Kings 1 Chapter 16
מלכים א פרק טז
Source: https://ajew.org/reader/tanach-melachim-a/1/16

Segment 1
HE:
ויהי דבר יהוה אל יהוא בן חנני על בעשא לאמר:

Segment 2
HE:
יען אשר הרימתיך מן העפר ואתנך נגיד על עמי ישראל ותלך בדרך ירבעם ותחטא את עמי ישראל להכעיסני בחטאתם:

Segment 3
HE:
הנני מבעיר אחרי בעשא ואחרי ביתו ונתתי את ביתך כבית ירבעם בן נבט:

Segment 4
HE:
המת לבעשא בעיר יאכלו הכלבים והמת לו בשדה יאכלו עוף השמים:

Segment 5
HE:
ויתר דברי בעשא ואשר עשה וגבורתו הלא הם כתובים על ספר דברי הימים למלכי ישראל:

Segment 6
HE:
וישכב בעשא עם אבתיו ויקבר בתרצה וימלך אלה בנו תחתיו:

Segment 7
HE:
וגם ביד יהוא בן חנני הנביא דבר יהוה היה אל בעשא ואל ביתו ועל כל הרעה אשר עשה בעיני יהוה להכעיסו במעשה ידיו להיות כבית ירבעם ועל אשר הכה אתו: (פ)

Segment 8
HE:
בשנת עשרים ושש שנה לאסא מלך יהודה מלך אלה בן בעשא על ישראל בתרצה שנתים:

Segment 9
HE:
ויקשר עליו עבדו זמרי שר מחצית הרכב והוא בתרצה שתה שכור בית ארצא אשר על הבית בתרצה:

Segment 10
HE:
ויבא זמרי ויכהו וימיתהו בשנת עשרים ושבע לאסא מלך יהודה וימלך תחתיו:

Segment 11
HE:
ויהי במלכו כשבתו על כסאו הכה את כל בית בעשא לא השאיר לו משתין בקיר וגאליו ורעהו:

Segment 12
HE:
וישמד זמרי את כל בית בעשא כדבר יהוה אשר דבר אל בעשא ביד יהוא הנביא:

Segment 13
HE:
אל כל חטאות בעשא וחטאות אלה בנו אשר חטאו ואשר החטיאו את ישראל להכעיס את יהוה אלהי ישראל בהבליהם:

Segment 14
HE:
ויתר דברי אלה וכל אשר עשה הלוא הם כתובים על ספר דברי הימים למלכי ישראל: (פ)

Segment 15
HE:
בשנת עשרים ושבע שנה לאסא מלך יהודה מלך זמרי שבעת ימים בתרצה והעם חנים על גבתון אשר לפלשתים:

Segment 16
HE:
וישמע העם החנים לאמר קשר זמרי וגם הכה את המלך וימלכו כל ישראל את עמרי שר צבא על ישראל ביום ההוא במחנה:

Segment 17
HE:
ויעלה עמרי וכל ישראל עמו מגבתון ויצרו על תרצה:

Segment 18
HE:
ויהי כראות זמרי כי נלכדה העיר ויבא אל ארמון בית המלך וישרף עליו את בית מלך באש וימת:

Segment 19
HE:
על (חטאתו) חטאתיו אשר חטא לעשות הרע בעיני יהוה ללכת בדרך ירבעם ובחטאתו אשר עשה להחטיא את ישראל:

Segment 20
HE:
ויתר דברי זמרי וקשרו אשר קשר הלא הם כתובים על ספר דברי הימים למלכי ישראל: (פ)

Segment 21
HE:
אז יחלק העם ישראל לחצי חצי העם היה אחרי תבני בן גינת להמליכו והחצי אחרי עמרי:

Segment 22
HE:
ויחזק העם אשר אחרי עמרי את העם אשר אחרי תבני בן גינת וימת תבני וימלך עמרי: (פ)

Segment 23
HE:
בשנת שלשים ואחת שנה לאסא מלך יהודה מלך עמרי על ישראל שתים עשרה שנה בתרצה מלך שש שנים:

Segment 24
HE:
ויקן את ההר שמרון מאת שמר בככרים כסף ויבן את ההר ויקרא את שם העיר אשר בנה על שם שמר אדני ההר שמרון:

Segment 25
HE:
ויעשה עמרי הרע בעיני יהוה וירע מכל אשר לפניו:

Segment 26
HE:
וילך בכל דרך ירבעם בן נבט (ובחטאתיו) ובחטאתו אשר החטיא את ישראל להכעיס את יהוה אלהי ישראל בהבליהם:

Segment 27
HE:
ויתר דברי עמרי אשר עשה וגבורתו אשר עשה הלא הם כתובים על ספר דברי הימים למלכי ישראל:

Segment 28
HE:
וישכב עמרי עם אבתיו ויקבר בשמרון וימלך אחאב בנו תחתיו: (פ)

Segment 29
HE:
ואחאב בן עמרי מלך על ישראל בשנת שלשים ושמנה שנה לאסא מלך יהודה וימלך אחאב בן עמרי על ישראל בשמרון עשרים ושתים שנה:

Segment 30
HE:
ויעש אחאב בן עמרי הרע בעיני יהוה מכל אשר לפניו:

Segment 31
HE:
ויהי הנקל לכתו בחטאות ירבעם בן נבט ויקח אשה את איזבל בת אתבעל מלך צידנים וילך ויעבד את הבעל וישתחו לו:

Segment 32
HE:
ויקם מזבח לבעל בית הבעל אשר בנה בשמרון:

Segment 33
HE:
ויעש אחאב את האשרה ויוסף אחאב לעשות להכעיס את יהוה אלהי ישראל מכל מלכי ישראל אשר היו לפניו:

Segment 34
HE:
בימיו בנה חיאל בית האלי את יריחה באבירם בכרו יסדה (ובשגיב) ובשגוב צעירו הציב דלתיה כדבר יהוה אשר דבר ביד יהושע בן נון: (ס)