Chronicles 2 Chapter 35
דברי הימים ב פרק לה
Source: https://ajew.org/reader/tanach-divrei-hayamim-b/1/35

Segment 1
HE:
ויעש יאשיהו בירושלם פסח ליהוה וישחטו הפסח בארבעה עשר לחדש הראשון:

Segment 2
HE:
ויעמד הכהנים על משמרותם ויחזקם לעבודת בית יהוה: (ס)

Segment 3
HE:
ויאמר ללוים (המבונים) המבינים לכל ישראל הקדושים ליהוה תנו את ארון הקדש בבית אשר בנה שלמה בן דויד מלך ישראל אין לכם משא בכתף עתה עבדו את יהוה אלהיכם ואת עמו ישראל:

Segment 4
HE:
(והכונו) והכינו לבית אבותיכם כמחלקותיכם בכתב דויד מלך ישראל ובמכתב שלמה בנו:

Segment 5
HE:
ועמדו בקדש לפלגות בית האבות לאחיכם בני העם וחלקת בית אב ללוים:

Segment 6
HE:
ושחטו הפסח והתקדשו והכינו לאחיכם לעשות כדבר יהוה ביד משה: (פ)

Segment 7
HE:
וירם יאשיהו לבני העם צאן כבשים ובני עזים הכל לפסחים לכל הנמצא למספר שלשים אלף ובקר שלשת אלפים אלה מרכוש המלך: (ס)

Segment 8
HE:
ושריו לנדבה לעם לכהנים וללוים הרימו חלקיה וזכריהו ויחיאל נגידי בית האלהים לכהנים נתנו לפסחים אלפים ושש מאות ובקר שלש מאות:

Segment 9
HE:
(וכונניהו) וכנניהו ושמעיהו ונתנאל אחיו וחשביהו ויעיאל ויוזבד שרי הלוים הרימו ללוים לפסחים חמשת אלפים ובקר חמש מאות:

Segment 10
HE:
ותכון העבודה ויעמדו הכהנים על עמדם והלוים על מחלקותם כמצות המלך:

Segment 11
HE:
וישחטו הפסח ויזרקו הכהנים מידם והלוים מפשיטים:

Segment 12
HE:
ויסירו העלה לתתם למפלגות לבית אבות לבני העם להקריב ליהוה ככתוב בספר משה וכן לבקר:

Segment 13
HE:
ויבשלו הפסח באש כמשפט והקדשים בשלו בסירות ובדודים ובצלחות ויריצו לכל בני העם:

Segment 14
HE:
ואחר הכינו להם ולכהנים כי הכהנים בני אהרן בהעלות העולה והחלבים עד לילה והלוים הכינו להם ולכהנים בני אהרן:

Segment 15
HE:
והמשררים בני אסף על מעמדם כמצות דויד ואסף והימן וידתון חוזה המלך והשערים לשער ושער אין להם לסור מעל עבדתם כי אחיהם הלוים הכינו להם:

Segment 16
HE:
ותכון כל עבודת יהוה ביום ההוא לעשות הפסח והעלות עלות על מזבח יהוה כמצות המלך יאשיהו:

Segment 17
HE:
ויעשו בני ישראל הנמצאים את הפסח בעת ההיא ואת חג המצות שבעת ימים:

Segment 18
HE:
ולא נעשה פסח כמהו בישראל מימי שמואל הנביא וכל מלכי ישראל לא עשו כפסח אשר עשה יאשיהו והכהנים והלוים וכל יהודה וישראל הנמצא ויושבי ירושלם: (ס)

Segment 19
HE:
בשמונה עשרה שנה למלכות יאשיהו נעשה הפסח הזה:

Segment 20
HE:
אחרי כל זאת אשר הכין יאשיהו את הבית עלה נכו מלך מצרים להלחם בכרכמיש על פרת ויצא לקראתו יאשיהו:

Segment 21
HE:
וישלח אליו מלאכים לאמר מה לי ולך מלך יהודה לא עליך אתה היום כי אל בית מלחמתי ואלהים אמר לבהלני חדל לך מאלהים אשר עמי ואל ישחיתך:

Segment 22
HE:
ולא הסב יאשיהו פניו ממנו כי להלחם בו התחפש ולא שמע אל דברי נכו מפי אלהים ויבא להלחם בבקעת מגדו:

Segment 23
HE:
וירו הירים למלך יאשיהו ויאמר המלך לעבדיו העבירוני כי החליתי מאד:

Segment 24
HE:
ויעבירהו עבדיו מן המרכבה וירכיבהו על רכב המשנה אשר לו ויוליכהו ירושלם וימת ויקבר בקברות אבתיו וכל יהודה וירושלם מתאבלים על יאשיהו: (פ)

Segment 25
HE:
ויקונן ירמיהו על יאשיהו ויאמרו כל השרים והשרות בקינותיהם על יאשיהו עד היום ויתנום לחק על ישראל והנם כתובים על הקינות:

Segment 26
HE:
ויתר דברי יאשיהו וחסדיו ככתוב בתורת יהוה:

Segment 27
HE:
ודבריו הראשנים והאחרנים הנם כתובים על ספר מלכי ישראל ויהודה: