Exodus Chapter 34
שמות פרק לד
Source: https://ajew.org/reader/tanach-shemos/1/34

Segment 1
HE:
חמישי  ויאמר יהוה אל משה פסל לך שני לחת אבנים כראשנים וכתבתי על הלחת את הדברים אשר היו על הלחת הראשנים אשר שברת:

Segment 2
HE:
והיה נכון לבקר ועלית בבקר אל הר סיני ונצבת לי שם על ראש ההר:

Segment 3
HE:
ואיש לא יעלה עמך וגם איש אל ירא בכל ההר גם הצאן והבקר אל ירעו אל מול ההר ההוא:

Segment 4
HE:
ויפסל שני לחת אבנים כראשנים וישכם משה בבקר ויעל אל הר סיני כאשר צוה יהוה אתו ויקח בידו שני לחת אבנים:

Segment 5
HE:
וירד יהוה בענן ויתיצב עמו שם ויקרא בשם יהוה:

Segment 6
HE:
ויעבר יהוה על פניו ויקרא יהוה יהוה אל רחום וחנון ארך אפים ורב חסד ואמת:

Segment 7
HE:
נצר חסד לאלפים נשא עון ופשע וחטאה ונקה לא ינקה פקד עון אבות על בנים ועל בני בנים על שלשים ועל רבעים:

Segment 8
HE:
וימהר משה ויקד ארצה וישתחו:

Segment 9
HE:
ויאמר אם נא מצאתי חן בעיניך אדני ילך נא אדני בקרבנו כי עם קשה ערף הוא וסלחת לעוננו ולחטאתנו ונחלתנו:

Segment 10
HE:
שישי  ויאמר הנה אנכי כרת ברית נגד כל עמך אעשה נפלאת אשר לא נבראו בכל הארץ ובכל הגוים וראה כל העם אשר אתה בקרבו את מעשה יהוה כי נורא הוא אשר אני עשה עמך:

Segment 11
HE:
שמר לך את אשר אנכי מצוך היום הנני גרש מפניך את האמרי והכנעני והחתי והפרזי והחוי והיבוסי:

Segment 12
HE:
השמר לך פן תכרת ברית ליושב הארץ אשר אתה בא עליה פן יהיה למוקש בקרבך:

Segment 13
HE:
כי את מזבחתם תתצון ואת מצבתם תשברון ואת אשריו תכרתון:

Segment 14
HE:
כי לא תשתחוה לאל אחר כי יהוה קנא שמו אל קנא הוא:

Segment 15
HE:
פן תכרת ברית ליושב הארץ וזנו אחרי אלהיהם וזבחו לאלהיהם וקרא לך ואכלת מזבחו:

Segment 16
HE:
ולקחת מבנתיו לבניך וזנו בנתיו אחרי אלהיהן והזנו את בניך אחרי אלהיהן:

Segment 17
HE:
אלהי מסכה לא תעשה לך:

Segment 18
HE:
את חג המצות תשמר שבעת ימים תאכל מצות אשר צויתך למועד חדש האביב כי בחדש האביב יצאת ממצרים:

Segment 19
HE:
כל פטר רחם לי וכל מקנך תזכר פטר שור ושה:

Segment 20
HE:
ופטר חמור תפדה בשה ואם לא תפדה וערפתו כל בכור בניך תפדה ולא יראו פני ריקם:

Segment 21
HE:
ששת ימים תעבד וביום השביעי תשבת בחריש ובקציר תשבת:

Segment 22
HE:
וחג שבעת תעשה לך בכורי קציר חטים וחג האסיף תקופת השנה:

Segment 23
HE:
שלש פעמים בשנה יראה כל זכורך את פני האדן יהוה אלהי ישראל:

Segment 24
HE:
כי אוריש גוים מפניך והרחבתי את גבלך ולא יחמד איש את ארצך בעלתך לראות את פני יהוה אלהיך שלש פעמים בשנה:

Segment 25
HE:
לא תשחט על חמץ דם זבחי ולא ילין לבקר זבח חג הפסח:

Segment 26
HE:
ראשית בכורי אדמתך תביא בית יהוה אלהיך לא תבשל גדי בחלב אמו: (פ)

Segment 27
HE:
שביעי  ויאמר יהוה אל משה כתב לך את הדברים האלה כי על פי הדברים האלה כרתי אתך ברית ואת ישראל:

Segment 28
HE:
ויהי שם עם יהוה ארבעים יום וארבעים לילה לחם לא אכל ומים לא שתה ויכתב על הלחת את דברי הברית עשרת הדברים:

Segment 29
HE:
ויהי ברדת משה מהר סיני ושני לחת העדת ביד משה ברדתו מן ההר ומשה לא ידע כי קרן עור פניו בדברו אתו:

Segment 30
HE:
וירא אהרן וכל בני ישראל את משה והנה קרן עור פניו וייראו מגשת אליו:

Segment 31
HE:
ויקרא אלהם משה וישבו אליו אהרן וכל הנשאים בעדה וידבר משה אלהם:

Segment 32
HE:
ואחרי כן נגשו כל בני ישראל ויצום את כל אשר דבר יהוה אתו בהר סיני:

Segment 33
HE:
מפטיר  ויכל משה מדבר אתם ויתן על פניו מסוה:

Segment 34
HE:
ובבא משה לפני יהוה לדבר אתו יסיר את המסוה עד צאתו ויצא ודבר אל בני ישראל את אשר יצוה:

Segment 35
HE:
וראו בני ישראל את פני משה כי קרן עור פני משה והשיב משה את המסוה על פניו עד באו לדבר אתו: (ססס)