Exodus Chapter 14
שמות פרק יד
Source: https://ajew.org/reader/tanach-shemos/1/14

Segment 1
HE:
וידבר יהוה אל משה לאמר:

Segment 2
HE:
דבר אל בני ישראל וישבו ויחנו לפני פי החירת בין מגדל ובין הים לפני בעל צפן נכחו תחנו על הים:

Segment 3
HE:
ואמר פרעה לבני ישראל נבכים הם בארץ סגר עליהם המדבר:

Segment 4
HE:
וחזקתי את לב פרעה ורדף אחריהם ואכבדה בפרעה ובכל חילו וידעו מצרים כי אני יהוה ויעשו כן:

Segment 5
HE:
ויגד למלך מצרים כי ברח העם ויהפך לבב פרעה ועבדיו אל העם ויאמרו מה זאת עשינו כי שלחנו את ישראל מעבדנו:

Segment 6
HE:
ויאסר את רכבו ואת עמו לקח עמו:

Segment 7
HE:
ויקח שש מאות רכב בחור וכל רכב מצרים ושלשם על כלו:

Segment 8
HE:
ויחזק יהוה את לב פרעה מלך מצרים וירדף אחרי בני ישראל ובני ישראל יצאים ביד רמה:

Segment 9
HE:
שני  וירדפו מצרים אחריהם וישיגו אותם חנים על הים כל סוס רכב פרעה ופרשיו וחילו על פי החירת לפני בעל צפן:

Segment 10
HE:
ופרעה הקריב וישאו בני ישראל את עיניהם והנה מצרים נסע אחריהם וייראו מאד ויצעקו בני ישראל אל יהוה:

Segment 11
HE:
ויאמרו אל משה המבלי אין קברים במצרים לקחתנו למות במדבר מה זאת עשית לנו להוציאנו ממצרים:

Segment 12
HE:
הלא זה הדבר אשר דברנו אליך במצרים לאמר חדל ממנו ונעבדה את מצרים כי טוב לנו עבד את מצרים ממתנו במדבר:

Segment 13
HE:
ויאמר משה אל העם אל תיראו התיצבו וראו את ישועת יהוה אשר יעשה לכם היום כי אשר ראיתם את מצרים היום לא תספו לראתם עוד עד עולם:

Segment 14
HE:
יהוה ילחם לכם ואתם תחרשון: (פ)

Segment 15
HE:
שלישי  ויאמר יהוה אל משה מה תצעק אלי דבר אל בני ישראל ויסעו:

Segment 16
HE:
ואתה הרם את מטך ונטה את ידך על הים ובקעהו ויבאו בני ישראל בתוך הים ביבשה:

Segment 17
HE:
ואני הנני מחזק את לב מצרים ויבאו אחריהם ואכבדה בפרעה ובכל חילו ברכבו ובפרשיו:

Segment 18
HE:
וידעו מצרים כי אני יהוה בהכבדי בפרעה ברכבו ובפרשיו:

Segment 19
HE:
ויסע מלאך האלהים ההלך לפני מחנה ישראל וילך מאחריהם ויסע עמוד הענן מפניהם ויעמד מאחריהם:

Segment 20
HE:
ויבא בין מחנה מצרים ובין מחנה ישראל ויהי הענן והחשך ויאר את הלילה ולא קרב זה אל זה כל הלילה:

Segment 21
HE:
ויט משה את ידו על הים ויולך יהוה את הים ברוח קדים עזה כל הלילה וישם את הים לחרבה ויבקעו המים:

Segment 22
HE:
ויבאו בני ישראל בתוך הים ביבשה והמים להם חומה מימינם ומשמאלם:

Segment 23
HE:
וירדפו מצרים ויבאו אחריהם כל סוס פרעה רכבו ופרשיו אל תוך הים:

Segment 24
HE:
ויהי באשמרת הבקר וישקף יהוה אל מחנה מצרים בעמוד אש וענן ויהם את מחנה מצרים:

Segment 25
HE:
ויסר את אפן מרכבתיו וינהגהו בכבדת ויאמר מצרים אנוסה מפני ישראל כי יהוה נלחם להם במצרים (פ)

Segment 26
HE:
רביעי  ויאמר יהוה אל משה נטה את ידך על הים וישבו המים על מצרים על רכבו ועל פרשיו:

Segment 27
HE:
ויט משה את ידו על הים וישב הים לפנות בקר לאיתנו ומצרים נסים לקראתו וינער יהוה את מצרים בתוך הים:

Segment 28
HE:
וישבו המים ויכסו את הרכב ואת הפרשים לכל חיל פרעה הבאים אחריהם בים לא נשאר בהם עד אחד:

Segment 29
HE:
ובני ישראל הלכו ביבשה בתוך הים והמים להם חמה מימינם ומשמאלם

Segment 30
HE:
ויושע יהוה ביום ההוא את ישראל מיד מצרים וירא ישראל את מצרים מת על שפת הים:

Segment 31
HE:
וירא ישראל את היד הגדלה אשר עשה יהוה במצרים וייראו העם את יהוה ויאמינו ביהוה ובמשה עבדו: (פ)