Chronicles 2 Chapter 23
דברי הימים ב פרק כג
Source: https://ajew.org/reader/tanach-divrei-hayamim-b/1/23

Segment 1
HE:
ובשנה השבעית התחזק יהוידע ויקח את שרי המאות לעזריהו בן ירחם ולישמעאל בן יהוחנן ולעזריהו בן עובד ואת מעשיהו בן עדיהו ואת אלישפט בן זכרי עמו בברית:

Segment 2
HE:
ויסבו ביהודה ויקבצו את הלוים מכל ערי יהודה וראשי האבות לישראל ויבאו אל ירושלם:

Segment 3
HE:
ויכרת כל הקהל ברית בבית האלהים עם המלך ויאמר להם הנה בן המלך ימלך כאשר דבר יהוה על בני דויד:

Segment 4
HE:
זה הדבר אשר תעשו השלשית מכם באי השבת לכהנים וללוים לשערי הספים:

Segment 5
HE:
והשלשית בבית המלך והשלשית בשער היסוד וכל העם בחצרות בית יהוה:

Segment 6
HE:
ואל יבוא בית יהוה כי אם הכהנים והמשרתים ללוים המה יבאו כי קדש המה וכל העם ישמרו משמרת יהוה:

Segment 7
HE:
והקיפו הלוים את המלך סביב איש וכליו בידו והבא אל הבית יומת והיו את המלך בבאו ובצאתו:

Segment 8
HE:
ויעשו הלוים וכל יהודה ככל אשר צוה יהוידע הכהן ויקחו איש את אנשיו באי השבת עם יוצאי השבת כי לא פטר יהוידע הכהן את המחלקות:

Segment 9
HE:
ויתן יהוידע הכהן לשרי המאות את החניתים ואת המגנות ואת השלטים אשר למלך דויד אשר בית האלהים:

Segment 10
HE:
ויעמד את כל העם ואיש שלחו בידו מכתף הבית הימנית עד כתף הבית השמאלית למזבח ולבית על המלך סביב:

Segment 11
HE:
ויוציאו את בן המלך ויתנו עליו את הנזר ואת העדות וימליכו אתו וימשחהו יהוידע ובניו ויאמרו יחי המלך: (ס)

Segment 12
HE:
ותשמע עתליהו את קול העם הרצים והמהללים את המלך ותבוא אל העם בית יהוה:

Segment 13
HE:
ותרא והנה המלך עומד על עמודו במבוא והשרים והחצצרות על המלך וכל עם הארץ שמח ותוקע בחצצרות והמשוררים בכלי השיר ומודיעים להלל ותקרע עתליהו את בגדיה ותאמר קשר קשר: (ס)

Segment 14
HE:
ויוצא יהוידע הכהן את שרי המאות פקודי החיל ויאמר אלהם הוציאוה אל מבית השדרות והבא אחריה יומת בחרב כי אמר הכהן לא תמיתוה בית יהוה:

Segment 15
HE:
וישימו לה ידים ותבוא אל מבוא שער הסוסים בית המלך וימיתוה שם: (פ)

Segment 16
HE:
ויכרת יהוידע ברית בינו ובין כל העם ובין המלך להיות לעם ליהוה:

Segment 17
HE:
ויבאו כל העם בית הבעל ויתצהו ואת מזבחתיו ואת צלמיו שברו ואת מתן כהן הבעל הרגו לפני המזבחות:

Segment 18
HE:
וישם יהוידע פקדת בית יהוה ביד הכהנים הלוים אשר חלק דויד על בית יהוה להעלות עלות יהוה ככתוב בתורת משה בשמחה ובשיר על ידי דויד:

Segment 19
HE:
ויעמד השוערים על שערי בית יהוה ולא יבא טמא לכל דבר:

Segment 20
HE:
ויקח את שרי המאות ואת האדירים ואת המושלים בעם ואת כל עם הארץ ויורד את המלך מבית יהוה ויבאו בתוך שער העליון בית המלך ויושיבו את המלך על כסא הממלכה:

Segment 21
HE:
וישמחו כל עם הארץ והעיר שקטה ואת עתליהו המיתו בחרב: