tanach-shmuel-a — complete plain text
Source index: https://ajew.org/reader/tanach-shmuel-a/

Sections:
- Samuel 1 Chapter 1 — https://ajew.org/reader-plain/tanach-shmuel-a/1/1/index.txt
- Samuel 1 Chapter 10 — https://ajew.org/reader-plain/tanach-shmuel-a/1/10/index.txt
- Samuel 1 Chapter 11 — https://ajew.org/reader-plain/tanach-shmuel-a/1/11/index.txt
- Samuel 1 Chapter 12 — https://ajew.org/reader-plain/tanach-shmuel-a/1/12/index.txt
- Samuel 1 Chapter 13 — https://ajew.org/reader-plain/tanach-shmuel-a/1/13/index.txt
- Samuel 1 Chapter 14 — https://ajew.org/reader-plain/tanach-shmuel-a/1/14/index.txt
- Samuel 1 Chapter 15 — https://ajew.org/reader-plain/tanach-shmuel-a/1/15/index.txt
- Samuel 1 Chapter 16 — https://ajew.org/reader-plain/tanach-shmuel-a/1/16/index.txt
- Samuel 1 Chapter 17 — https://ajew.org/reader-plain/tanach-shmuel-a/1/17/index.txt
- Samuel 1 Chapter 18 — https://ajew.org/reader-plain/tanach-shmuel-a/1/18/index.txt
- Samuel 1 Chapter 19 — https://ajew.org/reader-plain/tanach-shmuel-a/1/19/index.txt
- Samuel 1 Chapter 2 — https://ajew.org/reader-plain/tanach-shmuel-a/1/2/index.txt
- Samuel 1 Chapter 20 — https://ajew.org/reader-plain/tanach-shmuel-a/1/20/index.txt
- Samuel 1 Chapter 21 — https://ajew.org/reader-plain/tanach-shmuel-a/1/21/index.txt
- Samuel 1 Chapter 22 — https://ajew.org/reader-plain/tanach-shmuel-a/1/22/index.txt
- Samuel 1 Chapter 23 — https://ajew.org/reader-plain/tanach-shmuel-a/1/23/index.txt
- Samuel 1 Chapter 24 — https://ajew.org/reader-plain/tanach-shmuel-a/1/24/index.txt
- Samuel 1 Chapter 25 — https://ajew.org/reader-plain/tanach-shmuel-a/1/25/index.txt
- Samuel 1 Chapter 26 — https://ajew.org/reader-plain/tanach-shmuel-a/1/26/index.txt
- Samuel 1 Chapter 27 — https://ajew.org/reader-plain/tanach-shmuel-a/1/27/index.txt
- Samuel 1 Chapter 28 — https://ajew.org/reader-plain/tanach-shmuel-a/1/28/index.txt
- Samuel 1 Chapter 29 — https://ajew.org/reader-plain/tanach-shmuel-a/1/29/index.txt
- Samuel 1 Chapter 3 — https://ajew.org/reader-plain/tanach-shmuel-a/1/3/index.txt
- Samuel 1 Chapter 30 — https://ajew.org/reader-plain/tanach-shmuel-a/1/30/index.txt
- Samuel 1 Chapter 31 — https://ajew.org/reader-plain/tanach-shmuel-a/1/31/index.txt
- Samuel 1 Chapter 4 — https://ajew.org/reader-plain/tanach-shmuel-a/1/4/index.txt
- Samuel 1 Chapter 5 — https://ajew.org/reader-plain/tanach-shmuel-a/1/5/index.txt
- Samuel 1 Chapter 6 — https://ajew.org/reader-plain/tanach-shmuel-a/1/6/index.txt
- Samuel 1 Chapter 7 — https://ajew.org/reader-plain/tanach-shmuel-a/1/7/index.txt
- Samuel 1 Chapter 8 — https://ajew.org/reader-plain/tanach-shmuel-a/1/8/index.txt
- Samuel 1 Chapter 9 — https://ajew.org/reader-plain/tanach-shmuel-a/1/9/index.txt


====================



# Samuel 1 Chapter 1
URL: https://ajew.org/reader-plain/tanach-shmuel-a/1/1/

Samuel 1 Chapter 1
שמואל א פרק א
Source: https://ajew.org/reader/tanach-shmuel-a/1/1

Segment 1
HE:
ויהי איש אחד מן הרמתים צופים מהר אפרים ושמו אלקנה בן ירחם בן אליהוא בן תחו בן צוף אפרתי:

Segment 2
HE:
ולו שתי נשים שם אחת חנה ושם השנית פננה ויהי לפננה ילדים ולחנה אין ילדים:

Segment 3
HE:
ועלה האיש ההוא מעירו מימים ימימה להשתחות ולזבח ליהוה צבאות בשלה ושם שני בני עלי חפני ופנחס כהנים ליהוה:

Segment 4
HE:
ויהי היום ויזבח אלקנה ונתן לפננה אשתו ולכל בניה ובנותיה מנות:

Segment 5
HE:
ולחנה יתן מנה אחת אפים כי את חנה אהב ויהוה סגר רחמה:

Segment 6
HE:
וכעסתה צרתה גם כעס בעבור הרעמה כי סגר יהוה בעד רחמה:

Segment 7
HE:
וכן יעשה שנה בשנה מדי עלתה בבית יהוה כן תכעסנה ותבכה ולא תאכל:

Segment 8
HE:
ויאמר לה אלקנה אישה חנה למה תבכי ולמה לא תאכלי ולמה ירע לבבך הלוא אנכי טוב לך מעשרה בנים:

Segment 9
HE:
ותקם חנה אחרי אכלה בשלה ואחרי שתה ועלי הכהן ישב על הכסא על מזוזת היכל יהוה:

Segment 10
HE:
והיא מרת נפש ותתפלל על יהוה ובכה תבכה:

Segment 11
HE:
ותדר נדר ותאמר יהוה צבאות אם ראה תראה בעני אמתך וזכרתני ולא תשכח את אמתך ונתתה לאמתך זרע אנשים ונתתיו ליהוה כל ימי חייו ומורה לא יעלה על ראשו:

Segment 12
HE:
והיה כי הרבתה להתפלל לפני יהוה ועלי שמר את פיה:

Segment 13
HE:
וחנה היא מדברת על לבה רק שפתיה נעות וקולה לא ישמע ויחשבה עלי לשכרה:

Segment 14
HE:
ויאמר אליה עלי עד מתי תשתכרין הסירי את יינך מעליך:

Segment 15
HE:
ותען חנה ותאמר לא אדני אשה קשת רוח אנכי ויין ושכר לא שתיתי ואשפך את נפשי לפני יהוה:

Segment 16
HE:
אל תתן את אמתך לפני בת בליעל כי מרב שיחי וכעסי דברתי עד הנה:

Segment 17
HE:
ויען עלי ויאמר לכי לשלום ואלהי ישראל יתן את שלתך אשר שאלת מעמו:

Segment 18
HE:
ותאמר תמצא שפחתך חן בעיניך ותלך האשה לדרכה ותאכל ופניה לא היו לה עוד:

Segment 19
HE:
וישכמו בבקר וישתחוו לפני יהוה וישבו ויבאו אל ביתם הרמתה וידע אלקנה את חנה אשתו ויזכרה יהוה:

Segment 20
HE:
ויהי לתקפות הימים ותהר חנה ותלד בן ותקרא את שמו שמואל כי מיהוה שאלתיו:

Segment 21
HE:
ויעל האיש אלקנה וכל ביתו לזבח ליהוה את זבח הימים ואת נדרו:

Segment 22
HE:
וחנה לא עלתה כי אמרה לאישה עד יגמל הנער והבאתיו ונראה את פני יהוה וישב שם עד עולם:

Segment 23
HE:
ויאמר לה אלקנה אישה עשי הטוב בעיניך שבי עד גמלך אתו אך יקם יהוה את דברו ותשב האשה ותינק את בנה עד גמלה אתו:

Segment 24
HE:
ותעלהו עמה כאשר גמלתו בפרים שלשה ואיפה אחת קמח ונבל יין ותבאהו בית יהוה שלו והנער נער:

Segment 25
HE:
וישחטו את הפר ויביאו את הנער אל עלי:

Segment 26
HE:
ותאמר בי אדני חי נפשך אדני אני האשה הנצבת עמכה בזה להתפלל אל יהוה:

Segment 27
HE:
אל הנער הזה התפללתי ויתן יהוה לי את שאלתי אשר שאלתי מעמו:

Segment 28
HE:
וגם אנכי השאלתהו ליהוה כל הימים אשר היה הוא שאול ליהוה וישתחו שם ליהוה: (פ)



# Samuel 1 Chapter 10
URL: https://ajew.org/reader-plain/tanach-shmuel-a/1/10/

Samuel 1 Chapter 10
שמואל א פרק י
Source: https://ajew.org/reader/tanach-shmuel-a/1/10

Segment 1
HE:
ויקח שמואל את פך השמן ויצק על ראשו וישקהו ויאמר הלוא כי משחך יהוה על נחלתו לנגיד:

Segment 2
HE:
בלכתך היום מעמדי ומצאת שני אנשים עם קברת רחל בגבול בנימן בצלצח ואמרו אליך נמצאו האתנות אשר הלכת לבקש והנה נטש אביך את דברי האתנות ודאג לכם לאמר מה אעשה לבני:

Segment 3
HE:
וחלפת משם והלאה ובאת עד אלון תבור ומצאוך שם שלשה אנשים עלים אל האלהים בית אל אחד נשא שלשה גדיים ואחד נשא שלשת ככרות לחם ואחד נשא נבל יין:

Segment 4
HE:
ושאלו לך לשלום ונתנו לך שתי לחם ולקחת מידם:

Segment 5
HE:
אחר כן תבוא גבעת האלהים אשר שם נצבי פלשתים ויהי כבאך שם העיר ופגעת חבל נביאים ירדים מהבמה ולפניהם נבל ותף וחליל וכנור והמה מתנבאים:

Segment 6
HE:
וצלחה עליך רוח יהוה והתנבית עמם ונהפכת לאיש אחר:

Segment 7
HE:
והיה כי (תבאינה) תבאנה האתות האלה לך עשה לך אשר תמצא ידך כי האלהים עמך:

Segment 8
HE:
וירדת לפני הגלגל והנה אנכי ירד אליך להעלות עלות לזבח זבחי שלמים שבעת ימים תוחל עד בואי אליך והודעתי לך את אשר תעשה:

Segment 9
HE:
והיה כהפנתו שכמו ללכת מעם שמואל ויהפך לו אלהים לב אחר ויבאו כל האתות האלה ביום ההוא: (ס)

Segment 10
HE:
ויבאו שם הגבעתה והנה חבל נבאים לקראתו ותצלח עליו רוח אלהים ויתנבא בתוכם:

Segment 11
HE:
ויהי כל יודעו מאתמול שלשום ויראו והנה עם נבאים נבא ויאמר העם איש אל רעהו מה זה היה לבן קיש הגם שאול בנביאים:

Segment 12
HE:
ויען איש משם ויאמר ומי אביהם על כן היתה למשל הגם שאול בנבאים:

Segment 13
HE:
ויכל מהתנבות ויבא הבמה:

Segment 14
HE:
ויאמר דוד שאול אליו ואל נערו אן הלכתם ויאמר לבקש את האתנות ונראה כי אין ונבוא אל שמואל:

Segment 15
HE:
ויאמר דוד שאול הגידה נא לי מה אמר לכם שמואל:

Segment 16
HE:
ויאמר שאול אל דודו הגד הגיד לנו כי נמצאו האתנות ואת דבר המלוכה לא הגיד לו אשר אמר שמואל: (פ)

Segment 17
HE:
ויצעק שמואל את העם אל יהוה המצפה:

Segment 18
HE:
ויאמר אל בני ישראל (פ) כה אמר יהוה אלהי ישראל אנכי העליתי את ישראל ממצרים ואציל אתכם מיד מצרים ומיד כל הממלכות הלחצים אתכם:

Segment 19
HE:
ואתם היום מאסתם את אלהיכם אשר הוא מושיע לכם מכל רעותיכם וצרתיכם ותאמרו לו כי מלך תשים עלינו ועתה התיצבו לפני יהוה לשבטיכם ולאלפיכם:

Segment 20
HE:
ויקרב שמואל את כל שבטי ישראל וילכד שבט בנימן:

Segment 21
HE:
ויקרב את שבט בנימן (למשפחתו) למשפחתיו ותלכד משפחת המטרי וילכד שאול בן קיש ויבקשהו ולא נמצא:

Segment 22
HE:
וישאלו עוד ביהוה הבא עוד הלם (ס) איש ויאמר יהוה הנה הוא נחבא אל הכלים:

Segment 23
HE:
וירצו ויקחהו משם ויתיצב בתוך העם ויגבה מכל העם משכמו ומעלה:

Segment 24
HE:
ויאמר שמואל אל כל העם הראיתם אשר בחר בו יהוה כי אין כמהו בכל העם וירעו כל העם ויאמרו יחי המלך: (פ)

Segment 25
HE:
וידבר שמואל אל העם את משפט המלכה ויכתב בספר וינח לפני יהוה וישלח שמואל את כל העם איש לביתו:

Segment 26
HE:
וגם שאול הלך לביתו גבעתה וילכו עמו החיל אשר נגע אלהים בלבם:

Segment 27
HE:
ובני בליעל אמרו מה ישענו זה ויבזהו ולא הביאו לו מנחה ויהי כמחריש: (פ)



# Samuel 1 Chapter 11
URL: https://ajew.org/reader-plain/tanach-shmuel-a/1/11/

Samuel 1 Chapter 11
שמואל א פרק יא
Source: https://ajew.org/reader/tanach-shmuel-a/1/11

Segment 1
HE:
ויעל נחש העמוני ויחן על יבש גלעד ויאמרו כל אנשי יביש אל נחש כרת לנו ברית ונעבדך:

Segment 2
HE:
ויאמר אליהם נחש העמוני בזאת אכרת לכם בנקור לכם כל עין ימין ושמתיה חרפה על כל ישראל:

Segment 3
HE:
ויאמרו אליו זקני יביש הרף לנו שבעת ימים ונשלחה מלאכים בכל גבול ישראל ואם אין מושיע אתנו ויצאנו אליך:

Segment 4
HE:
ויבאו המלאכים גבעת שאול וידברו הדברים באזני העם וישאו כל העם את קולם ויבכו:

Segment 5
HE:
והנה שאול בא אחרי הבקר מן השדה ויאמר שאול מה לעם כי יבכו ויספרו לו את דברי אנשי יביש:

Segment 6
HE:
ותצלח רוח אלהים על שאול (בשמעו) כשמעו את הדברים האלה ויחר אפו מאד:

Segment 7
HE:
ויקח צמד בקר וינתחהו וישלח בכל גבול ישראל ביד המלאכים לאמר אשר איננו יצא אחרי שאול ואחר שמואל כה יעשה לבקרו ויפל פחד יהוה על העם ויצאו כאיש אחד:

