Chronicles 2 Chapter 8
דברי הימים ב פרק ח
Source: https://ajew.org/reader/tanach-divrei-hayamim-b/1/8

Segment 1
HE:
ויהי מקץ עשרים שנה אשר בנה שלמה את בית יהוה ואת ביתו:

Segment 2
HE:
והערים אשר נתן חורם לשלמה בנה שלמה אתם ויושב שם את בני ישראל:

Segment 3
HE:
וילך שלמה חמת צובה ויחזק עליה:

Segment 4
HE:
ויבן את תדמר במדבר ואת כל ערי המסכנות אשר בנה בחמת:

Segment 5
HE:
ויבן את בית חורון העליון ואת בית חורון התחתון ערי מצור חומות דלתים ובריח:

Segment 6
HE:
ואת בעלת ואת כל ערי המסכנות אשר היו לשלמה ואת כל ערי הרכב ואת ערי הפרשים ואת כל חשק שלמה אשר חשק לבנות בירושלם ובלבנון ובכל ארץ ממשלתו:

Segment 7
HE:
כל העם הנותר מן החתי והאמרי והפרזי והחוי והיבוסי אשר לא מישראל המה:

Segment 8
HE:
מן בניהם אשר נותרו אחריהם בארץ אשר לא כלום בני ישראל ויעלם שלמה למס עד היום הזה:

Segment 9
HE:
ומן בני ישראל אשר לא נתן שלמה לעבדים למלאכתו כי המה אנשי מלחמה ושרי שלישיו ושרי רכבו ופרשיו: (פ)

Segment 10
HE:
ואלה שרי (הנציבים) הנצבים אשר למלך שלמה חמשים ומאתים הרדים בעם:

Segment 11
HE:
ואת בת פרעה העלה שלמה מעיר דויד לבית אשר בנה לה כי אמר לא תשב אשה לי בבית דויד מלך ישראל כי קדש המה אשר באה אליהם ארון יהוה: (פ)

Segment 12
HE:
אז העלה שלמה עלות ליהוה על מזבח יהוה אשר בנה לפני האולם:

Segment 13
HE:
ובדבר יום ביום להעלות כמצות משה לשבתות ולחדשים ולמועדות שלוש פעמים בשנה בחג המצות ובחג השבעות ובחג הסכות:

Segment 14
HE:
ויעמד כמשפט דויד אביו את מחלקות הכהנים על עבדתם והלוים על משמרותם להלל ולשרת נגד הכהנים לדבר יום ביומו והשוערים במחלקותם לשער ושער כי כן מצות דויד איש האלהים:

Segment 15
HE:
ולא סרו מצות המלך על הכהנים והלוים לכל דבר ולאצרות:

Segment 16
HE:
ותכן כל מלאכת שלמה עד היום מוסד בית יהוה ועד כלתו שלם בית יהוה: (ס)

Segment 17
HE:
אז הלך שלמה לעציון גבר ואל אילות על שפת הים בארץ אדום:

Segment 18
HE:
וישלח לו חורם ביד עבדיו (אוניות) אניות ועבדים יודעי ים ויבאו עם עבדי שלמה אופירה ויקחו משם ארבע מאות וחמשים ככר זהב ויביאו אל המלך שלמה: (פ)