Chronicles 1 Chapter 18
דברי הימים א פרק יח
Source: https://ajew.org/reader/tanach-divrei-hayamim-a/1/18

Segment 1
HE:
ויהי אחרי כן ויך דויד את פלשתים ויכניעם ויקח את גת ובנתיה מיד פלשתים:

Segment 2
HE:
ויך את מואב ויהיו מואב עבדים לדויד נשאי מנחה:

Segment 3
HE:
ויך דויד את הדדעזר מלך צובה חמתה בלכתו להציב ידו בנהר פרת:

Segment 4
HE:
וילכד דויד ממנו אלף רכב ושבעת אלפים פרשים ועשרים אלף איש רגלי ויעקר דויד את כל הרכב ויותר ממנו מאה רכב:

Segment 5
HE:
ויבא ארם דרמשק לעזור להדדעזר מלך צובה ויך דויד בארם עשרים ושנים אלף איש:

Segment 6
HE:
וישם דויד בארם דרמשק ויהי ארם לדויד עבדים נשאי מנחה ויושע יהוה לדויד בכל אשר הלך:

Segment 7
HE:
ויקח דויד את שלטי הזהב אשר היו על עבדי הדדעזר ויביאם ירושלם:

Segment 8
HE:
ומטבחת ומכון ערי הדדעזר לקח דויד נחשת רבה מאד בה עשה שלמה את ים הנחשת ואת העמודים ואת כלי הנחשת: (פ)

Segment 9
HE:
וישמע תעו מלך חמת כי הכה דויד את כל חיל הדדעזר מלך צובה:

Segment 10
HE:
וישלח את הדורם בנו אל המלך דויד (לשאול) לשאל לו לשלום ולברכו על אשר נלחם בהדדעזר ויכהו כי איש מלחמות תעו היה הדדעזר וכל כלי זהב וכסף ונחשת:

Segment 11
HE:
גם אתם הקדיש המלך דויד ליהוה עם הכסף והזהב אשר נשא מכל הגוים מאדום וממואב ומבני עמון ומפלשתים ומעמלק:

Segment 12
HE:
ואבשי בן צרויה הכה את אדום בגיא המלח שמונה עשר אלף:

Segment 13
HE:
וישם באדום נציבים ויהיו כל אדום עבדים לדויד ויושע יהוה את דויד בכל אשר הלך:

Segment 14
HE:
וימלך דויד על כל ישראל ויהי עשה משפט וצדקה לכל עמו:

Segment 15
HE:
ויואב בן צרויה על הצבא ויהושפט בן אחילוד מזכיר:

Segment 16
HE:
וצדוק בן אחיטוב ואבימלך בן אביתר כהנים ושושא סופר:

Segment 17
HE:
ובניהו בן יהוידע על הכרתי והפלתי ובני דויד הראשנים ליד המלך: (פ)