Segment 8
HE:
ויפקדם בבזק ויהיו בני ישראל שלש מאות אלף ואיש יהודה שלשים אלף:

Segment 9
HE:
ויאמרו למלאכים הבאים כה תאמרון לאיש יביש גלעד מחר תהיה לכם תשועה (בחם) כחם השמש ויבאו המלאכים ויגידו לאנשי יביש וישמחו:

Segment 10
HE:
ויאמרו אנשי יביש מחר נצא אליכם ועשיתם לנו ככל הטוב בעיניכם: (ס)

Segment 11
HE:
ויהי ממחרת וישם שאול את העם שלשה ראשים ויבאו בתוך המחנה באשמרת הבקר ויכו את עמון עד חם היום ויהי הנשארים ויפצו ולא נשארו בם שנים יחד:

Segment 12
HE:
ויאמר העם אל שמואל מי האמר שאול ימלך עלינו תנו האנשים ונמיתם:

Segment 13
HE:
ויאמר שאול לא יומת איש ביום הזה כי היום עשה יהוה תשועה בישראל: (ס)

Segment 14
HE:
ויאמר שמואל אל העם לכו ונלכה הגלגל ונחדש שם המלוכה:

Segment 15
HE:
וילכו כל העם הגלגל וימלכו שם את שאול לפני יהוה בגלגל ויזבחו שם זבחים שלמים לפני יהוה וישמח שם שאול וכל אנשי ישראל עד מאד: (פ)



# Samuel 1 Chapter 12
URL: https://ajew.org/reader-plain/tanach-shmuel-a/1/12/

Samuel 1 Chapter 12
שמואל א פרק יב
Source: https://ajew.org/reader/tanach-shmuel-a/1/12

Segment 1
HE:
ויאמר שמואל אל כל ישראל הנה שמעתי בקלכם לכל אשר אמרתם לי ואמליך עליכם מלך:

Segment 2
HE:
ועתה הנה המלך מתהלך לפניכם ואני זקנתי ושבתי ובני הנם אתכם ואני התהלכתי לפניכם מנערי עד היום הזה:

Segment 3
HE:
הנני ענו בי נגד יהוה ונגד משיחו את שור מי לקחתי וחמור מי לקחתי ואת מי עשקתי את מי רצותי ומיד מי לקחתי כפר ואעלים עיני בו ואשיב לכם:

Segment 4
HE:
ויאמרו לא עשקתנו ולא רצותנו ולא לקחת מיד איש מאומה:

Segment 5
HE:
ויאמר אליהם עד יהוה בכם ועד משיחו היום הזה כי לא מצאתם בידי מאומה ויאמר עד: (פ)

Segment 6
HE:
ויאמר שמואל אל העם יהוה אשר עשה את משה ואת אהרן ואשר העלה את אבתיכם מארץ מצרים:

Segment 7
HE:
ועתה התיצבו ואשפטה אתכם לפני יהוה את כל צדקות יהוה אשר עשה אתכם ואת אבותיכם:

Segment 8
HE:
כאשר בא יעקב מצרים ויזעקו אבותיכם אל יהוה וישלח יהוה את משה ואת אהרן ויוציאו את אבתיכם ממצרים וישבום במקום הזה:

Segment 9
HE:
וישכחו את יהוה אלהיהם וימכר אתם ביד סיסרא שר צבא חצור וביד פלשתים וביד מלך מואב וילחמו בם:

Segment 10
HE:
ויזעקו אל יהוה (ויאמר) ויאמרו חטאנו כי עזבנו את יהוה ונעבד את הבעלים ואת העשתרות ועתה הצילנו מיד איבינו ונעבדך:

Segment 11
HE:
וישלח יהוה את ירבעל ואת בדן ואת יפתח ואת שמואל ויצל אתכם מיד איביכם מסביב ותשבו בטח:

Segment 12
HE:
ותראו כי נחש מלך בני עמון בא עליכם ותאמרו לי לא כי מלך ימלך עלינו ויהוה אלהיכם מלככם:

Segment 13
HE:
ועתה הנה המלך אשר בחרתם אשר שאלתם והנה נתן יהוה עליכם מלך:

Segment 14
HE:
אם תיראו את יהוה ועבדתם אתו ושמעתם בקלו ולא תמרו את פי יהוה והיתם גם אתם וגם המלך אשר מלך עליכם אחר יהוה אלהיכם:

Segment 15
HE:
ואם לא תשמעו בקול יהוה ומריתם את פי יהוה והיתה יד יהוה בכם ובאבתיכם:

Segment 16
HE:
גם עתה התיצבו וראו את הדבר הגדול הזה אשר יהוה עשה לעיניכם:

Segment 17
HE:
הלוא קציר חטים היום אקרא אל יהוה ויתן קלות ומטר ודעו וראו כי רעתכם רבה אשר עשיתם בעיני יהוה לשאול לכם מלך: (ס)

Segment 18
HE:
ויקרא שמואל אל יהוה ויתן יהוה קלת ומטר ביום ההוא ויירא כל העם מאד את יהוה ואת שמואל:

Segment 19
HE:
ויאמרו כל העם אל שמואל התפלל בעד עבדיך אל יהוה אלהיך ואל נמות כי יספנו על כל חטאתינו רעה לשאל לנו מלך: (ס)

Segment 20
HE:
ויאמר שמואל אל העם אל תיראו אתם עשיתם את כל הרעה הזאת אך אל תסורו מאחרי יהוה ועבדתם את יהוה בכל לבבכם:

Segment 21
HE:
ולא תסורו כי אחרי התהו אשר לא יועילו ולא יצילו כי תהו המה:

Segment 22
HE:
כי לא יטש יהוה את עמו בעבור שמו הגדול כי הואיל יהוה לעשות אתכם לו לעם:

Segment 23
HE:
גם אנכי חלילה לי מחטא ליהוה מחדל להתפלל בעדכם והוריתי אתכם בדרך הטובה והישרה:

Segment 24
HE:
אך יראו את יהוה ועבדתם אתו באמת בכל לבבכם כי ראו את אשר הגדל עמכם: (פ)

Segment 25
HE:
ואם הרע תרעו גם אתם גם מלככם תספו:



# Samuel 1 Chapter 13
URL: https://ajew.org/reader-plain/tanach-shmuel-a/1/13/

Samuel 1 Chapter 13
שמואל א פרק יג
Source: https://ajew.org/reader/tanach-shmuel-a/1/13

Segment 1
HE:
בן שנה שאול במלכו ושתי שנים מלך על ישראל:

Segment 2
HE:
ויבחר לו שאול שלשת אלפים מישראל ויהיו עם שאול אלפים במכמש ובהר בית אל ואלף היו עם יונתן בגבעת בנימין ויתר העם שלח איש לאהליו:

Segment 3
HE:
ויך יונתן את נציב פלשתים אשר בגבע וישמעו פלשתים ושאול תקע בשופר בכל הארץ לאמר ישמעו העברים:

Segment 4
HE:
וכל ישראל שמעו לאמר הכה שאול את נציב פלשתים וגם נבאש ישראל בפלשתים ויצעקו העם אחרי שאול הגלגל:

Segment 5
HE:
ופלשתים נאספו להלחם עם ישראל שלשים אלף רכב וששת אלפים פרשים ועם כחול אשר על שפת הים לרב ויעלו ויחנו במכמש קדמת בית און:

Segment 6
HE:
ואיש ישראל ראו כי צר לו כי נגש העם ויתחבאו העם במערות ובחוחים ובסלעים ובצרחים ובברות:

Segment 7
HE:
ועברים עברו את הירדן ארץ גד וגלעד ושאול עודנו בגלגל וכל העם חרדו אחריו:

Segment 8
HE:
(וייחל) ויוחל שבעת ימים למועד אשר שמואל ולא בא שמואל הגלגל ויפץ העם מעליו:

Segment 9
HE:
ויאמר שאול הגשו אלי העלה והשלמים ויעל העלה:

Segment 10
HE:
ויהי ככלתו להעלות העלה והנה שמואל בא ויצא שאול לקראתו לברכו:

Segment 11
HE:
ויאמר שמואל מה עשית ויאמר שאול כי ראיתי כי נפץ העם מעלי ואתה לא באת למועד הימים ופלשתים נאספים מכמש:

Segment 12
HE:
ואמר עתה ירדו פלשתים אלי הגלגל ופני יהוה לא חליתי ואתאפק ואעלה העלה: (ס)

Segment 13
HE:
ויאמר שמואל אל שאול נסכלת לא שמרת את מצות יהוה אלהיך אשר צוך כי עתה הכין יהוה את ממלכתך אל ישראל עד עולם:

Segment 14
HE:
ועתה ממלכתך לא תקום בקש יהוה לו איש כלבבו ויצוהו יהוה לנגיד על עמו כי לא שמרת את אשר צוך יהוה: (פ)

Segment 15
HE:
ויקם שמואל ויעל מן הגלגל גבעת בנימן ויפקד שאול את העם הנמצאים עמו כשש מאות איש:

Segment 16
HE:
ושאול ויונתן בנו והעם הנמצא עמם ישבים בגבע בנימן ופלשתים חנו במכמש:

Segment 17
HE:
ויצא המשחית ממחנה פלשתים שלשה ראשים הראש אחד יפנה אל דרך עפרה אל ארץ שועל:

Segment 18
HE:
והראש אחד יפנה דרך בית חרון והראש אחד יפנה דרך הגבול הנשקף על גי הצבעים המדברה: (ס)

Segment 19
HE:
וחרש לא ימצא בכל ארץ ישראל כי (אמר) אמרו פלשתים פן יעשו העברים חרב או חנית:

Segment 20
HE:
וירדו כל ישראל הפלשתים ללטוש איש את מחרשתו ואת אתו ואת קרדמו ואת מחרשתו:

Segment 21
HE:
והיתה הפצירה פים למחרשת ולאתים ולשלש קלשון ולהקרדמים ולהציב הדרבן:

Segment 22
HE:
והיה ביום מלחמת ולא נמצא חרב וחנית ביד כל העם אשר את שאול ואת יונתן ותמצא לשאול וליונתן בנו:

Segment 23
HE:
ויצא מצב פלשתים אל מעבר מכמש: (ס)



# Samuel 1 Chapter 14
URL: https://ajew.org/reader-plain/tanach-shmuel-a/1/14/

Samuel 1 Chapter 14
שמואל א פרק יד
Source: https://ajew.org/reader/tanach-shmuel-a/1/14

Segment 1
HE:
ויהי היום ויאמר יונתן בן שאול אל הנער נשא כליו לכה ונעברה אל מצב פלשתים אשר מעבר הלז ולאביו לא הגיד:

Segment 2
HE:
ושאול יושב בקצה הגבעה תחת הרמון אשר במגרון והעם אשר עמו כשש מאות איש:

Segment 3
HE:
ואחיה בן אחטוב אחי איכבוד בן פינחס בן עלי כהן יהוה בשלו נשא אפוד והעם לא ידע כי הלך יונתן:

Segment 4
HE:
ובין המעברות אשר בקש יונתן לעבר על מצב פלשתים שן הסלע מהעבר מזה ושן הסלע מהעבר מזה ושם האחד בוצץ ושם האחד סנה:

Segment 5
HE:
השן האחד מצוק מצפון מול מכמש והאחד מנגב מול גבע: (ס)

Segment 6
HE:
ויאמר יהונתן אל הנער נשא כליו לכה ונעברה אל מצב הערלים האלה אולי יעשה יהוה לנו כי אין ליהוה מעצור להושיע ברב או במעט:

Segment 7
HE:
ויאמר לו נשא כליו עשה כל אשר בלבבך נטה לך הנני עמך כלבבך: (ס)

Segment 8
HE:
ויאמר יהונתן הנה אנחנו עברים אל האנשים ונגלינו אליהם:

Segment 9
HE:
אם כה יאמרו אלינו דמו עד הגיענו אליכם ועמדנו תחתינו ולא נעלה אליהם:

Segment 10
HE:
ואם כה יאמרו עלו עלינו ועלינו כי נתנם יהוה בידנו וזה לנו האות:

Segment 11
HE:
ויגלו שניהם אל מצב פלשתים ויאמרו פלשתים הנה עברים יצאים מן החרים אשר התחבאו שם:

Segment 12
HE:
ויענו אנשי המצבה את יונתן ואת נשא כליו ויאמרו עלו אלינו ונודיעה אתכם דבר (פ) ויאמר יונתן אל נשא כליו עלה אחרי כי נתנם יהוה ביד ישראל:

Segment 13
HE:
ויעל יונתן על ידיו ועל רגליו ונשא כליו אחריו ויפלו לפני יונתן ונשא כליו ממותת אחריו:

Segment 14
HE:
ותהי המכה הראשנה אשר הכה יונתן ונשא כליו כעשרים איש כבחצי מענה צמד שדה:

Segment 15
HE:
ותהי חרדה במחנה בשדה ובכל העם המצב והמשחית חרדו גם המה ותרגז הארץ ותהי לחרדת אלהים:

Segment 16
HE:
ויראו הצפים לשאול בגבעת בנימן והנה ההמון נמוג וילך והלם: (פ)

Segment 17
HE:
ויאמר שאול לעם אשר אתו פקדו נא וראו מי הלך מעמנו ויפקדו והנה אין יונתן ונשא כליו:

Segment 18
HE:
ויאמר שאול לאחיה הגישה ארון האלהים כי היה ארון האלהים ביום ההוא ובני ישראל:

Segment 19
HE:
ויהי עד דבר שאול אל הכהן וההמון אשר במחנה פלשתים וילך הלוך ורב (פ) ויאמר שאול אל הכהן אסף ידך:

Segment 20
HE:
ויזעק שאול וכל העם אשר אתו ויבאו עד המלחמה והנה היתה חרב איש ברעהו מהומה גדולה מאד:

Segment 21
HE:
והעברים היו לפלשתים כאתמול שלשום אשר עלו עמם במחנה סביב וגם המה להיות עם ישראל אשר עם שאול ויונתן:

Segment 22
HE:
וכל איש ישראל המתחבאים בהר אפרים שמעו כי נסו פלשתים וידבקו גם המה אחריהם במלחמה:

Segment 23
HE:
ויושע יהוה ביום ההוא את ישראל והמלחמה עברה את בית און:

Segment 24
HE:
ואיש ישראל נגש ביום ההוא ויאל שאול את העם לאמר ארור האיש אשר יאכל לחם עד הערב ונקמתי מאיבי ולא טעם כל העם לחם: (ס)

Segment 25
HE:
וכל הארץ באו ביער ויהי דבש על פני השדה:

Segment 26
HE:
ויבא העם אל היער והנה הלך דבש ואין משיג ידו אל פיו כי ירא העם את השבעה:

Segment 27
HE:
ויונתן לא שמע בהשביע אביו את העם וישלח את קצה המטה אשר בידו ויטבל אותה ביערת הדבש וישב ידו אל פיו (ותראנה) ותארנה עיניו:

Segment 28
HE:
ויען איש מהעם ויאמר השבע השביע אביך את העם לאמר ארור האיש אשר יאכל לחם היום ויעף העם:

