Kings 2 Chapter 11
מלכים ב פרק יא
Source: https://ajew.org/reader/tanach-melachim-b/1/11

Segment 1
HE:
ועתליה אם אחזיהו (וראתה) ראתה כי מת בנה ותקם ותאבד את כל זרע הממלכה:

Segment 2
HE:
ותקח יהושבע בת המלך יורם אחות אחזיהו את יואש בן אחזיה ותגנב אתו מתוך בני המלך (הממותתים) המומתים אתו ואת מינקתו בחדר המטות ויסתרו אתו מפני עתליהו ולא הומת:

Segment 3
HE:
ויהי אתה בית יהוה מתחבא שש שנים ועתליה מלכת על הארץ: (פ)

Segment 4
HE:
ובשנה השביעית שלח יהוידע ויקח את שרי (המאיות) המאות לכרי ולרצים ויבא אתם אליו בית יהוה ויכרת להם ברית וישבע אתם בבית יהוה וירא אתם את בן המלך:

Segment 5
HE:
ויצום לאמר זה הדבר אשר תעשון השלשית מכם באי השבת ושמרי משמרת בית המלך:

Segment 6
HE:
והשלשית בשער סור והשלשית בשער אחר הרצים ושמרתם את משמרת הבית מסח:

Segment 7
HE:
ושתי הידות בכם כל יצאי השבת ושמרו את משמרת בית יהוה אל המלך:

Segment 8
HE:
והקפתם על המלך סביב איש וכליו בידו והבא אל השדרות יומת והיו את המלך בצאתו ובבאו:

Segment 9
HE:
ויעשו שרי (המאיות) המאות ככל אשר צוה יהוידע הכהן ויקחו איש את אנשיו באי השבת עם יצאי השבת ויבאו אל יהוידע הכהן:

Segment 10
HE:
ויתן הכהן לשרי (המאיות) המאות את החנית ואת השלטים אשר למלך דוד אשר בבית יהוה:

Segment 11
HE:
ויעמדו הרצים איש וכליו בידו מכתף הבית הימנית עד כתף הבית השמאלית למזבח ולבית על המלך סביב:

Segment 12
HE:
ויוצא את בן המלך ויתן עליו את הנזר ואת העדות וימלכו אתו וימשחהו ויכו כף ויאמרו יחי המלך: (ס)

Segment 13
HE:
ותשמע עתליה את קול הרצין העם ותבא אל העם בית יהוה:

Segment 14
HE:
ותרא והנה המלך עמד על העמוד כמשפט והשרים והחצצרות אל המלך וכל עם הארץ שמח ותקע בחצצרות ותקרע עתליה את בגדיה ותקרא קשר קשר: (ס)

Segment 15
HE:
ויצו יהוידע הכהן את שרי (המיאות) המאות פקדי החיל ויאמר אליהם הוציאו אתה אל מבית לשדרת והבא אחריה המת בחרב כי אמר הכהן אל תומת בית יהוה:

Segment 16
HE:
וישמו לה ידים ותבוא דרך מבוא הסוסים בית המלך ותומת שם: (ס)

Segment 17
HE:
ויכרת יהוידע את הברית בין יהוה ובין המלך ובין העם להיות לעם ליהוה ובין המלך ובין העם:

Segment 18
HE:
ויבאו כל עם הארץ בית הבעל ויתצהו את (מזבחתו) מזבחתיו ואת צלמיו שברו היטב ואת מתן כהן הבעל הרגו לפני המזבחות וישם הכהן פקדות על בית יהוה:

Segment 19
HE:
ויקח את שרי המאות ואת הכרי ואת הרצים ואת כל עם הארץ וירידו את המלך מבית יהוה ויבואו דרך שער הרצים בית המלך וישב על כסא המלכים:

Segment 20
HE:
וישמח כל עם הארץ והעיר שקטה ואת עתליהו המיתו בחרב בית (מלך) המלך: (ס)