Exodus Chapter 5
שמות פרק ה
Source: https://ajew.org/reader/tanach-shemos/1/5

Segment 1
HE:
שביעי  ואחר באו משה ואהרן ויאמרו אל פרעה כה אמר יהוה אלהי ישראל שלח את עמי ויחגו לי במדבר:

Segment 2
HE:
ויאמר פרעה מי יהוה אשר אשמע בקלו לשלח את ישראל לא ידעתי את יהוה וגם את ישראל לא אשלח:

Segment 3
HE:
ויאמרו אלהי העברים נקרא עלינו נלכה נא דרך שלשת ימים במדבר ונזבחה ליהוה אלהינו פן יפגענו בדבר או בחרב:

Segment 4
HE:
ויאמר אלהם מלך מצרים למה משה ואהרן תפריעו את העם ממעשיו לכו לסבלתיכם:

Segment 5
HE:
ויאמר פרעה הן רבים עתה עם הארץ והשבתם אתם מסבלתם:

Segment 6
HE:
ויצו פרעה ביום ההוא את הנגשים בעם ואת שטריו לאמר:

Segment 7
HE:
לא תאספון לתת תבן לעם ללבן הלבנים כתמול שלשם הם ילכו וקששו להם תבן:

Segment 8
HE:
ואת מתכנת הלבנים אשר הם עשים תמול שלשם תשימו עליהם לא תגרעו ממנו כי נרפים הם על כן הם צעקים לאמר נלכה נזבחה לאלהינו:

Segment 9
HE:
תכבד העבדה על האנשים ויעשו בה ואל ישעו בדברי שקר:

Segment 10
HE:
ויצאו נגשי העם ושטריו ויאמרו אל העם לאמר כה אמר פרעה אינני נתן לכם תבן:

Segment 11
HE:
אתם לכו קחו לכם תבן מאשר תמצאו כי אין נגרע מעבדתכם דבר:

Segment 12
HE:
ויפץ העם בכל ארץ מצרים לקשש קש לתבן:

Segment 13
HE:
והנגשים אצים לאמר כלו מעשיכם דבר יום ביומו כאשר בהיות התבן:

Segment 14
HE:
ויכו שטרי בני ישראל אשר שמו עלהם נגשי פרעה לאמר מדוע לא כליתם חקכם ללבן כתמול שלשם גם תמול גם היום:

Segment 15
HE:
ויבאו שטרי בני ישראל ויצעקו אל פרעה לאמר למה תעשה כה לעבדיך:

Segment 16
HE:
תבן אין נתן לעבדיך ולבנים אמרים לנו עשו והנה עבדיך מכים וחטאת עמך:

Segment 17
HE:
ויאמר נרפים אתם נרפים על כן אתם אמרים נלכה נזבחה ליהוה:

Segment 18
HE:
ועתה לכו עבדו ותבן לא ינתן לכם ותכן לבנים תתנו:

Segment 19
HE:
ויראו שטרי בני ישראל אתם ברע לאמר לא תגרעו מלבניכם דבר יום ביומו:

Segment 20
HE:
ויפגעו את משה ואת אהרן נצבים לקראתם בצאתם מאת פרעה:

Segment 21
HE:
ויאמרו אלהם ירא יהוה עליכם וישפט אשר הבאשתם את ריחנו בעיני פרעה ובעיני עבדיו לתת חרב בידם להרגנו:

Segment 22
HE:
מפטיר  וישב משה אל יהוה ויאמר אדני למה הרעתה לעם הזה למה זה שלחתני:

Segment 23
HE:
ומאז באתי אל פרעה לדבר בשמך הרע לעם הזה והצל לא הצלת את עמך: