Zechariah Chapter 11
זכריה פרק יא
Source: https://ajew.org/reader/tanach-zecharya/1/11

Segment 1
HE:
פתח לבנון דלתיך ותאכל אש בארזיך:

Segment 2
HE:
הילל ברוש כי נפל ארז אשר אדרים שדדו הילילו אלוני בשן כי ירד יער (הבצור) הבציר:

Segment 3
HE:
קול יללת הרעים כי שדדה אדרתם קול שאגת כפירים כי שדד גאון הירדן: (פ)

Segment 4
HE:
כה אמר יהוה אלהי רעה את צאן ההרגה:

Segment 5
HE:
אשר קניהן יהרגן ולא יאשמו ומכריהן יאמר ברוך יהוה ואעשר ורעיהם לא יחמול עליהן:

Segment 6
HE:
כי לא אחמול עוד על ישבי הארץ נאם יהוה והנה אנכי ממציא את האדם איש ביד רעהו וביד מלכו וכתתו את הארץ ולא אציל מידם:

Segment 7
HE:
וארעה את צאן ההרגה לכן עניי הצאן ואקח לי שני מקלות לאחד קראתי נעם ולאחד קראתי חבלים וארעה את הצאן:

Segment 8
HE:
ואכחד את שלשת הרעים בירח אחד ותקצר נפשי בהם וגם נפשם בחלה בי:

Segment 9
HE:
ואמר לא ארעה אתכם המתה תמות והנכחדת תכחד והנשארות תאכלנה אשה את בשר רעותה:

Segment 10
HE:
ואקח את מקלי את נעם ואגדע אתו להפיר את בריתי אשר כרתי את כל העמים:

Segment 11
HE:
ותפר ביום ההוא וידעו כן עניי הצאן השמרים אתי כי דבר יהוה הוא: (ס)

Segment 12
HE:
ואמר אליהם אם טוב בעיניכם הבו שכרי ואם לא חדלו וישקלו את שכרי שלשים כסף:

Segment 13
HE:
ויאמר יהוה אלי השליכהו אל היוצר אדר היקר אשר יקרתי מעליהם ואקחה שלשים הכסף ואשליך אתו בית יהוה אל היוצר:

Segment 14
HE:
ואגדע את מקלי השני את החבלים להפר את האחוה בין יהודה ובין ישראל: (פ)

Segment 15
HE:
ויאמר יהוה אלי עוד קח לך כלי רעה אולי:

Segment 16
HE:
כי הנה אנכי מקים רעה בארץ הנכחדות לא יפקד הנער לא יבקש והנשברת לא ירפא הנצבה לא יכלכל ובשר הבריאה יאכל ופרסיהן יפרק:

Segment 17
HE:
הוי רעי האליל עזבי הצאן חרב על זרועו ועל עין ימינו זרעו יבוש תיבש ועין ימינו כהה תכהה: (פ)