Chronicles 1 Chapter 19
דברי הימים א פרק יט
Source: https://ajew.org/reader/tanach-divrei-hayamim-a/1/19

Segment 1
HE:
ויהי אחרי כן וימת נחש מלך בני עמון וימלך בנו תחתיו:

Segment 2
HE:
ויאמר דויד אעשה חסד עם חנון בן נחש כי עשה אביו עמי חסד וישלח דויד מלאכים לנחמו על אביו ויבאו עבדי דויד אל ארץ בני עמון אל חנון לנחמו:

Segment 3
HE:
ויאמרו שרי בני עמון לחנון המכבד דויד את אביך בעיניך כי שלח לך מנחמים הלא בעבור לחקר ולהפך ולרגל הארץ באו עבדיו אליך:

Segment 4
HE:
ויקח חנון את עבדי דויד ויגלחם ויכרת את מדויהם בחצי עד המפשעה וישלחם:

Segment 5
HE:
וילכו ויגידו לדויד על האנשים וישלח לקראתם כי היו האנשים נכלמים מאד ויאמר המלך שבו בירחו עד אשר יצמח זקנכם ושבתם: (ס)

Segment 6
HE:
ויראו בני עמון כי התבאשו עם דויד וישלח חנון ובני עמון אלף ככר כסף לשכר להם מן ארם נהרים ומן ארם מעכה ומצובה רכב ופרשים:

Segment 7
HE:
וישכרו להם שנים ושלשים אלף רכב ואת מלך מעכה ואת עמו ויבאו ויחנו לפני מידבא ובני עמון נאספו מעריהם ויבאו למלחמה: (ס)

Segment 8
HE:
וישמע דויד וישלח את יואב ואת כל צבא הגבורים:

Segment 9
HE:
ויצאו בני עמון ויערכו מלחמה פתח העיר והמלכים אשר באו לבדם בשדה:

Segment 10
HE:
וירא יואב כי היתה פני המלחמה אליו פנים ואחור ויבחר מכל בחור בישראל ויערך לקראת ארם:

Segment 11
HE:
ואת יתר העם נתן ביד אבשי אחיו ויערכו לקראת בני עמון:

Segment 12
HE:
ויאמר אם תחזק ממני ארם והיית לי לתשועה (ס) ואם בני עמון יחזקו ממך והושעתיך:

Segment 13
HE:
חזק ונתחזקה בעד עמנו ובעד ערי אלהינו ויהוה הטוב בעיניו יעשה:

Segment 14
HE:
ויגש יואב והעם אשר עמו לפני ארם למלחמה וינוסו מפניו:

Segment 15
HE:
ובני עמון ראו כי נס ארם וינוסו גם הם מפני אבשי אחיו ויבאו העירה ויבא יואב ירושלם: (ס)

Segment 16
HE:
וירא ארם כי נגפו לפני ישראל וישלחו מלאכים ויוציאו את ארם אשר מעבר הנהר ושופך שר צבא הדדעזר לפניהם:

Segment 17
HE:
ויגד לדויד ויאסף את כל ישראל ויעבר הירדן ויבא אלהם ויערך אלהם ויערך דויד לקראת ארם מלחמה וילחמו עמו:

Segment 18
HE:
וינס ארם מלפני ישראל ויהרג דויד מארם שבעת אלפים רכב וארבעים אלף איש רגלי ואת שופך שר הצבא המית:

Segment 19
HE:
ויראו עבדי הדדעזר כי נגפו לפני ישראל וישלימו עם דויד ויעבדהו ולא אבה ארם להושיע את בני עמון עוד: (ס)