Segment 29
HE:
ויאמר יונתן עכר אבי את הארץ ראו נא כי ארו עיני כי טעמתי מעט דבש הזה:

Segment 30
HE:
אף כי לוא אכל אכל היום העם משלל איביו אשר מצא כי עתה לא רבתה מכה בפלשתים:

Segment 31
HE:
ויכו ביום ההוא בפלשתים ממכמש אילנה ויעף העם מאד:

Segment 32
HE:
(ויעש) ויעט העם אל (שלל) השלל ויקחו צאן ובקר ובני בקר וישחטו ארצה ויאכל העם על הדם:

Segment 33
HE:
ויגידו לשאול לאמר הנה העם חטאים ליהוה לאכל על הדם ויאמר בגדתם גלו אלי היום אבן גדולה:

Segment 34
HE:
ויאמר שאול פצו בעם ואמרתם להם הגישו אלי איש שורו ואיש שיהו ושחטתם בזה ואכלתם ולא תחטאו ליהוה לאכל אל הדם ויגשו כל העם איש שורו בידו הלילה וישחטו שם:

Segment 35
HE:
ויבן שאול מזבח ליהוה אתו החל לבנות מזבח ליהוה: (פ)

Segment 36
HE:
ויאמר שאול נרדה אחרי פלשתים לילה ונבזה בהם עד אור הבקר ולא נשאר בהם איש ויאמרו כל הטוב בעיניך עשה (ס) ויאמר הכהן נקרבה הלם אל האלהים:

Segment 37
HE:
וישאל שאול באלהים הארד אחרי פלשתים התתנם ביד ישראל ולא ענהו ביום ההוא:

Segment 38
HE:
ויאמר שאול גשו הלם כל פנות העם ודעו וראו במה היתה החטאת הזאת היום:

Segment 39
HE:
כי חי יהוה המושיע את ישראל כי אם ישנו ביונתן בני כי מות ימות ואין ענהו מכל העם:

Segment 40
HE:
ויאמר אל כל ישראל אתם תהיו לעבר אחד ואני ויונתן בני נהיה לעבר אחד ויאמרו העם אל שאול הטוב בעיניך עשה: (ס)

Segment 41
HE:
ויאמר שאול אל יהוה אלהי ישראל הבה תמים וילכד יונתן ושאול והעם יצאו:

Segment 42
HE:
ויאמר שאול הפילו ביני ובין יונתן בני וילכד יונתן:

Segment 43
HE:
ויאמר שאול אל יונתן הגידה לי מה עשיתה ויגד לו יונתן ויאמר טעם טעמתי בקצה המטה אשר בידי מעט דבש הנני אמות:

Segment 44
HE:
ויאמר שאול כה יעשה אלהים וכה יוסף כי מות תמות יונתן:

Segment 45
HE:
ויאמר העם אל שאול היונתן ימות אשר עשה הישועה הגדולה הזאת בישראל חלילה חי יהוה אם יפל משערת ראשו ארצה כי עם אלהים עשה היום הזה ויפדו העם את יונתן ולא מת: (ס)

Segment 46
HE:
ויעל שאול מאחרי פלשתים ופלשתים הלכו למקומם:

Segment 47
HE:
ושאול לכד המלוכה על ישראל וילחם סביב בכל איביו במואב ובבני עמון ובאדום ובמלכי צובה ובפלשתים ובכל אשר יפנה ירשיע:

Segment 48
HE:
ויעש חיל ויך את עמלק ויצל את ישראל מיד שסהו: (ס)

Segment 49
HE:
ויהיו בני שאול יונתן וישוי ומלכי שוע ושם שתי בנתיו שם הבכירה מרב ושם הקטנה מיכל:

Segment 50
HE:
ושם אשת שאול אחינעם בת אחימעץ ושם שר צבאו אבינר בן נר דוד שאול:

Segment 51
HE:
וקיש אבי שאול ונר אבי אבנר בן אביאל: (ס)

Segment 52
HE:
ותהי המלחמה חזקה על פלשתים כל ימי שאול וראה שאול כל איש גבור וכל בן חיל ויאספהו אליו: (ס)



# Samuel 1 Chapter 15
URL: https://ajew.org/reader-plain/tanach-shmuel-a/1/15/

Samuel 1 Chapter 15
שמואל א פרק טו
Source: https://ajew.org/reader/tanach-shmuel-a/1/15

Segment 1
HE:
ויאמר שמואל אל שאול אתי שלח יהוה למשחך למלך על עמו על ישראל ועתה שמע לקול דברי יהוה: (ס)

Segment 2
HE:
כה אמר יהוה צבאות פקדתי את אשר עשה עמלק לישראל אשר שם לו בדרך בעלתו ממצרים:

Segment 3
HE:
עתה לך והכיתה את עמלק והחרמתם את כל אשר לו ולא תחמל עליו והמתה מאיש עד אשה מעלל ועד יונק משור ועד שה מגמל ועד חמור: (ס)

Segment 4
HE:
וישמע שאול את העם ויפקדם בטלאים מאתים אלף רגלי ועשרת אלפים את איש יהודה:

Segment 5
HE:
ויבא שאול עד עיר עמלק וירב בנחל:

Segment 6
HE:
ויאמר שאול אל הקיני לכו סרו רדו מתוך עמלקי פן אספך עמו ואתה עשיתה חסד עם כל בני ישראל בעלותם ממצרים ויסר קיני מתוך עמלק:

Segment 7
HE:
ויך שאול את עמלק מחוילה בואך שור אשר על פני מצרים:

Segment 8
HE:
ויתפש את אגג מלך עמלק חי ואת כל העם החרים לפי חרב:

Segment 9
HE:
ויחמל שאול והעם על אגג ועל מיטב הצאן והבקר והמשנים ועל הכרים ועל כל הטוב ולא אבו החרימם וכל המלאכה נמבזה ונמס אתה החרימו: (פ)

Segment 10
HE:
ויהי דבר יהוה אל שמואל לאמר:

Segment 11
HE:
נחמתי כי המלכתי את שאול למלך כי שב מאחרי ואת דברי לא הקים ויחר לשמואל ויזעק אל יהוה כל הלילה:

Segment 12
HE:
וישכם שמואל לקראת שאול בבקר ויגד לשמואל לאמר בא שאול הכרמלה והנה מציב לו יד ויסב ויעבר וירד הגלגל:

Segment 13
HE:
ויבא שמואל אל שאול ויאמר לו שאול ברוך אתה ליהוה הקימתי את דבר יהוה:

Segment 14
HE:
ויאמר שמואל ומה קול הצאן הזה באזני וקול הבקר אשר אנכי שמע:

Segment 15
HE:
ויאמר שאול מעמלקי הביאום אשר חמל העם על מיטב הצאן והבקר למען זבח ליהוה אלהיך ואת היותר החרמנו: (ס)

Segment 16
HE:
ויאמר שמואל אל שאול הרף ואגידה לך את אשר דבר יהוה אלי הלילה (ויאמרו) ויאמר לו דבר: (ס)

Segment 17
HE:
ויאמר שמואל הלוא אם קטן אתה בעיניך ראש שבטי ישראל אתה וימשחך יהוה למלך על ישראל:

Segment 18
HE:
וישלחך יהוה בדרך ויאמר לך והחרמתה את החטאים את עמלק ונלחמת בו עד כלותם אתם:

Segment 19
HE:
ולמה לא שמעת בקול יהוה ותעט אל השלל ותעש הרע בעיני יהוה: (ס)

