Deuteronomy Chapter 32
דברים פרק לב
Source: https://ajew.org/reader/tanach-devarim/1/32

Segment 1
HE:
האזינו השמים ואדברה ותשמע הארץ אמרי פי:

Segment 2
HE:
יערף כמטר לקחי תזל כטל אמרתי כשעירם עלי דשא וכרביבים עלי עשב:

Segment 3
HE:
כי שם יהוה אקרא הבו גדל לאלהינו:

Segment 4
HE:
הצור תמים פעלו כי כל דרכיו משפט אל אמונה ואין עול צדיק וישר הוא:

Segment 5
HE:
שחת לו לא בניו מומם דור עקש ופתלתל:

Segment 6
HE:
הליהוה תגמלו זאת עם נבל ולא חכם הלוא הוא אביך קנך הוא עשך ויכננך:

Segment 7
HE:
שני  זכר ימות עולם בינו שנות דר ודר שאל אביך ויגדך זקניך ויאמרו לך:

Segment 8
HE:
בהנחל עליון גוים בהפרידו בני אדם יצב גבלת עמים למספר בני ישראל:

Segment 9
HE:
כי חלק יהוה עמו יעקב חבל נחלתו:

Segment 10
HE:
ימצאהו בארץ מדבר ובתהו ילל ישמן יסבבנהו יבוננהו יצרנהו כאישון עינו:

Segment 11
HE:
כנשר יעיר קנו על גוזליו ירחף יפרש כנפיו יקחהו ישאהו על אברתו:

Segment 12
HE:
יהוה בדד ינחנו ואין עמו אל נכר:

Segment 13
HE:
שלישי  ירכבהו על במתי ארץ ויאכל תנובת שדי וינקהו דבש מסלע ושמן מחלמיש צור:

Segment 14
HE:
חמאת בקר וחלב צאן עם חלב כרים ואילים בני בשן ועתודים עם חלב כליות חטה ודם ענב תשתה חמר:

Segment 15
HE:
וישמן ישרון ויבעט שמנת עבית כשית ויטש אלוה עשהו וינבל צור ישעתו:

Segment 16
HE:
יקנאהו בזרים בתועבת יכעיסהו:

Segment 17
HE:
יזבחו לשדים לא אלה אלהים לא ידעום חדשים מקרב באו לא שערום אבתיכם:

Segment 18
HE:
צור ילדך תשי ותשכח אל מחללך:

Segment 19
HE:
רביעי  וירא יהוה וינאץ מכעס בניו ובנתיו:

Segment 20
HE:
ויאמר אסתירה פני מהם אראה מה אחריתם כי דור תהפכת המה בנים לא אמן בם:

Segment 21
HE:
הם קנאוני בלא אל כעסוני בהבליהם ואני אקניאם בלא עם בגוי נבל אכעיסם:

Segment 22
HE:
כי אש קדחה באפי ותיקד עד שאול תחתית ותאכל ארץ ויבלה ותלהט מוסדי הרים:

Segment 23
HE:
אספה עלימו רעות חצי אכלה בם:

Segment 24
HE:
מזי רעב ולחמי רשף וקטב מרירי ושן בהמת אשלח בם עם חמת זחלי עפר:

Segment 25
HE:
מחוץ תשכל חרב ומחדרים אימה גם בחור גם בתולה יונק עם איש שיבה:

Segment 26
HE:
אמרתי אפאיהם אשביתה מאנוש זכרם:

Segment 27
HE:
לולי כעס אויב אגור פן ינכרו צרימו פן יאמרו ידנו רמה ולא יהוה פעל כל זאת:

Segment 28
HE:
כי גוי אבד עצות המה ואין בהם תבונה:

Segment 29
HE:
חמישי  לו חכמו ישכילו זאת יבינו לאחריתם:

Segment 30
HE:
איכה ירדף אחד אלף ושנים יניסו רבבה אם לא כי צורם מכרם ויהוה הסגירם:

Segment 31
HE:
כי לא כצורנו צורם ואיבינו פלילים:

Segment 32
HE:
כי מגפן סדם גפנם ומשדמת עמרה ענבמו ענבי רוש אשכלת מררת למו:

Segment 33
HE:
חמת תנינם יינם וראש פתנים אכזר:

Segment 34
HE:
הלא הוא כמס עמדי חתום באוצרתי:

Segment 35
HE:
לי נקם ושלם לעת תמוט רגלם כי קרוב יום אידם וחש עתדת למו:

Segment 36
HE:
כי ידין יהוה עמו ועל עבדיו יתנחם כי יראה כי אזלת יד ואפס עצור ועזוב:

Segment 37
HE:
ואמר אי אלהימו צור חסיו בו:

Segment 38
HE:
אשר חלב זבחימו יאכלו ישתו יין נסיכם יקומו ויעזרכם יהי עליכם סתרה:

Segment 39
HE:
ראו עתה כי אני אני הוא ואין אלהים עמדי אני אמית ואחיה מחצתי ואני ארפא ואין מידי מציל:

Segment 40
HE:
שישי  כי אשא אל שמים ידי ואמרתי חי אנכי לעלם:

Segment 41
HE:
אם שנותי ברק חרבי ותאחז במשפט ידי אשיב נקם לצרי ולמשנאי אשלם:

Segment 42
HE:
אשכיר חצי מדם וחרבי תאכל בשר מדם חלל ושביה מראש פרעות אויב:

Segment 43
HE:
הרנינו גוים עמו כי דם עבדיו יקום ונקם ישיב לצריו וכפר אדמתו עמו: (פ)

Segment 44
HE:
שביעי  ויבא משה וידבר את כל דברי השירה הזאת באזני העם הוא והושע בן נון:

Segment 45
HE:
ויכל משה לדבר את כל הדברים האלה אל כל ישראל:

Segment 46
HE:
ויאמר אלהם שימו לבבכם לכל הדברים אשר אנכי מעיד בכם היום אשר תצום את בניכם לשמר לעשות את כל דברי התורה הזאת:

Segment 47
HE:
כי לא דבר רק הוא מכם כי הוא חייכם ובדבר הזה תאריכו ימים על האדמה אשר אתם עברים את הירדן שמה לרשתה: (פ)

Segment 48
HE:
מפטיר  וידבר יהוה אל משה בעצם היום הזה לאמר:

Segment 49
HE:
עלה אל הר העברים הזה הר נבו אשר בארץ מואב אשר על פני ירחו וראה את ארץ כנען אשר אני נתן לבני ישראל לאחזה:

Segment 50
HE:
ומת בהר אשר אתה עלה שמה והאסף אל עמיך כאשר מת אהרן אחיך בהר ההר ויאסף אל עמיו:

Segment 51
HE:
על אשר מעלתם בי בתוך בני ישראל במי מריבת קדש מדבר צן על אשר לא קדשתם אותי בתוך בני ישראל:

Segment 52
HE:
כי מנגד תראה את הארץ ושמה לא תבוא אל הארץ אשר אני נתן לבני ישראל: (פפפ)