Zechariah Chapter 8
זכריה פרק ח
Source: https://ajew.org/reader/tanach-zecharya/1/8

Segment 1
HE:
ויהי דבר יהוה צבאות לאמר:

Segment 2
HE:
כה אמר יהוה צבאות קנאתי לציון קנאה גדולה וחמה גדולה קנאתי לה:

Segment 3
HE:
כה אמר יהוה שבתי אל ציון ושכנתי בתוך ירושלם ונקראה ירושלם עיר האמת והר יהוה צבאות הר הקדש: (ס)

Segment 4
HE:
כה אמר יהוה צבאות עד ישבו זקנים וזקנות ברחבות ירושלם ואיש משענתו בידו מרב ימים:

Segment 5
HE:
ורחבות העיר ימלאו ילדים וילדות משחקים ברחבתיה: (ס)

Segment 6
HE:
כה אמר יהוה צבאות כי יפלא בעיני שארית העם הזה בימים ההם גם בעיני יפלא נאם יהוה צבאות: (פ)

Segment 7
HE:
כה אמר יהוה צבאות הנני מושיע את עמי מארץ מזרח ומארץ מבוא השמש:

Segment 8
HE:
והבאתי אתם ושכנו בתוך ירושלם והיו לי לעם ואני אהיה להם לאלהים באמת ובצדקה: (ס)

Segment 9
HE:
כה אמר יהוה צבאות תחזקנה ידיכם השמעים בימים האלה את הדברים האלה מפי הנביאים אשר ביום יסד בית יהוה צבאות ההיכל להבנות:

Segment 10
HE:
כי לפני הימים ההם שכר האדם לא נהיה ושכר הבהמה איננה וליוצא ולבא אין שלום מן הצר ואשלח את כל האדם איש ברעהו:

Segment 11
HE:
ועתה לא כימים הראשנים אני לשארית העם הזה נאם יהוה צבאות:

Segment 12
HE:
כי זרע השלום הגפן תתן פריה והארץ תתן את יבולה והשמים יתנו טלם והנחלתי את שארית העם הזה את כל אלה:

Segment 13
HE:
והיה כאשר הייתם קללה בגוים בית יהודה ובית ישראל כן אושיע אתכם והייתם ברכה אל תיראו תחזקנה ידיכם: (ס)

Segment 14
HE:
כי כה אמר יהוה צבאות כאשר זממתי להרע לכם בהקציף אבתיכם אתי אמר יהוה צבאות ולא נחמתי:

Segment 15
HE:
כן שבתי זממתי בימים האלה להיטיב את ירושלם ואת בית יהודה אל תיראו:

Segment 16
HE:
אלה הדברים אשר תעשו דברו אמת איש את רעהו אמת ומשפט שלום שפטו בשעריכם:

Segment 17
HE:
ואיש את רעת רעהו אל תחשבו בלבבכם ושבעת שקר אל תאהבו כי את כל אלה אשר שנאתי נאם יהוה: (ס)

Segment 18
HE:
ויהי דבר יהוה צבאות אלי לאמר:

Segment 19
HE:
כה אמר יהוה צבאות צום הרביעי וצום החמישי וצום השביעי וצום העשירי יהיה לבית יהודה לששון ולשמחה ולמעדים טובים והאמת והשלום אהבו: (פ)

Segment 20
HE:
כה אמר יהוה צבאות עד אשר יבאו עמים וישבי ערים רבות:

Segment 21
HE:
והלכו ישבי אחת אל אחת לאמר נלכה הלוך לחלות את פני יהוה ולבקש את יהוה צבאות אלכה גם אני:

Segment 22
HE:
ובאו עמים רבים וגוים עצומים לבקש את יהוה צבאות בירושלם ולחלות את פני יהוה: (ס)

Segment 23
HE:
כה אמר יהוה צבאות בימים ההמה אשר יחזיקו עשרה אנשים מכל לשנות הגוים והחזיקו בכנף איש יהודי לאמר נלכה עמכם כי שמענו אלהים עמכם: (ס)