Segment 20
HE:
ויאמר שאול אל שמואל אשר שמעתי בקול יהוה ואלך בדרך אשר שלחני יהוה ואביא את אגג מלך עמלק ואת עמלק החרמתי:

Segment 21
HE:
ויקח העם מהשלל צאן ובקר ראשית החרם לזבח ליהוה אלהיך בגלגל:

Segment 22
HE:
ויאמר שמואל החפץ ליהוה בעלות וזבחים כשמע בקול יהוה הנה שמע מזבח טוב להקשיב מחלב אילים:

Segment 23
HE:
כי חטאת קסם מרי ואון ותרפים הפצר יען מאסת את דבר יהוה וימאסך ממלך: (ס)

Segment 24
HE:
ויאמר שאול אל שמואל חטאתי כי עברתי את פי יהוה ואת דבריך כי יראתי את העם ואשמע בקולם:

Segment 25
HE:
ועתה שא נא את חטאתי ושוב עמי ואשתחוה ליהוה:

Segment 26
HE:
ויאמר שמואל אל שאול לא אשוב עמך כי מאסתה את דבר יהוה וימאסך יהוה מהיות מלך על ישראל: (ס)

Segment 27
HE:
ויסב שמואל ללכת ויחזק בכנף מעילו ויקרע:

Segment 28
HE:
ויאמר אליו שמואל קרע יהוה את ממלכות ישראל מעליך היום ונתנה לרעך הטוב ממך:

Segment 29
HE:
וגם נצח ישראל לא ישקר ולא ינחם כי לא אדם הוא להנחם:

Segment 30
HE:
ויאמר חטאתי עתה כבדני נא נגד זקני עמי ונגד ישראל ושוב עמי והשתחויתי ליהוה אלהיך:

Segment 31
HE:
וישב שמואל אחרי שאול וישתחו שאול ליהוה: (ס)

Segment 32
HE:
ויאמר שמואל הגישו אלי את אגג מלך עמלק וילך אליו אגג מעדנת ויאמר אגג אכן סר מר המות:

Segment 33
HE:
ויאמר שמואל כאשר שכלה נשים חרבך כן תשכל מנשים אמך וישסף שמואל את אגג לפני יהוה בגלגל: (ס)

Segment 34
HE:
וילך שמואל הרמתה ושאול עלה אל ביתו גבעת שאול:

Segment 35
HE:
ולא יסף שמואל לראות את שאול עד יום מותו כי התאבל שמואל אל שאול ויהוה נחם כי המליך את שאול על ישראל: (ס)



# Samuel 1 Chapter 16
URL: https://ajew.org/reader-plain/tanach-shmuel-a/1/16/

Samuel 1 Chapter 16
שמואל א פרק טז
Source: https://ajew.org/reader/tanach-shmuel-a/1/16

Segment 1
HE:
ויאמר יהוה אל שמואל עד מתי אתה מתאבל אל שאול ואני מאסתיו ממלך על ישראל מלא קרנך שמן ולך אשלחך אל ישי בית הלחמי כי ראיתי בבניו לי מלך:

Segment 2
HE:
ויאמר שמואל איך אלך ושמע שאול והרגני (ס) ויאמר יהוה עגלת בקר תקח בידך ואמרת לזבח ליהוה באתי:

Segment 3
HE:
וקראת לישי בזבח ואנכי אודיעך את אשר תעשה ומשחת לי את אשר אמר אליך:

Segment 4
HE:
ויעש שמואל את אשר דבר יהוה ויבא בית לחם ויחרדו זקני העיר לקראתו ויאמר שלם בואך:

Segment 5
HE:
ויאמר שלום לזבח ליהוה באתי התקדשו ובאתם אתי בזבח ויקדש את ישי ואת בניו ויקרא להם לזבח:

Segment 6
HE:
ויהי בבואם וירא את אליאב ויאמר אך נגד יהוה משיחו:

Segment 7
HE:
ויאמר יהוה אל שמואל אל תבט אל מראהו ואל גבה קומתו כי מאסתיהו כי לא אשר יראה האדם כי האדם יראה לעינים ויהוה יראה ללבב:

Segment 8
HE:
ויקרא ישי אל אבינדב ויעברהו לפני שמואל ויאמר גם בזה לא בחר יהוה:

Segment 9
HE:
ויעבר ישי שמה ויאמר גם בזה לא בחר יהוה:

Segment 10
HE:
ויעבר ישי שבעת בניו לפני שמואל ויאמר שמואל אל ישי לא בחר יהוה באלה:

Segment 11
HE:
ויאמר שמואל אל ישי התמו הנערים ויאמר עוד שאר הקטן והנה רעה בצאן ויאמר שמואל אל ישי שלחה וקחנו כי לא נסב עד באו פה:

Segment 12
HE:
וישלח ויביאהו והוא אדמוני עם יפה עינים וטוב ראי (פ) ויאמר יהוה קום משחהו כי זה הוא:

Segment 13
HE:
ויקח שמואל את קרן השמן וימשח אתו בקרב אחיו ותצלח רוח יהוה אל דוד מהיום ההוא ומעלה ויקם שמואל וילך הרמתה: (ס)

Segment 14
HE:
ורוח יהוה סרה מעם שאול ובעתתו רוח רעה מאת יהוה:

Segment 15
HE:
ויאמרו עבדי שאול אליו הנה נא רוח אלהים רעה מבעתך:

Segment 16
HE:
יאמר נא אדננו עבדיך לפניך יבקשו איש ידע מנגן בכנור והיה בהיות עליך רוח אלהים רעה ונגן בידו וטוב לך: (פ)

Segment 17
HE:
ויאמר שאול אל עבדיו ראו נא לי איש מיטיב לנגן והביאותם אלי:

Segment 18
HE:
ויען אחד מהנערים ויאמר הנה ראיתי בן לישי בית הלחמי ידע נגן וגבור חיל ואיש מלחמה ונבון דבר ואיש תאר ויהוה עמו:

Segment 19
HE:
וישלח שאול מלאכים אל ישי ויאמר שלחה אלי את דוד בנך אשר בצאן:

Segment 20
HE:
ויקח ישי חמור לחם ונאד יין וגדי עזים אחד וישלח ביד דוד בנו אל שאול:

Segment 21
HE:
ויבא דוד אל שאול ויעמד לפניו ויאהבהו מאד ויהי לו נשא כלים:

Segment 22
HE:
וישלח שאול אל ישי לאמר יעמד נא דוד לפני כי מצא חן בעיני:

Segment 23
HE:
והיה בהיות רוח אלהים אל שאול ולקח דוד את הכנור ונגן בידו ורוח לשאול וטוב לו וסרה מעליו רוח הרעה: (פ)



# Samuel 1 Chapter 17
URL: https://ajew.org/reader-plain/tanach-shmuel-a/1/17/

Samuel 1 Chapter 17
שמואל א פרק יז
Source: https://ajew.org/reader/tanach-shmuel-a/1/17

Segment 1
HE:
ויאספו פלשתים את מחניהם למלחמה ויאספו שכה אשר ליהודה ויחנו בין שוכה ובין עזקה באפס דמים:

Segment 2
HE:
ושאול ואיש ישראל נאספו ויחנו בעמק האלה ויערכו מלחמה לקראת פלשתים:

Segment 3
HE:
ופלשתים עמדים אל ההר מזה וישראל עמדים אל ההר מזה והגיא ביניהם:

Segment 4
HE:
ויצא איש הבנים ממחנות פלשתים גלית שמו מגת גבהו שש אמות וזרת:

Segment 5
HE:
וכובע נחשת על ראשו ושריון קשקשים הוא לבוש ומשקל השריון חמשת אלפים שקלים נחשת:

