Jeremiah Chapter 52
ירמיהו פרק נב
Source: https://ajew.org/reader/tanach-yirmiyahu/1/52

Segment 1
HE:
בן עשרים ואחת שנה צדקיהו במלכו ואחת עשרה שנה מלך בירושלם ושם אמו (חמיטל) חמוטל בת ירמיהו מלבנה:

Segment 2
HE:
ויעש הרע בעיני יהוה ככל אשר עשה יהויקים:

Segment 3
HE:
כי על אף יהוה היתה בירושלם ויהודה עד השליכו אותם מעל פניו וימרד צדקיהו במלך בבל:

Segment 4
HE:
ויהי בשנה התשעית למלכו בחדש העשירי בעשור לחדש בא נבוכדראצר מלך בבל הוא וכל חילו על ירושלם ויחנו עליה ויבנו עליה דיק סביב:

Segment 5
HE:
ותבא העיר במצור עד עשתי עשרה שנה למלך צדקיהו:

Segment 6
HE:
בחדש הרביעי בתשעה לחדש ויחזק הרעב בעיר ולא היה לחם לעם הארץ:

Segment 7
HE:
ותבקע העיר וכל אנשי המלחמה יברחו ויצאו מהעיר לילה דרך שער בין החמתים אשר על גן המלך וכשדים על העיר סביב וילכו דרך הערבה:

Segment 8
HE:
וירדפו חיל כשדים אחרי המלך וישיגו את צדקיהו בערבת ירחו וכל חילו נפצו מעליו:

Segment 9
HE:
ויתפשו את המלך ויעלו אתו אל מלך בבל רבלתה בארץ חמת וידבר אתו משפטים:

Segment 10
HE:
וישחט מלך בבל את בני צדקיהו לעיניו וגם את כל שרי יהודה שחט ברבלתה:

Segment 11
HE:
ואת עיני צדקיהו עור ויאסרהו בנחשתים ויבאהו מלך בבל בבלה ויתנהו (בבית) בית הפקדת עד יום מותו:

Segment 12
HE:
ובחדש החמישי בעשור לחדש היא שנת תשע עשרה שנה למלך נבוכדראצר מלך בבל בא נבוזראדן רב טבחים עמד לפני מלך בבל בירושלם:

Segment 13
HE:
וישרף את בית יהוה ואת בית המלך ואת כל בתי ירושלם ואת כל בית הגדול שרף באש:

Segment 14
HE:
ואת כל חמות ירושלם סביב נתצו כל חיל כשדים אשר את רב טבחים:

Segment 15
HE:
ומדלות העם ואת יתר העם הנשארים בעיר ואת הנפלים אשר נפלו אל מלך בבל ואת יתר האמון הגלה נבוזראדן רב טבחים:

Segment 16
HE:
ומדלות הארץ השאיר נבוזראדן רב טבחים לכרמים וליגבים:

Segment 17
HE:
ואת עמודי הנחשת אשר לבית יהוה ואת המכנות ואת ים הנחשת אשר בבית יהוה שברו כשדים וישאו את כל נחשתם בבלה:

Segment 18
HE:
ואת הסרות ואת היעים ואת המזמרות ואת המזרקת ואת הכפות ואת כל כלי הנחשת אשר ישרתו בהם לקחו:

Segment 19
HE:
ואת הספים ואת המחתות ואת המזרקות ואת הסירות ואת המנרות ואת הכפות ואת המנקיות אשר זהב זהב ואשר כסף כסף לקח רב טבחים:

Segment 20
HE:
העמודים שנים הים אחד והבקר שנים עשר נחשת אשר תחת המכנות אשר עשה המלך שלמה לבית יהוה לא היה משקל לנחשתם כל הכלים האלה:

Segment 21
HE:
והעמודים שמנה עשרה אמה (קומה) קומת העמד האחד וחוט שתים עשרה אמה יסבנו ועביו ארבע אצבעות נבוב:

Segment 22
HE:
וכתרת עליו נחשת וקומת הכתרת האחת חמש אמות ושבכה ורמונים על הכותרת סביב הכל נחשת וכאלה לעמוד השני ורמונים:

Segment 23
HE:
ויהיו הרמנים תשעים וששה רוחה כל הרמונים מאה על השבכה סביב: (ס)

Segment 24
HE:
ויקח רב טבחים את שריה כהן הראש ואת צפניה כהן המשנה ואת שלשת שמרי הסף:

Segment 25
HE:
ומן העיר לקח סריס אחד אשר היה פקיד על אנשי המלחמה ושבעה אנשים מראי פני המלך אשר נמצאו בעיר ואת ספר שר הצבא המצבא את עם הארץ וששים איש מעם הארץ הנמצאים בתוך העיר:

Segment 26
HE:
ויקח אותם נבוזראדן רב טבחים וילך אותם אל מלך בבל רבלתה:

Segment 27
HE:
ויכה אותם מלך בבל וימתם ברבלה בארץ חמת ויגל יהודה מעל אדמתו: (ס)

Segment 28
HE:
זה העם אשר הגלה נבוכדראצר בשנת שבע יהודים שלשת אלפים ועשרים ושלשה:

Segment 29
HE:
בשנת שמונה עשרה לנבוכדראצר מירושלם נפש שמנה מאות שלשים ושנים:

Segment 30
HE:
בשנת שלש ועשרים לנבוכדראצר הגלה נבוזראדן רב טבחים יהודים נפש שבע מאות ארבעים וחמשה כל נפש ארבעת אלפים ושש מאות: (ס)

Segment 31
HE:
ויהי בשלשים ושבע שנה לגלות יהויכן מלך יהודה בשנים עשר חדש בעשרים וחמשה לחדש נשא אויל מרדך מלך בבל בשנת מלכתו את ראש יהויכין מלך יהודה ויצא אותו מבית (הכליא) הכלוא:

Segment 32
HE:
וידבר אתו טבות ויתן את כסאו ממעל לכסא (מלכים) המלכים אשר אתו בבבל:

Segment 33
HE:
ושנה את בגדי כלאו ואכל לחם לפניו תמיד כל ימי חיו:

Segment 34
HE:
וארחתו ארחת תמיד נתנה לו מאת מלך בבל דבר יום ביומו עד יום מותו כל ימי חייו: (פפפ)