Chronicles 2 Chapter 5
דברי הימים ב פרק ה
Source: https://ajew.org/reader/tanach-divrei-hayamim-b/1/5

Segment 1
HE:
ותשלם כל המלאכה אשר עשה שלמה לבית יהוה (ס) ויבא שלמה את קדשי דויד אביו ואת הכסף ואת הזהב ואת כל הכלים נתן באצרות בית האלהים: (פ)

Segment 2
HE:
אז יקהיל שלמה את זקני ישראל ואת כל ראשי המטות נשיאי האבות לבני ישראל אל ירושלם להעלות את ארון ברית יהוה מעיר דויד היא ציון:

Segment 3
HE:
ויקהלו אל המלך כל איש ישראל בחג הוא החדש השבעי:

Segment 4
HE:
ויבאו כל זקני ישראל וישאו הלוים את הארון:

Segment 5
HE:
ויעלו את הארון ואת אהל מועד ואת כל כלי הקדש אשר באהל העלו אתם הכהנים הלוים:

Segment 6
HE:
והמלך שלמה וכל עדת ישראל הנועדים עליו לפני הארון מזבחים צאן ובקר אשר לא יספרו ולא ימנו מרב:

Segment 7
HE:
ויביאו הכהנים את ארון ברית יהוה אל מקומו אל דביר הבית אל קדש הקדשים אל תחת כנפי הכרובים:

Segment 8
HE:
ויהיו הכרובים פרשים כנפים על מקום הארון ויכסו הכרובים על הארון ועל בדיו מלמעלה:

Segment 9
HE:
ויאריכו הבדים ויראו ראשי הבדים מן הארון על פני הדביר ולא יראו החוצה ויהי שם עד היום הזה:

Segment 10
HE:
אין בארון רק שני הלחות אשר נתן משה בחרב אשר כרת יהוה עם בני ישראל בצאתם ממצרים: (פ)

Segment 11
HE:
ויהי בצאת הכהנים מן הקדש כי כל הכהנים הנמצאים התקדשו אין לשמור למחלקות:

Segment 12
HE:
והלוים המשררים לכלם לאסף להימן לידתון ולבניהם ולאחיהם מלבשים בוץ במצלתים ובנבלים וכנרות עמדים מזרח למזבח ועמהם כהנים למאה ועשרים (מחצררים) מחצרים בחצצרות:

Segment 13
HE:
ויהי כאחד (למחצצרים) למחצרים ולמשררים להשמיע קול אחד להלל ולהדות ליהוה וכהרים קול בחצצרות ובמצלתים ובכלי השיר ובהלל ליהוה כי טוב כי לעולם חסדו והבית מלא ענן בית יהוה:

Segment 14
HE:
ולא יכלו הכהנים לעמוד לשרת מפני הענן כי מלא כבוד יהוה את בית האלהים: (פ)