Segment 6
HE:
ומצחת נחשת על רגליו וכידון נחשת בין כתפיו:

Segment 7
HE:
(וחץ) ועץ חניתו כמנור ארגים ולהבת חניתו שש מאות שקלים ברזל ונשא הצנה הלך לפניו:

Segment 8
HE:
ויעמד ויקרא אל מערכת ישראל ויאמר להם למה תצאו לערך מלחמה הלוא אנכי הפלשתי ואתם עבדים לשאול ברו לכם איש וירד אלי:

Segment 9
HE:
אם יוכל להלחם אתי והכני והיינו לכם לעבדים ואם אני אוכל לו והכיתיו והייתם לנו לעבדים ועבדתם אתנו:

Segment 10
HE:
ויאמר הפלשתי אני חרפתי את מערכות ישראל היום הזה תנו לי איש ונלחמה יחד:

Segment 11
HE:
וישמע שאול וכל ישראל את דברי הפלשתי האלה ויחתו ויראו מאד: (פ)

Segment 12
HE:
ודוד בן איש אפרתי הזה מבית לחם יהודה ושמו ישי ולו שמנה בנים והאיש בימי שאול זקן בא באנשים:

Segment 13
HE:
וילכו שלשת בני ישי הגדלים הלכו אחרי שאול למלחמה ושם שלשת בניו אשר הלכו במלחמה אליאב הבכור ומשנהו אבינדב והשלשי שמה:

Segment 14
HE:
ודוד הוא הקטן ושלשה הגדלים הלכו אחרי שאול: (ס)

Segment 15
HE:
ודוד הלך ושב מעל שאול לרעות את צאן אביו בית לחם:

Segment 16
HE:
ויגש הפלשתי השכם והערב ויתיצב ארבעים יום: (פ)

Segment 17
HE:
ויאמר ישי לדוד בנו קח נא לאחיך איפת הקליא הזה ועשרה לחם הזה והרץ המחנה לאחיך:

Segment 18
HE:
ואת עשרת חרצי החלב האלה תביא לשר האלף ואת אחיך תפקד לשלום ואת ערבתם תקח:

Segment 19
HE:
ושאול והמה וכל איש ישראל בעמק האלה נלחמים עם פלשתים:

Segment 20
HE:
וישכם דוד בבקר ויטש את הצאן על שמר וישא וילך כאשר צוהו ישי ויבא המעגלה והחיל היצא אל המערכה והרעו במלחמה:

Segment 21
HE:
ותערך ישראל ופלשתים מערכה לקראת מערכה:

Segment 22
HE:
ויטש דוד את הכלים מעליו על יד שומר הכלים וירץ המערכה ויבא וישאל לאחיו לשלום:

Segment 23
HE:
והוא מדבר עמם והנה איש הבנים עולה גלית הפלשתי שמו מגת (ממערות) ממערכות פלשתים וידבר כדברים האלה וישמע דוד:

Segment 24
HE:
וכל איש ישראל בראותם את האיש וינסו מפניו וייראו מאד:

Segment 25
HE:
ויאמר איש ישראל הראיתם האיש העלה הזה כי לחרף את ישראל עלה והיה האיש אשר יכנו יעשרנו המלך עשר גדול ואת בתו יתן לו ואת בית אביו יעשה חפשי בישראל:

Segment 26
HE:
ויאמר דוד אל האנשים העמדים עמו לאמר מה יעשה לאיש אשר יכה את הפלשתי הלז והסיר חרפה מעל ישראל כי מי הפלשתי הערל הזה כי חרף מערכות אלהים חיים:

Segment 27
HE:
ויאמר לו העם כדבר הזה לאמר כה יעשה לאיש אשר יכנו:

Segment 28
HE:
וישמע אליאב אחיו הגדול בדברו אל האנשים ויחר אף אליאב בדוד ויאמר למה זה ירדת ועל מי נטשת מעט הצאן ההנה במדבר אני ידעתי את זדנך ואת רע לבבך כי למען ראות המלחמה ירדת:

Segment 29
HE:
ויאמר דוד מה עשיתי עתה הלוא דבר הוא:

Segment 30
HE:
ויסב מאצלו אל מול אחר ויאמר כדבר הזה וישבהו העם דבר כדבר הראשון:

Segment 31
HE:
וישמעו הדברים אשר דבר דוד ויגדו לפני שאול ויקחהו:

Segment 32
HE:
ויאמר דוד אל שאול אל יפל לב אדם עליו עבדך ילך ונלחם עם הפלשתי הזה:

Segment 33
HE:
ויאמר שאול אל דוד לא תוכל ללכת אל הפלשתי הזה להלחם עמו כי נער אתה והוא איש מלחמה מנעריו: (ס)

Segment 34
HE:
ויאמר דוד אל שאול רעה היה עבדך לאביו בצאן ובא הארי ואת הדוב ונשא שה מהעדר:

Segment 35
HE:
ויצאתי אחריו והכתיו והצלתי מפיו ויקם עלי והחזקתי בזקנו והכתיו והמיתיו:

Segment 36
HE:
גם את הארי גם הדוב הכה עבדך והיה הפלשתי הערל הזה כאחד מהם כי חרף מערכת אלהים חיים: (ס)

Segment 37
HE:
ויאמר דוד יהוה אשר הצלני מיד הארי ומיד הדב הוא יצילני מיד הפלשתי הזה (ס) ויאמר שאול אל דוד לך ויהוה יהיה עמך:

Segment 38
HE:
וילבש שאול את דוד מדיו ונתן קובע נחשת על ראשו וילבש אתו שריון:

Segment 39
HE:
ויחגר דוד את חרבו מעל למדיו ויאל ללכת כי לא נסה ויאמר דוד אל שאול לא אוכל ללכת באלה כי לא נסיתי ויסרם דוד מעליו:

Segment 40
HE:
ויקח מקלו בידו ויבחר לו חמשה חלקי אבנים מן הנחל וישם אתם בכלי הרעים אשר לו ובילקוט וקלעו בידו ויגש אל הפלשתי:

Segment 41
HE:
וילך הפלשתי הלך וקרב אל דוד והאיש נשא הצנה לפניו:

Segment 42
HE:
ויבט הפלשתי ויראה את דוד ויבזהו כי היה נער ואדמני עם יפה מראה:

Segment 43
HE:
ויאמר הפלשתי אל דוד הכלב אנכי כי אתה בא אלי במקלות ויקלל הפלשתי את דוד באלהיו:

Segment 44
HE:
ויאמר הפלשתי אל דוד לכה אלי ואתנה את בשרך לעוף השמים ולבהמת השדה: (ס)

Segment 45
HE:
ויאמר דוד אל הפלשתי אתה בא אלי בחרב ובחנית ובכידון ואנכי בא אליך בשם יהוה צבאות אלהי מערכות ישראל אשר חרפת:

Segment 46
HE:
היום הזה יסגרך יהוה בידי והכיתך והסרתי את ראשך מעליך ונתתי פגר מחנה פלשתים היום הזה לעוף השמים ולחית הארץ וידעו כל הארץ כי יש אלהים לישראל:

Segment 47
HE:
וידעו כל הקהל הזה כי לא בחרב ובחנית יהושיע יהוה כי ליהוה המלחמה ונתן אתכם בידנו:

Segment 48
HE:
והיה כי קם הפלשתי וילך ויקרב לקראת דוד וימהר דוד וירץ המערכה לקראת הפלשתי:

Segment 49
HE:
וישלח דוד את ידו אל הכלי ויקח משם אבן ויקלע ויך את הפלשתי אל מצחו ותטבע האבן במצחו ויפל על פניו ארצה:

