)

Segment 17
HE:
שמוע שמעתי אפרים מתנודד יסרתני ואוסר כעגל לא למד השיבני ואשובה כי אתה יהוה אלהי:

Segment 18
HE:
כי אחרי שובי נחמתי ואחרי הודעי ספקתי על ירך בשתי וגם נכלמתי כי נשאתי חרפת נעורי:

Segment 19
HE:
הבן יקיר לי אפרים אם ילד שעשעים כי מדי דברי בו זכר אזכרנו עוד על כן המו מעי לו רחם ארחמנו נאם יהוה: (ס)

Segment 20
HE:
הציבי לך צינים שמי לך תמרורים שתי לבך למסלה דרך (הלכתי) הלכת שובי בתולת ישראל שבי אל עריך אלה:

Segment 21
HE:
עד מתי תתחמקין הבת השובבה כי ברא יהוה חדשה בארץ נקבה תסובב גבר: (ס)

Segment 22
HE:
כה אמר יהוה צבאות אלהי ישראל עוד יאמרו את הדבר הזה בארץ יהודה ובעריו בשובי את שבותם יברכך יהוה נוה צדק הר הקדש:

Segment 23
HE:
וישבו בה יהודה וכל עריו יחדו אכרים ונסעו בעדר:

Segment 24
HE:
כי הרויתי נפש עיפה וכל נפש דאבה מלאתי:

Segment 25
HE:
על זאת הקיצתי ואראה ושנתי ערבה לי: (ס)

Segment 26
HE:
הנה ימים באים נאם יהוה וזרעתי את בית ישראל ואת בית יהודה זרע אדם וזרע בהמה:

Segment 27
HE:
והיה כאשר שקדתי עליהם לנתוש ולנתוץ ולהרס ולהאביד ולהרע כן אשקד עליהם לבנות ולנטוע נאם יהוה:

Segment 28
HE:
בימים ההם לא יאמרו עוד אבות אכלו בסר ושני בנים תקהינה:

Segment 29
HE:
כי אם איש בעונו ימות כל האדם האכל הבסר תקהינה שניו: (ס)

Segment 30
HE:
הנה ימים באים נאם יהוה וכרתי את בית ישראל ואת בית יהודה ברית חדשה:

Segment 31
HE:
לא כברית אשר כרתי את אבותם ביום החזיקי בידם להוציאם מארץ מצרים אשר המה הפרו את בריתי ואנכי בעלתי בם נאם יהוה:

Segment 32
HE:
כי זאת הברית אשר אכרת את בית ישראל אחרי הימים ההם נאם יהוה נתתי את תורתי בקרבם ועל לבם אכתבנה והייתי להם לאלהים והמה יהיו לי לעם:

Segment 33
HE:
ולא ילמדו עוד איש את רעהו ואיש את אחיו לאמר דעו את יהוה כי כולם ידעו אותי למקטנם ועד גדולם נאם יהוה כי אסלח לעונם ולחטאתם לא אזכר עוד: (ס)

Segment 34
HE:
כה אמר יהוה נתן שמש לאור יומם חקת ירח וכוכבים לאור לילה רגע הים ויהמו גליו יהוה צבאות שמו:

Segment 35
HE:
אם ימשו החקים האלה מלפני נאם יהוה גם זרע ישראל ישבתו מהיות גוי לפני כל הימים: (ס)

Segment 36
HE:
כה אמר יהוה אם ימדו שמים מלמעלה ויחקרו מוסדי ארץ למטה גם אני אמאס בכל זרע ישראל על כל אשר עשו נאם יהוה: (ס)

Segment 37
HE:
הנה ימים באים נאם יהוה ונבנתה העיר ליהוה ממגדל חננאל שער הפנה:

Segment 38
HE:
ויצא עוד (קוה) קו המדה נגדו על גבעת גרב ונסב געתה:

Segment 39
HE:
וכל העמק הפגרים והדשן וכל (השרמות) השדמות עד נחל קדרון עד פנת שער הסוסים מזרחה קדש ליהוה לא ינתש ולא יהרס עוד לעולם: (פ)