Chronicles 2 Chapter 36
דברי הימים ב פרק לו
Source: https://ajew.org/reader/tanach-divrei-hayamim-b/1/36

Segment 1
HE:
ויקחו עם הארץ את יהואחז בן יאשיהו וימליכהו תחת אביו בירושלם:

Segment 2
HE:
בן שלוש ועשרים שנה יואחז במלכו ושלשה חדשים מלך בירושלם:

Segment 3
HE:
ויסירהו מלך מצרים בירושלם ויענש את הארץ מאה ככר כסף וככר זהב:

Segment 4
HE:
וימלך מלך מצרים את אליקים אחיו על יהודה וירושלם ויסב את שמו יהויקים ואת יואחז אחיו לקח נכו ויביאהו מצרימה: (פ)

Segment 5
HE:
בן עשרים וחמש שנה יהויקים במלכו ואחת עשרה שנה מלך בירושלם ויעש הרע בעיני יהוה אלהיו:

Segment 6
HE:
עליו עלה נבוכדנאצר מלך בבל ויאסרהו בנחשתים להליכו בבלה:

Segment 7
HE:
ומכלי בית יהוה הביא נבוכדנאצר לבבל ויתנם בהיכלו בבבל:

Segment 8
HE:
ויתר דברי יהויקים ותעבתיו אשר עשה והנמצא עליו הנם כתובים על ספר מלכי ישראל ויהודה וימלך יהויכין בנו תחתיו: (פ)

Segment 9
HE:
בן שמונה שנים יהויכין במלכו ושלשה חדשים ועשרת ימים מלך בירושלם ויעש הרע בעיני יהוה:

Segment 10
HE:
ולתשובת השנה שלח המלך נבוכדנאצר ויבאהו בבלה עם כלי חמדת בית יהוה וימלך את צדקיהו אחיו על יהודה וירושלם: (פ)

Segment 11
HE:
בן עשרים ואחת שנה צדקיהו במלכו ואחת עשרה שנה מלך בירושלם:

Segment 12
HE:
ויעש הרע בעיני יהוה אלהיו לא נכנע מלפני ירמיהו הנביא מפי יהוה:

Segment 13
HE:
וגם במלך נבוכדנאצר מרד אשר השביעו באלהים ויקש את ערפו ויאמץ את לבבו משוב אל יהוה אלהי ישראל:

Segment 14
HE:
גם כל שרי הכהנים והעם הרבו (למעול) למעל מעל ככל תעבות הגוים ויטמאו את בית יהוה אשר הקדיש בירושלם:

Segment 15
HE:
וישלח יהוה אלהי אבותיהם עליהם ביד מלאכיו השכם ושלוח כי חמל על עמו ועל מעונו:

Segment 16
HE:
ויהיו מלעבים במלאכי האלהים ובוזים דבריו ומתעתעים בנבאיו עד עלות חמת יהוה בעמו עד לאין מרפא:

Segment 17
HE:
ויעל עליהם את מלך (כשדיים) כשדים ויהרג בחוריהם בחרב בבית מקדשם ולא חמל על בחור ובתולה זקן וישש הכל נתן בידו:

Segment 18
HE:
וכל כלי בית האלהים הגדלים והקטנים ואצרות בית יהוה ואצרות המלך ושריו הכל הביא בבל:

Segment 19
HE:
וישרפו את בית האלהים וינתצו את חומת ירושלם וכל ארמנותיה שרפו באש וכל כלי מחמדיה להשחית:

Segment 20
HE:
ויגל השארית מן החרב אל בבל ויהיו לו ולבניו לעבדים עד מלך מלכות פרס:

Segment 21
HE:
למלאות דבר יהוה בפי ירמיהו עד רצתה הארץ את שבתותיה כל ימי השמה שבתה למלאות שבעים שנה: (ס)

Segment 22
HE:
ובשנת אחת לכורש מלך פרס לכלות דבר יהוה בפי ירמיהו העיר יהוה את רוח כורש מלך פרס ויעבר קול בכל מלכותו וגם במכתב לאמר: (ס)

Segment 23
HE:
כה אמר כורש מלך פרס כל ממלכות הארץ נתן לי יהוה אלהי השמים והוא פקד עלי לבנות לו בית בירושלם אשר ביהודה מי בכם מכל עמו יהוה אלהיו עמו ויעל: (פפפ)