Genesis Chapter 43
בראשית פרק מג
Source: https://ajew.org/reader/tanach-bereishit/1/43

Segment 1
HE:
והרעב כבד בארץ:

Segment 2
HE:
ויהי כאשר כלו לאכל את השבר אשר הביאו ממצרים ויאמר אליהם אביהם שבו שברו לנו מעט אכל:

Segment 3
HE:
ויאמר אליו יהודה לאמר העד העד בנו האיש לאמר לא תראו פני בלתי אחיכם אתכם:

Segment 4
HE:
אם ישך משלח את אחינו אתנו נרדה ונשברה לך אכל:

Segment 5
HE:
ואם אינך משלח לא נרד כי האיש אמר אלינו לא תראו פני בלתי אחיכם אתכם:

Segment 6
HE:
ויאמר ישראל למה הרעתם לי להגיד לאיש העוד לכם אח:

Segment 7
HE:
ויאמרו שאול שאל האיש לנו ולמולדתנו לאמר העוד אביכם חי היש לכם אח ונגד לו על פי הדברים האלה הידוע נדע כי יאמר הורידו את אחיכם:

Segment 8
HE:
ויאמר יהודה אל ישראל אביו שלחה הנער אתי ונקומה ונלכה ונחיה ולא נמות גם אנחנו גם אתה גם טפנו:

Segment 9
HE:
אנכי אערבנו מידי תבקשנו אם לא הביאתיו אליך והצגתיו לפניך וחטאתי לך כל הימים:

Segment 10
HE:
כי לולא התמהמהנו כי עתה שבנו זה פעמים:

Segment 11
HE:
ויאמר אלהם ישראל אביהם אם כן אפוא זאת עשו קחו מזמרת הארץ בכליכם והורידו לאיש מנחה מעט צרי ומעט דבש נכאת ולט בטנים ושקדים:

Segment 12
HE:
וכסף משנה קחו בידכם ואת הכסף המושב בפי אמתחתיכם תשיבו בידכם אולי משגה הוא:

Segment 13
HE:
ואת אחיכם קחו וקומו שובו אל האיש:

Segment 14
HE:
ואל שדי יתן לכם רחמים לפני האיש ושלח לכם את אחיכם אחר ואת בנימין ואני כאשר שכלתי שכלתי:

Segment 15
HE:
ויקחו האנשים את המנחה הזאת ומשנה כסף לקחו בידם ואת בנימן ויקמו וירדו מצרים ויעמדו לפני יוסף:

Segment 16
HE:
שישי  וירא יוסף אתם את בנימין ויאמר לאשר על ביתו הבא את האנשים הביתה וטבח טבח והכן כי אתי יאכלו האנשים בצהרים:

Segment 17
HE:
ויעש האיש כאשר אמר יוסף ויבא האיש את האנשים ביתה יוסף:

Segment 18
HE:
וייראו האנשים כי הובאו בית יוסף ויאמרו על דבר הכסף השב באמתחתינו בתחלה אנחנו מובאים להתגלל עלינו ולהתנפל עלינו ולקחת אתנו לעבדים ואת חמרינו:

Segment 19
HE:
ויגשו אל האיש אשר על בית יוסף וידברו אליו פתח הבית:

Segment 20
HE:
ויאמרו בי אדני ירד ירדנו בתחלה לשבר אכל:

Segment 21
HE:
ויהי כי באנו אל המלון ונפתחה את אמתחתינו והנה כסף איש בפי אמתחתו כספנו במשקלו ונשב אתו בידנו:

Segment 22
HE:
וכסף אחר הורדנו בידנו לשבר אכל לא ידענו מי שם כספנו באמתחתינו:

Segment 23
HE:
ויאמר שלום לכם אל תיראו אלהיכם ואלהי אביכם נתן לכם מטמון באמתחתיכם כספכם בא אלי ויוצא אלהם את שמעון:

Segment 24
HE:
ויבא האיש את האנשים ביתה יוסף ויתן מים וירחצו רגליהם ויתן מספוא לחמריהם:

Segment 25
HE:
ויכינו את המנחה עד בוא יוסף בצהרים כי שמעו כי שם יאכלו לחם:

Segment 26
HE:
ויבא יוסף הביתה ויביאו לו את המנחה אשר בידם הביתה וישתחוו לו ארצה:

Segment 27
HE:
וישאל להם לשלום ויאמר השלום אביכם הזקן אשר אמרתם העודנו חי:

Segment 28
HE:
ויאמרו שלום לעבדך לאבינו עודנו חי ויקדו (וישתחו) וישתחוו:

Segment 29
HE:
וישא עיניו וירא את בנימין אחיו בן אמו ויאמר הזה אחיכם הקטן אשר אמרתם אלי ויאמר אלהים יחנך בני:

Segment 30
HE:
שביעי  וימהר יוסף כי נכמרו רחמיו אל אחיו ויבקש לבכות ויבא החדרה ויבך שמה:

Segment 31
HE:
וירחץ פניו ויצא ויתאפק ויאמר שימו לחם:

Segment 32
HE:
וישימו לו לבדו ולהם לבדם ולמצרים האכלים אתו לבדם כי לא יוכלון המצרים לאכל את העברים לחם כי תועבה הוא למצרים:

Segment 33
HE:
וישבו לפניו הבכר כבכרתו והצעיר כצערתו ויתמהו האנשים איש אל רעהו:

Segment 34
HE:
וישא משאת מאת פניו אלהם ותרב משאת בנימן ממשאת כלם חמש ידות וישתו וישכרו עמו: