Chronicles 1 Chapter 13
דברי הימים א פרק יג
Source: https://ajew.org/reader/tanach-divrei-hayamim-a/1/13

Segment 1
HE:
ויועץ דויד עם שרי האלפים והמאות לכל נגיד:

Segment 2
HE:
ויאמר דויד לכל קהל ישראל אם עליכם טוב ומן יהוה אלהינו נפרצה נשלחה על אחינו הנשארים בכל ארצות ישראל ועמהם הכהנים והלוים בערי מגרשיהם ויקבצו אלינו:

Segment 3
HE:
ונסבה את ארון אלהינו אלינו כי לא דרשנהו בימי שאול:

Segment 4
HE:
ויאמרו כל הקהל לעשות כן כי ישר הדבר בעיני כל העם:

Segment 5
HE:
ויקהל דויד את כל ישראל מן שיחור מצרים ועד לבוא חמת להביא את ארון האלהים מקרית יערים:

Segment 6
HE:
ויעל דויד וכל ישראל בעלתה אל קרית יערים אשר ליהודה להעלות משם את ארון האלהים יהוה יושב הכרובים אשר נקרא שם:

Segment 7
HE:
וירכיבו את ארון האלהים על עגלה חדשה מבית אבינדב ועזא ואחיו נהגים בעגלה:

Segment 8
HE:
ודויד וכל ישראל משחקים לפני האלהים בכל עז ובשירים ובכנרות ובנבלים ובתפים ובמצלתים ובחצצרות:

Segment 9
HE:
ויבאו עד גרן כידן וישלח עזא את ידו לאחז את הארון כי שמטו הבקר:

Segment 10
HE:
ויחר אף יהוה בעזא ויכהו על אשר שלח ידו על הארון וימת שם לפני אלהים:

Segment 11
HE:
ויחר לדויד כי פרץ יהוה פרץ בעזא ויקרא למקום ההוא פרץ עזא עד היום הזה:

Segment 12
HE:
ויירא דויד את האלהים ביום ההוא לאמר היך אביא אלי את ארון האלהים:

Segment 13
HE:
ולא הסיר דויד את הארון אליו אל עיר דויד ויטהו אל בית עבד אדם הגתי:

Segment 14
HE:
וישב ארון האלהים עם בית עבד אדם בביתו שלשה חדשים ויברך יהוה את בית עבד אדם ואת כל אשר לו: (ס)