Chronicles 1 Chapter 21
דברי הימים א פרק כא
Source: https://ajew.org/reader/tanach-divrei-hayamim-a/1/21

Segment 1
HE:
ויעמד שטן על ישראל ויסת את דויד למנות את ישראל:

Segment 2
HE:
ויאמר דויד אל יואב ואל שרי העם לכו ספרו את ישראל מבאר שבע ועד דן והביאו אלי ואדעה את מספרם:

Segment 3
HE:
ויאמר יואב יוסף יהוה על עמו כהם מאה פעמים הלא אדני המלך כלם לאדני לעבדים למה יבקש זאת אדני למה יהיה לאשמה לישראל:

Segment 4
HE:
ודבר המלך חזק על יואב ויצא יואב ויתהלך בכל ישראל ויבא ירושלם:

Segment 5
HE:
ויתן יואב את מספר מפקד העם אל דויד ויהי כל ישראל אלף אלפים ומאה אלף איש שלף חרב ויהודה ארבע מאות ושבעים אלף איש שלף חרב:

Segment 6
HE:
ולוי ובנימן לא פקד בתוכם כי נתעב דבר המלך את יואב:

Segment 7
HE:
וירע בעיני האלהים על הדבר הזה ויך את ישראל: (ס)

Segment 8
HE:
ויאמר דויד אל האלהים חטאתי מאד אשר עשיתי את הדבר הזה ועתה העבר נא את עוון עבדך כי נסכלתי מאד: (פ)

Segment 9
HE:
וידבר יהוה אל גד חזה דויד לאמר:

Segment 10
HE:
לך ודברת אל דויד לאמר כה אמר יהוה שלוש אני נטה עליך בחר לך אחת מהנה ואעשה לך:

Segment 11
HE:
ויבא גד אל דויד ויאמר לו כה אמר יהוה קבל לך:

Segment 12
HE:
אם שלוש שנים רעב ואם שלשה חדשים נספה מפני צריך וחרב אויבך למשגת ואם שלשת ימים חרב יהוה ודבר בארץ ומלאך יהוה משחית בכל גבול ישראל ועתה ראה מה אשיב את שלחי דבר: (ס)

Segment 13
HE:
ויאמר דויד אל גד צר לי מאד אפלה נא ביד יהוה כי רבים רחמיו מאד וביד אדם אל אפל:

Segment 14
HE:
ויתן יהוה דבר בישראל ויפל מישראל שבעים אלף איש:

Segment 15
HE:
וישלח האלהים מלאך לירושלם להשחיתה וכהשחית ראה יהוה וינחם על הרעה ויאמר למלאך המשחית רב עתה הרף ידך ומלאך יהוה עמד עם גרן ארנן היבוסי: (ס)

Segment 16
HE:
וישא דויד את עיניו וירא את מלאך יהוה עמד בין הארץ ובין השמים וחרבו שלופה בידו נטויה על ירושלם ויפל דויד והזקנים מכסים בשקים על פניהם:

Segment 17
HE:
ויאמר דויד אל האלהים הלא אני אמרתי למנות בעם ואני הוא אשר חטאתי והרע הרעותי ואלה הצאן מה עשו יהוה אלהי תהי נא ידך בי ובבית אבי ובעמך לא למגפה: (ס)

Segment 18
HE:
ומלאך יהוה אמר אל גד לאמר לדויד כי יעלה דויד להקים מזבח ליהוה בגרן ארנן היבסי:

Segment 19
HE:
ויעל דויד בדבר גד אשר דבר בשם יהוה:

Segment 20
HE:
וישב ארנן וירא את המלאך וארבעת בניו עמו מתחבאים וארנן דש חטים:

Segment 21
HE:
ויבא דויד עד ארנן ויבט ארנן וירא את דויד ויצא מן הגרן וישתחו לדויד אפים ארצה:

Segment 22
HE:
ויאמר דויד אל ארנן תנה לי מקום הגרן ואבנה בו מזבח ליהוה בכסף מלא תנהו לי ותעצר המגפה מעל העם:

Segment 23
HE:
ויאמר ארנן אל דויד קח לך ויעש אדני המלך הטוב בעיניו ראה נתתי הבקר לעלות והמורגים לעצים והחטים למנחה הכל נתתי:

Segment 24
HE:
ויאמר המלך דויד לארנן לא כי קנה אקנה בכסף מלא כי לא אשא אשר לך ליהוה והעלות עולה חנם:

Segment 25
HE:
ויתן דויד לארנן במקום שקלי זהב משקל שש מאות:

Segment 26
HE:
ויבן שם דויד מזבח ליהוה ויעל עלות ושלמים ויקרא אל יהוה ויענהו באש מן השמים על מזבח העלה: (ס)

Segment 27
HE:
ויאמר יהוה למלאך וישב חרבו אל נדנה:

Segment 28
HE:
בעת ההיא בראות דויד כי ענהו יהוה בגרן ארנן היבוסי ויזבח שם:

Segment 29
HE:
ומשכן יהוה אשר עשה משה במדבר ומזבח העולה בעת ההיא בבמה בגבעון:

Segment 30
HE:
ולא יכל דויד ללכת לפניו לדרש אלהים כי נבעת מפני חרב מלאך יהוה: (ס)