Chronicles 2 Chapter 9
דברי הימים ב פרק ט
Source: https://ajew.org/reader/tanach-divrei-hayamim-b/1/9

Segment 1
HE:
ומלכת שבא שמעה את שמע שלמה ותבוא לנסות את שלמה בחידות בירושלם בחיל כבד מאד וגמלים נשאים בשמים וזהב לרב ואבן יקרה ותבוא אל שלמה ותדבר עמו את כל אשר היה עם לבבה:

Segment 2
HE:
ויגד לה שלמה את כל דבריה ולא נעלם דבר משלמה אשר לא הגיד לה:

Segment 3
HE:
ותרא מלכת שבא את חכמת שלמה והבית אשר בנה:

Segment 4
HE:
ומאכל שלחנו ומושב עבדיו ומעמד משרתיו ומלבושיהם ומשקיו ומלבושיהם ועליתו אשר יעלה בית יהוה ולא היה עוד בה רוח:

Segment 5
HE:
ותאמר אל המלך אמת הדבר אשר שמעתי בארצי על דבריך ועל חכמתך:

Segment 6
HE:
ולא האמנתי לדבריהם עד אשר באתי ותראינה עיני והנה לא הגד לי חצי מרבית חכמתך יספת על השמועה אשר שמעתי:

Segment 7
HE:
אשרי אנשיך ואשרי עבדיך אלה העמדים לפניך תמיד ושמעים את חכמתך:

Segment 8
HE:
יהי יהוה אלהיך ברוך אשר חפץ בך לתתך על כסאו למלך ליהוה אלהיך באהבת אלהיך את ישראל להעמידו לעולם ויתנך עליהם למלך לעשות משפט וצדקה:

Segment 9
HE:
ותתן למלך מאה ועשרים ככר זהב ובשמים לרב מאד ואבן יקרה ולא היה כבשם ההוא אשר נתנה מלכת שבא למלך שלמה:

Segment 10
HE:
וגם עבדי (חירם) חורם ועבדי שלמה אשר הביאו זהב מאופיר הביאו עצי אלגומים ואבן יקרה:

Segment 11
HE:
ויעש המלך את עצי האלגומים מסלות לבית יהוה ולבית המלך וכנרות ונבלים לשרים ולא נראו כהם לפנים בארץ יהודה:

Segment 12
HE:
והמלך שלמה נתן למלכת שבא את כל חפצה אשר שאלה מלבד אשר הביאה אל המלך ותהפך ותלך לארצה היא ועבדיה: (פ)

Segment 13
HE:
ויהי משקל הזהב אשר בא לשלמה בשנה אחת שש מאות וששים ושש ככרי זהב:

Segment 14
HE:
לבד מאנשי התרים והסחרים מביאים וכל מלכי ערב ופחות הארץ מביאים זהב וכסף לשלמה:

Segment 15
HE:
ויעש המלך שלמה מאתים צנה זהב שחוט שש מאות זהב שחוט יעלה על הצנה האחת:

Segment 16
HE:
ושלש מאות מגנים זהב שחוט שלש מאות זהב יעלה על המגן האחת ויתנם המלך בבית יער הלבנון:

Segment 17
HE:
ויעש המלך כסא שן גדול ויצפהו זהב טהור:

Segment 18
HE:
ושש מעלות לכסא וכבש בזהב לכסא מאחזים וידות מזה ומזה על מקום השבת ושנים אריות עמדים אצל הידות:

Segment 19
HE:
ושנים עשר אריות עמדים שם על שש המעלות מזה ומזה לא נעשה כן לכל ממלכה:

Segment 20
HE:
וכל כלי משקה המלך שלמה זהב וכל כלי בית יער הלבנון זהב סגור אין כסף נחשב בימי שלמה למאומה:

Segment 21
HE:
כי אניות למלך הלכות תרשיש עם עבדי חורם אחת לשלוש שנים תבואנה אניות תרשיש נשאות זהב וכסף שנהבים וקופים ותוכיים: (פ)

Segment 22
HE:
ויגדל המלך שלמה מכל מלכי הארץ לעשר וחכמה:

Segment 23
HE:
וכל מלכי הארץ מבקשים את פני שלמה לשמע את חכמתו אשר נתן האלהים בלבו:

Segment 24
HE:
והם מביאים איש מנחתו כלי כסף וכלי זהב ושלמות נשק ובשמים סוסים ופרדים דבר שנה בשנה: (ס)

Segment 25
HE:
ויהי לשלמה ארבעת אלפים אריות סוסים ומרכבות ושנים עשר אלף פרשים ויניחם בערי הרכב ועם המלך בירושלם:

Segment 26
HE:
ויהי מושל בכל המלכים מן הנהר ועד ארץ פלשתים ועד גבול מצרים:

Segment 27
HE:
ויתן המלך את הכסף בירושלם כאבנים ואת הארזים נתן כשקמים אשר בשפלה לרב:

Segment 28
HE:
ומוציאים סוסים ממצרים לשלמה ומכל הארצות:

Segment 29
HE:
ושאר דברי שלמה הראשנים והאחרונים הלא הם כתובים על דברי נתן הנביא ועל נבואת אחיה השילוני ובחזות (יעדי) יעדו החזה על ירבעם בן נבט:

Segment 30
HE:
וימלך שלמה בירושלם על כל ישראל ארבעים שנה:

Segment 31
HE:
וישכב שלמה עם אבתיו ויקברהו בעיר דויד אביו וימלך רחבעם בנו תחתיו: (פ)