Exodus Chapter 16
שמות פרק טז
Source: https://ajew.org/reader/tanach-shemos/1/16

Segment 1
HE:
ויסעו מאילם ויבאו כל עדת בני ישראל אל מדבר סין אשר בין אילם ובין סיני בחמשה עשר יום לחדש השני לצאתם מארץ מצרים:

Segment 2
HE:
(וילינו) וילונו כל עדת בני ישראל על משה ועל אהרן במדבר:

Segment 3
HE:
ויאמרו אלהם בני ישראל מי יתן מותנו ביד יהוה בארץ מצרים בשבתנו על סיר הבשר באכלנו לחם לשבע כי הוצאתם אתנו אל המדבר הזה להמית את כל הקהל הזה ברעב: (ס)

Segment 4
HE:
ויאמר יהוה אל משה הנני ממטיר לכם לחם מן השמים ויצא העם ולקטו דבר יום ביומו למען אנסנו הילך בתורתי אם לא:

Segment 5
HE:
והיה ביום הששי והכינו את אשר יביאו והיה משנה על אשר ילקטו יום יום:

Segment 6
HE:
ויאמר משה ואהרן אל כל בני ישראל ערב וידעתם כי יהוה הוציא אתכם מארץ מצרים:

Segment 7
HE:
ובקר וראיתם את כבוד יהוה בשמעו את תלנתיכם על יהוה ונחנו מה כי (תלונו) תלינו עלינו:

Segment 8
HE:
ויאמר משה בתת יהוה לכם בערב בשר לאכל ולחם בבקר לשבע בשמע יהוה את תלנתיכם אשר אתם מלינם עליו ונחנו מה לא עלינו תלנתיכם כי על יהוה:

Segment 9
HE:
ויאמר משה אל אהרן אמר אל כל עדת בני ישראל קרבו לפני יהוה כי שמע את תלנתיכם:

Segment 10
HE:
ויהי כדבר אהרן אל כל עדת בני ישראל ויפנו אל המדבר והנה כבוד יהוה נראה בענן: (פ)

Segment 11
HE:
שישי  וידבר יהוה אל משה לאמר:

Segment 12
HE:
שמעתי את תלונת בני ישראל דבר אלהם לאמר בין הערבים תאכלו בשר ובבקר תשבעו לחם וידעתם כי אני יהוה אלהיכם:

Segment 13
HE:
ויהי בערב ותעל השלו ותכס את המחנה ובבקר היתה שכבת הטל סביב למחנה:

Segment 14
HE:
ותעל שכבת הטל והנה על פני המדבר דק מחספס דק ככפר על הארץ:

Segment 15
HE:
ויראו בני ישראל ויאמרו איש אל אחיו מן הוא כי לא ידעו מה הוא ויאמר משה אלהם הוא הלחם אשר נתן יהוה לכם לאכלה:

Segment 16
HE:
זה הדבר אשר צוה יהוה לקטו ממנו איש לפי אכלו עמר לגלגלת מספר נפשתיכם איש לאשר באהלו תקחו:

Segment 17
HE:
ויעשו כן בני ישראל וילקטו המרבה והממעיט:

Segment 18
HE:
וימדו בעמר ולא העדיף המרבה והממעיט לא החסיר איש לפי אכלו לקטו:

Segment 19
HE:
ויאמר משה אלהם איש אל יותר ממנו עד בקר:

Segment 20
HE:
ולא שמעו אל משה ויותרו אנשים ממנו עד בקר וירם תולעים ויבאש ויקצף עלהם משה:

Segment 21
HE:
וילקטו אתו בבקר בבקר איש כפי אכלו וחם השמש ונמס:

Segment 22
HE:
ויהי ביום הששי לקטו לחם משנה שני העמר לאחד ויבאו כל נשיאי העדה ויגידו למשה:

Segment 23
HE:
ויאמר אלהם הוא אשר דבר יהוה שבתון שבת קדש ליהוה מחר את אשר תאפו אפו ואת אשר תבשלו בשלו ואת כל העדף הניחו לכם למשמרת עד הבקר:

Segment 24
HE:
ויניחו אתו עד הבקר כאשר צוה משה ולא הבאיש ורמה לא היתה בו:

Segment 25
HE:
ויאמר משה אכלהו היום כי שבת היום ליהוה היום לא תמצאהו בשדה:

Segment 26
HE:
ששת ימים תלקטהו וביום השביעי שבת לא יהיה בו:

Segment 27
HE:
ויהי ביום השביעי יצאו מן העם ללקט ולא מצאו: (ס)

Segment 28
HE:
ויאמר יהוה אל משה עד אנה מאנתם לשמר מצותי ותורתי:

Segment 29
HE:
ראו כי יהוה נתן לכם השבת על כן הוא נתן לכם ביום הששי לחם יומים שבו איש תחתיו אל יצא איש ממקמו ביום השביעי:

Segment 30
HE:
וישבתו העם ביום השבעי:

Segment 31
HE:
ויקראו בית ישראל את שמו מן והוא כזרע גד לבן וטעמו כצפיחת בדבש:

Segment 32
HE:
ויאמר משה זה הדבר אשר צוה יהוה מלא העמר ממנו למשמרת לדרתיכם למען יראו את הלחם אשר האכלתי אתכם במדבר בהוציאי אתכם מארץ מצרים:

Segment 33
HE:
ויאמר משה אל אהרן קח צנצנת אחת ותן שמה מלא העמר מן והנח אתו לפני יהוה למשמרת לדרתיכם:

Segment 34
HE:
כאשר צוה יהוה אל משה ויניחהו אהרן לפני העדת למשמרת:

Segment 35
HE:
ובני ישראל אכלו את המן ארבעים שנה עד באם אל ארץ נושבת את המן אכלו עד באם אל קצה ארץ כנען:

Segment 36
HE:
והעמר עשרית האיפה הוא: (פ)