Genesis Chapter 19
בראשית פרק יט
Source: https://ajew.org/reader/tanach-bereishit/1/19

Segment 1
HE:
שלישי  ויבאו שני המלאכים סדמה בערב ולוט ישב בשער סדם וירא לוט ויקם לקראתם וישתחו אפים ארצה:

Segment 2
HE:
ויאמר הנה נא אדני סורו נא אל בית עבדכם ולינו ורחצו רגליכם והשכמתם והלכתם לדרככם ויאמרו לא כי ברחוב נלין:

Segment 3
HE:
ויפצר בם מאד ויסרו אליו ויבאו אל ביתו ויעש להם משתה ומצות אפה ויאכלו:

Segment 4
HE:
טרם ישכבו ואנשי העיר אנשי סדם נסבו על הבית מנער ועד זקן כל העם מקצה:

Segment 5
HE:
ויקראו אל לוט ויאמרו לו איה האנשים אשר באו אליך הלילה הוציאם אלינו ונדעה אתם:

Segment 6
HE:
ויצא אלהם לוט הפתחה והדלת סגר אחריו:

Segment 7
HE:
ויאמר אל נא אחי תרעו:

Segment 8
HE:
הנה נא לי שתי בנות אשר לא ידעו איש אוציאה נא אתהן אליכם ועשו להן כטוב בעיניכם רק לאנשים האל אל תעשו דבר כי על כן באו בצל קרתי:

Segment 9
HE:
ויאמרו גש הלאה ויאמרו האחד בא לגור וישפט שפוט עתה נרע לך מהם ויפצרו באיש בלוט מאד ויגשו לשבר הדלת:

Segment 10
HE:
וישלחו האנשים את ידם ויביאו את לוט אליהם הביתה ואת הדלת סגרו:

Segment 11
HE:
ואת האנשים אשר פתח הבית הכו בסנורים מקטן ועד גדול וילאו למצא הפתח:

Segment 12
HE:
ויאמרו האנשים אל לוט עד מי לך פה חתן ובניך ובנתיך וכל אשר לך בעיר הוצא מן המקום:

Segment 13
HE:
כי משחתים אנחנו את המקום הזה כי גדלה צעקתם את פני יהוה וישלחנו יהוה לשחתה:

Segment 14
HE:
ויצא לוט וידבר אל חתניו לקחי בנתיו ויאמר קומו צאו מן המקום הזה כי משחית יהוה את העיר ויהי כמצחק בעיני חתניו:

Segment 15
HE:
וכמו השחר עלה ויאיצו המלאכים בלוט לאמר קום קח את אשתך ואת שתי בנתיך הנמצאת פן תספה בעון העיר:

Segment 16
HE:
ויתמהמה ויחזיקו האנשים בידו וביד אשתו וביד שתי בנתיו בחמלת יהוה עליו ויצאהו וינחהו מחוץ לעיר:

Segment 17
HE:
ויהי כהוציאם אתם החוצה ויאמר המלט על נפשך אל תביט אחריך ואל תעמד בכל הככר ההרה המלט פן תספה:

Segment 18
HE:
ויאמר לוט אלהם אל נא אדני:

Segment 19
HE:
הנה נא מצא עבדך חן בעיניך ותגדל חסדך אשר עשית עמדי להחיות את נפשי ואנכי לא אוכל להמלט ההרה פן תדבקני הרעה ומתי:

Segment 20
HE:
הנה נא העיר הזאת קרבה לנוס שמה והוא מצער אמלטה נא שמה הלא מצער הוא ותחי נפשי:

Segment 21
HE:
רביעי  ויאמר אליו הנה נשאתי פניך גם לדבר הזה לבלתי הפכי את העיר אשר דברת:

Segment 22
HE:
מהר המלט שמה כי לא אוכל לעשות דבר עד באך שמה על כן קרא שם העיר צוער:

Segment 23
HE:
השמש יצא על הארץ ולוט בא צערה:

Segment 24
HE:
ויהוה המטיר על סדם ועל עמרה גפרית ואש מאת יהוה מן השמים:

Segment 25
HE:
ויהפך את הערים האל ואת כל הככר ואת כל ישבי הערים וצמח האדמה:

Segment 26
HE:
ותבט אשתו מאחריו ותהי נציב מלח:

Segment 27
HE:
וישכם אברהם בבקר אל המקום אשר עמד שם את פני יהוה:

Segment 28
HE:
וישקף על פני סדם ועמרה ועל כל פני ארץ הככר וירא והנה עלה קיטר הארץ כקיטר הכבשן:

Segment 29
HE:
ויהי בשחת אלהים את ערי הככר ויזכר אלהים את אברהם וישלח את לוט מתוך ההפכה בהפך את הערים אשר ישב בהן לוט:

Segment 30
HE:
ויעל לוט מצוער וישב בהר ושתי בנתיו עמו כי ירא לשבת בצוער וישב במערה הוא ושתי בנתיו:

Segment 31
HE:
ותאמר הבכירה אל הצעירה אבינו זקן ואיש אין בארץ לבוא עלינו כדרך כל הארץ:

Segment 32
HE:
לכה נשקה את אבינו יין ונשכבה עמו ונחיה מאבינו זרע:

Segment 33
HE:
ותשקין את אביהן יין בלילה הוא ותבא הבכירה ותשכב את אביה ולא ידע בשכבה ובקומה:

Segment 34
HE:
ויהי ממחרת ותאמר הבכירה אל הצעירה הן שכבתי אמש את אבי נשקנו יין גם הלילה ובאי שכבי עמו ונחיה מאבינו זרע:

Segment 35
HE:
ותשקין גם בלילה ההוא את אביהן יין ותקם הצעירה ותשכב עמו ולא ידע בשכבה ובקמה:

Segment 36
HE:
ותהרין שתי בנות לוט מאביהן:

Segment 37
HE:
ותלד הבכירה בן ותקרא שמו מואב הוא אבי מואב עד היום:

Segment 38
HE:
והצעירה גם הוא ילדה בן ותקרא שמו בן עמי הוא אבי בני עמון עד היום: (ס)