Kings 1 Chapter 5
מלכים א פרק ה
Source: https://ajew.org/reader/tanach-melachim-a/1/5

Segment 1
HE:
ושלמה היה מושל בכל הממלכות מן הנהר ארץ פלשתים ועד גבול מצרים מגשים מנחה ועבדים את שלמה כל ימי חייו: (פ)

Segment 2
HE:
ויהי לחם שלמה ליום אחד שלשים כר סלת וששים כר קמח:

Segment 3
HE:
עשרה בקר בראים ועשרים בקר רעי ומאה צאן לבד מאיל וצבי ויחמור וברברים אבוסים:

Segment 4
HE:
כי הוא רדה בכל עבר הנהר מתפסח ועד עזה בכל מלכי עבר הנהר ושלום היה לו מכל עבריו מסביב:

Segment 5
HE:
וישב יהודה וישראל לבטח איש תחת גפנו ותחת תאנתו מדן ועד באר שבע כל ימי שלמה: (ס)

Segment 6
HE:
ויהי לשלמה ארבעים אלף ארות סוסים למרכבו ושנים עשר אלף פרשים:

Segment 7
HE:
וכלכלו הנצבים האלה את המלך שלמה ואת כל הקרב אל שלחן המלך שלמה איש חדשו לא יעדרו דבר:

Segment 8
HE:
והשערים והתבן לסוסים ולרכש יבאו אל המקום אשר יהיה שם איש כמשפטו: (ס)

Segment 9
HE:
ויתן אלהים חכמה לשלמה ותבונה הרבה מאד ורחב לב כחול אשר על שפת הים:

Segment 10
HE:
ותרב חכמת שלמה מחכמת כל בני קדם ומכל חכמת מצרים:

Segment 11
HE:
ויחכם מכל האדם מאיתן האזרחי והימן וכלכל ודרדע בני מחול ויהי שמו בכל הגוים סביב:

Segment 12
HE:
וידבר שלשת אלפים משל ויהי שירו חמשה ואלף:

Segment 13
HE:
וידבר על העצים מן הארז אשר בלבנון ועד האזוב אשר יצא בקיר וידבר על הבהמה ועל העוף ועל הרמש ועל הדגים:

Segment 14
HE:
ויבאו מכל העמים לשמע את חכמת שלמה מאת כל מלכי הארץ אשר שמעו את חכמתו: (ס)

Segment 15
HE:
וישלח חירם מלך צור את עבדיו אל שלמה כי שמע כי אתו משחו למלך תחת אביהו כי אהב היה חירם לדוד כל הימים: (ס)

Segment 16
HE:
וישלח שלמה אל חירם לאמר:

Segment 17
HE:
אתה ידעת את דוד אבי כי לא יכל לבנות בית לשם יהוה אלהיו מפני המלחמה אשר סבבהו עד תת יהוה אתם תחת כפות (רגלו) רגלי:

Segment 18
HE:
ועתה הניח יהוה אלהי לי מסביב אין שטן ואין פגע רע:

Segment 19
HE:
והנני אמר לבנות בית לשם יהוה אלהי כאשר דבר יהוה אל דוד אבי לאמר בנך אשר אתן תחתיך על כסאך הוא יבנה הבית לשמי:

Segment 20
HE:
ועתה צוה ויכרתו לי ארזים מן הלבנון ועבדי יהיו עם עבדיך ושכר עבדיך אתן לך ככל אשר תאמר כי אתה ידעת כי אין בנו איש ידע לכרת עצים כצדנים:

Segment 21
HE:
ויהי כשמע חירם את דברי שלמה וישמח מאד ויאמר ברוך יהוה היום אשר נתן לדוד בן חכם על העם הרב הזה:

Segment 22
HE:
וישלח חירם אל שלמה לאמר שמעתי את אשר שלחת אלי אני אעשה את כל חפצך בעצי ארזים ובעצי ברושים:

Segment 23
HE:
עבדי ירדו מן הלבנון ימה ואני אשימם דברות בים עד המקום אשר תשלח אלי ונפצתים שם ואתה תשא ואתה תעשה את חפצי לתת לחם ביתי:

Segment 24
HE:
ויהי חירום נתן לשלמה עצי ארזים ועצי ברושים כל חפצו:

Segment 25
HE:
ושלמה נתן לחירם עשרים אלף כר חטים מכלת לביתו ועשרים כר שמן כתית כה יתן שלמה לחירם שנה בשנה: (פ)

Segment 26
HE:
ויהוה נתן חכמה לשלמה כאשר דבר לו ויהי שלם בין חירם ובין שלמה ויכרתו ברית שניהם:

Segment 27
HE:
ויעל המלך שלמה מס מכל ישראל ויהי המס שלשים אלף איש:

Segment 28
HE:
וישלחם לבנונה עשרת אלפים בחדש חליפות חדש יהיו בלבנון שנים חדשים בביתו ואדנירם על המס: (ס)

Segment 29
HE:
ויהי לשלמה שבעים אלף נשא סבל ושמנים אלף חצב בהר:

Segment 30
HE:
לבד משרי הנצבים לשלמה אשר על המלאכה שלשת אלפים ושלש מאות הרדים בעם העשים במלאכה:

Segment 31
HE:
ויצו המלך ויסעו אבנים גדלות אבנים יקרות ליסד הבית אבני גזית:

Segment 32
HE:
ויפסלו בני שלמה ובני חירום והגבלים ויכינו העצים והאבנים לבנות הבית: (פ)