Genesis Chapter 8
בראשית פרק ח
Source: https://ajew.org/reader/tanach-bereishit/1/8

Segment 1
HE:
ויזכר אלהים את נח ואת כל החיה ואת כל הבהמה אשר אתו בתבה ויעבר אלהים רוח על הארץ וישכו המים:

Segment 2
HE:
ויסכרו מעינת תהום וארבת השמים ויכלא הגשם מן השמים:

Segment 3
HE:
וישבו המים מעל הארץ הלוך ושוב ויחסרו המים מקצה חמשים ומאת יום:

Segment 4
HE:
ותנח התבה בחדש השביעי בשבעה עשר יום לחדש על הרי אררט:

Segment 5
HE:
והמים היו הלוך וחסור עד החדש העשירי בעשירי באחד לחדש נראו ראשי ההרים:

Segment 6
HE:
ויהי מקץ ארבעים יום ויפתח נח את חלון התבה אשר עשה:

Segment 7
HE:
וישלח את הערב ויצא יצוא ושוב עד יבשת המים מעל הארץ:

Segment 8
HE:
וישלח את היונה מאתו לראות הקלו המים מעל פני האדמה:

Segment 9
HE:
ולא מצאה היונה מנוח לכף רגלה ותשב אליו אל התבה כי מים על פני כל הארץ וישלח ידו ויקחה ויבא אתה אליו אל התבה:

Segment 10
HE:
ויחל עוד שבעת ימים אחרים ויסף שלח את היונה מן התבה:

Segment 11
HE:
ותבא אליו היונה לעת ערב והנה עלה זית טרף בפיה וידע נח כי קלו המים מעל הארץ:

Segment 12
HE:
וייחל עוד שבעת ימים אחרים וישלח את היונה ולא יספה שוב אליו עוד:

Segment 13
HE:
ויהי באחת ושש מאות שנה בראשון באחד לחדש חרבו המים מעל הארץ ויסר נח את מכסה התבה וירא והנה חרבו פני האדמה:

Segment 14
HE:
ובחדש השני בשבעה ועשרים יום לחדש יבשה הארץ: (ס)

Segment 15
HE:
רביעי  וידבר אלהים אל נח לאמר:

Segment 16
HE:
צא מן התבה אתה ואשתך ובניך ונשי בניך אתך:

Segment 17
HE:
כל החיה אשר אתך מכל בשר בעוף ובבהמה ובכל הרמש הרמש על הארץ (הוצא) היצא אתך ושרצו בארץ ופרו ורבו על הארץ:

Segment 18
HE:
ויצא נח ובניו ואשתו ונשי בניו אתו:

Segment 19
HE:
כל החיה כל הרמש וכל העוף כל רומש על הארץ למשפחתיהם יצאו מן התבה:

Segment 20
HE:
ויבן נח מזבח ליהוה ויקח מכל הבהמה הטהרה ומכל העוף הטהור ויעל עלת במזבח:

Segment 21
HE:
וירח יהוה את ריח הניחח ויאמר יהוה אל לבו לא אסף לקלל עוד את האדמה בעבור האדם כי יצר לב האדם רע מנעריו ולא אסף עוד להכות את כל חי כאשר עשיתי:

Segment 22
HE:
עד כל ימי הארץ זרע וקציר וקר וחם וקיץ וחרף ויום ולילה לא ישבתו: