Zechariah Chapter 12
זכריה פרק יב
Source: https://ajew.org/reader/tanach-zecharya/1/12

Segment 1
HE:
משא דבר יהוה על ישראל נאם יהוה נטה שמים ויסד ארץ ויצר רוח אדם בקרבו:

Segment 2
HE:
הנה אנכי שם את ירושלם סף רעל לכל העמים סביב וגם על יהודה יהיה במצור על ירושלם:

Segment 3
HE:
והיה ביום ההוא אשים את ירושלם אבן מעמסה לכל העמים כל עמסיה שרוט ישרטו ונאספו עליה כל גויי הארץ:

Segment 4
HE:
ביום ההוא נאם יהוה אכה כל סוס בתמהון ורכבו בשגעון ועל בית יהודה אפקח את עיני וכל סוס העמים אכה בעורון:

Segment 5
HE:
ואמרו אלפי יהודה בלבם אמצה לי ישבי ירושלם ביהוה צבאות אלהיהם:

Segment 6
HE:
ביום ההוא אשים את אלפי יהודה ככיור אש בעצים וכלפיד אש בעמיר ואכלו על ימין ועל שמאול את כל העמים סביב וישבה ירושלם עוד תחתיה בירושלם:

Segment 7
HE:
והושיע יהוה את אהלי יהודה בראשנה למען לא תגדל תפארת בית דויד ותפארת ישב ירושלם על יהודה:

Segment 8
HE:
ביום ההוא יגן יהוה בעד יושב ירושלם והיה הנכשל בהם ביום ההוא כדויד ובית דויד כאלהים כמלאך יהוה לפניהם:

Segment 9
HE:
והיה ביום ההוא אבקש להשמיד את כל הגוים הבאים על ירושלם:

Segment 10
HE:
ושפכתי על בית דויד ועל יושב ירושלם רוח חן ותחנונים והביטו אלי את אשר דקרו וספדו עליו כמספד על היחיד והמר עליו כהמר על הבכור:

Segment 11
HE:
ביום ההוא יגדל המספד בירושלם כמספד הדד רמון בבקעת מגדון:

Segment 12
HE:
וספדה הארץ משפחות משפחות לבד משפחת בית דויד לבד ונשיהם לבד משפחת בית נתן לבד ונשיהם לבד:

Segment 13
HE:
משפחת בית לוי לבד ונשיהם לבד משפחת השמעי לבד ונשיהם לבד:

Segment 14
HE:
כל המשפחות הנשארות משפחת משפחת לבד ונשיהם לבד: