Chronicles 2 Chapter 29
דברי הימים ב פרק כט
Source: https://ajew.org/reader/tanach-divrei-hayamim-b/1/29

Segment 1
HE:
יחזקיהו מלך בן עשרים וחמש שנה ועשרים ותשע שנה מלך בירושלם ושם אמו אביה בת זכריהו:

Segment 2
HE:
ויעש הישר בעיני יהוה ככל אשר עשה דויד אביו:

Segment 3
HE:
הוא בשנה הראשונה למלכו בחדש הראשון פתח את דלתות בית יהוה ויחזקם:

Segment 4
HE:
ויבא את הכהנים ואת הלוים ויאספם לרחוב המזרח:

Segment 5
HE:
ויאמר להם שמעוני הלוים עתה התקדשו וקדשו את בית יהוה אלהי אבתיכם והוציאו את הנדה מן הקדש:

Segment 6
HE:
כי מעלו אבתינו ועשו הרע בעיני יהוה אלהינו ויעזבהו ויסבו פניהם ממשכן יהוה ויתנו ערף:

Segment 7
HE:
גם סגרו דלתות האולם ויכבו את הנרות וקטרת לא הקטירו ועלה לא העלו בקדש לאלהי ישראל:

Segment 8
HE:
ויהי קצף יהוה על יהודה וירושלם ויתנם (לזועה) לזעוה לשמה ולשרקה כאשר אתם ראים בעיניכם:

Segment 9
HE:
והנה נפלו אבותינו בחרב ובנינו ובנותינו ונשינו בשבי על זאת:

Segment 10
HE:
עתה עם לבבי לכרות ברית ליהוה אלהי ישראל וישב ממנו חרון אפו:

Segment 11
HE:
בני עתה אל תשלו כי בכם בחר יהוה לעמד לפניו לשרתו ולהיות לו משרתים ומקטרים: (פ)

Segment 12
HE:
ויקמו הלוים מחת בן עמשי ויואל בן עזריהו מן בני הקהתי ומן בני מררי קיש בן עבדי ועזריהו בן יהללאל (ס) ומן הגרשני יואח בן זמה ועדן בן יואח:

Segment 13
HE:
ומן בני אליצפן שמרי (ויעואל) ויעיאל ומן בני אסף זכריהו ומתניהו: (ס)

Segment 14
HE:
ומן בני הימן (יחואל) יחיאל ושמעי (ס) ומן בני ידותון שמעיה ועזיאל:

Segment 15
HE:
ויאספו את אחיהם ויתקדשו ויבאו כמצות המלך בדברי יהוה לטהר בית יהוה:

Segment 16
HE:
ויבאו הכהנים לפנימה בית יהוה לטהר ויוציאו את כל הטמאה אשר מצאו בהיכל יהוה לחצר בית יהוה ויקבלו הלוים להוציא לנחל קדרון חוצה:

Segment 17
HE:
ויחלו באחד לחדש הראשון לקדש וביום שמונה לחדש באו לאולם יהוה ויקדשו את בית יהוה לימים שמונה וביום ששה עשר לחדש הראשון כלו: (ס)

Segment 18
HE:
ויבואו פנימה אל חזקיהו המלך ויאמרו טהרנו את כל בית יהוה את מזבח העולה ואת כל כליו ואת שלחן המערכת ואת כל כליו:

Segment 19
HE:
ואת כל הכלים אשר הזניח המלך אחז במלכותו במעלו הכנו והקדשנו והנם לפני מזבח יהוה: (ס)

Segment 20
HE:
וישכם יחזקיהו המלך ויאסף את שרי העיר ויעל בית יהוה:

Segment 21
HE:
ויביאו פרים שבעה ואילים שבעה וכבשים שבעה וצפירי עזים שבעה לחטאת על הממלכה ועל המקדש ועל יהודה ויאמר לבני אהרן הכהנים להעלות על מזבח יהוה:

Segment 22
HE:
וישחטו הבקר ויקבלו הכהנים את הדם ויזרקו המזבחה וישחטו האלים ויזרקו הדם המזבחה וישחטו הכבשים ויזרקו הדם המזבחה:

Segment 23
HE:
ויגישו את שעירי החטאת לפני המלך והקהל ויסמכו ידיהם עליהם:

Segment 24
HE:
וישחטום הכהנים ויחטאו את דמם המזבחה לכפר על כל ישראל כי לכל ישראל אמר המלך העולה והחטאת:

Segment 25
HE:
ויעמד את הלוים בית יהוה במצלתים בנבלים ובכנרות במצות דויד וגד חזה המלך ונתן הנביא כי ביד יהוה המצוה ביד נביאיו:

Segment 26
HE:
ויעמדו הלוים בכלי דויד והכהנים בחצצרות: (פ)

Segment 27
HE:
ויאמר חזקיהו להעלות העלה להמזבח ובעת החל העולה החל שיר יהוה והחצצרות ועל ידי כלי דויד מלך ישראל:

Segment 28
HE:
וכל הקהל משתחוים והשיר משורר והחצצרות (מחצצרים) מחצרים הכל עד לכלות העלה:

Segment 29
HE:
וככלות להעלות כרעו המלך וכל הנמצאים אתו וישתחוו:

Segment 30
HE:
ויאמר יחזקיהו המלך והשרים ללוים להלל ליהוה בדברי דויד ואסף החזה ויהללו עד לשמחה ויקדו וישתחוו: (פ)

Segment 31
HE:
ויען יחזקיהו ויאמר עתה מלאתם ידכם ליהוה גשו והביאו זבחים ותודות לבית יהוה ויביאו הקהל זבחים ותודות וכל נדיב לב עלות:

Segment 32
HE:
ויהי מספר העלה אשר הביאו הקהל בקר שבעים אילים מאה כבשים מאתים לעלה ליהוה כל אלה:

Segment 33
HE:
והקדשים בקר שש מאות וצאן שלשת אלפים:

Segment 34
HE:
רק הכהנים היו למעט ולא יכלו להפשיט את כל העלות ויחזקום אחיהם הלוים עד כלות המלאכה ועד יתקדשו הכהנים כי הלוים ישרי לבב להתקדש מהכהנים:

Segment 35
HE:
וגם עלה לרב בחלבי השלמים ובנסכים לעלה ותכון עבודת בית יהוה:

Segment 36
HE:
וישמח יחזקיהו וכל העם על ההכין האלהים לעם כי בפתאם היה הדבר: (פ)