Segment 50
HE:
ויחזק דוד מן הפלשתי בקלע ובאבן ויך את הפלשתי וימיתהו וחרב אין ביד דוד:

Segment 51
HE:
וירץ דוד ויעמד אל הפלשתי ויקח את חרבו וישלפה מתערה וימתתהו ויכרת בה את ראשו ויראו הפלשתים כי מת גבורם וינסו:

Segment 52
HE:
ויקמו אנשי ישראל ויהודה וירעו וירדפו את הפלשתים עד בואך גיא ועד שערי עקרון ויפלו חללי פלשתים בדרך שערים ועד גת ועד עקרון:

Segment 53
HE:
וישבו בני ישראל מדלק אחרי פלשתים וישסו את מחניהם:

Segment 54
HE:
ויקח דוד את ראש הפלשתי ויבאהו ירושלם ואת כליו שם באהלו: (ס)

Segment 55
HE:
וכראות שאול את דוד יצא לקראת הפלשתי אמר אל אבנר שר הצבא בן מי זה הנער אבנר ויאמר אבנר חי נפשך המלך אם ידעתי:

Segment 56
HE:
ויאמר המלך שאל אתה בן מי זה העלם: (ס)

Segment 57
HE:
וכשוב דוד מהכות את הפלשתי ויקח אתו אבנר ויבאהו לפני שאול וראש הפלשתי בידו:

Segment 58
HE:
ויאמר אליו שאול בן מי אתה הנער ויאמר דוד בן עבדך ישי בית הלחמי:



# Samuel 1 Chapter 18
URL: https://ajew.org/reader-plain/tanach-shmuel-a/1/18/

Samuel 1 Chapter 18
שמואל א פרק יח
Source: https://ajew.org/reader/tanach-shmuel-a/1/18

Segment 1
HE:
ויהי ככלתו לדבר אל שאול ונפש יהונתן נקשרה בנפש דוד (ויאהבו) ויאהבהו יהונתן כנפשו:

Segment 2
HE:
ויקחהו שאול ביום ההוא ולא נתנו לשוב בית אביו:

Segment 3
HE:
ויכרת יהונתן ודוד ברית באהבתו אתו כנפשו:

Segment 4
HE:
ויתפשט יהונתן את המעיל אשר עליו ויתנהו לדוד ומדיו ועד חרבו ועד קשתו ועד חגרו:

Segment 5
HE:
ויצא דוד בכל אשר ישלחנו שאול ישכיל וישמהו שאול על אנשי המלחמה וייטב בעיני כל העם וגם בעיני עבדי שאול: (פ)

Segment 6
HE:
ויהי בבואם בשוב דוד מהכות את הפלשתי ותצאנה הנשים מכל ערי ישראל (לשור) לשיר והמחלות לקראת שאול המלך בתפים בשמחה ובשלשים:

Segment 7
HE:
ותענינה הנשים המשחקות ותאמרן הכה שאול (באלפו) באלפיו ודוד ברבבתיו:

Segment 8
HE:
ויחר לשאול מאד וירע בעיניו הדבר הזה ויאמר נתנו לדוד רבבות ולי נתנו האלפים ועוד לו אך המלוכה:

Segment 9
HE:
ויהי שאול (עון) עוין את דוד מהיום ההוא והלאה: (ס)

Segment 10
HE:
ויהי ממחרת ותצלח רוח אלהים רעה אל שאול ויתנבא בתוך הבית ודוד מנגן בידו כיום ביום והחנית ביד שאול:

Segment 11
HE:
ויטל שאול את החנית ויאמר אכה בדוד ובקיר ויסב דוד מפניו פעמים:

Segment 12
HE:
וירא שאול מלפני דוד כי היה יהוה עמו ומעם שאול סר:

Segment 13
HE:
ויסרהו שאול מעמו וישמהו לו שר אלף ויצא ויבא לפני העם: (פ)

Segment 14
HE:
ויהי דוד לכל דרכו משכיל ויהוה עמו:

Segment 15
HE:
וירא שאול אשר הוא משכיל מאד ויגר מפניו:

Segment 16
HE:
וכל ישראל ויהודה אהב את דוד כי הוא יוצא ובא לפניהם: (פ)

Segment 17
HE:
ויאמר שאול אל דוד הנה בתי הגדולה מרב אתה אתן לך לאשה אך היה לי לבן חיל והלחם מלחמות יהוה ושאול אמר אל תהי ידי בו ותהי בו יד פלשתים: (ס)

Segment 18
HE:
ויאמר דוד אל שאול מי אנכי ומי חיי משפחת אבי בישראל כי אהיה חתן למלך:

Segment 19
HE:
ויהי בעת תת את מרב בת שאול לדוד והיא נתנה לעדריאל המחלתי לאשה:

Segment 20
HE:
ותאהב מיכל בת שאול את דוד ויגדו לשאול וישר הדבר בעיניו:

Segment 21
HE:
ויאמר שאול אתננה לו ותהי לו למוקש ותהי בו יד פלשתים ויאמר שאול אל דוד בשתים תתחתן בי היום:

Segment 22
HE:
ויצו שאול את עבדו דברו אל דוד בלט לאמר הנה חפץ בך המלך וכל עבדיו אהבוך ועתה התחתן במלך:

Segment 23
HE:
וידברו עבדי שאול באזני דוד את הדברים האלה ויאמר דוד הנקלה בעיניכם התחתן במלך ואנכי איש רש ונקלה:

Segment 24
HE:
ויגדו עבדי שאול לו לאמר כדברים האלה דבר דוד: (פ)

Segment 25
HE:
ויאמר שאול כה תאמרו לדוד אין חפץ למלך במהר כי במאה ערלות פלשתים להנקם באיבי המלך ושאול חשב להפיל את דוד ביד פלשתים:

Segment 26
HE:
ויגדו עבדיו לדוד את הדברים האלה וישר הדבר בעיני דוד להתחתן במלך ולא מלאו הימים:

Segment 27
HE:
ויקם דוד וילך הוא ואנשיו ויך בפלשתים מאתים איש ויבא דוד את ערלתיהם וימלאום למלך להתחתן במלך ויתן לו שאול את מיכל בתו לאשה: (ס)

Segment 28
HE:
וירא שאול וידע כי יהוה עם דוד ומיכל בת שאול אהבתהו:

Segment 29
HE:
ויאסף שאול לרא מפני דוד עוד ויהי שאול איב את דוד כל הימים: (ס)

Segment 30
HE:
ויצאו שרי פלשתים ויהי מדי צאתם שכל דוד מכל עבדי שאול וייקר שמו מאד: (ס)



# Samuel 1 Chapter 19
URL: https://ajew.org/reader-plain/tanach-shmuel-a/1/19/

Samuel 1 Chapter 19
שמואל א פרק יט
Source: https://ajew.org/reader/tanach-shmuel-a/1/19

Segment 1
HE:
וידבר שאול אל יונתן בנו ואל כל עבדיו להמית את דוד ויהונתן בן שאול חפץ בדוד מאד:

Segment 2
HE:
ויגד יהונתן לדוד לאמר מבקש שאול אבי להמיתך ועתה השמר נא בבקר וישבת בסתר ונחבאת:

Segment 3
HE:
ואני אצא ועמדתי ליד אבי בשדה אשר אתה שם ואני אדבר בך אל אבי וראיתי מה והגדתי לך: (ס)

Segment 4
HE:
וידבר יהונתן בדוד טוב אל שאול אביו ויאמר אליו אל יחטא המלך בעבדו בדוד כי לוא חטא לך וכי מעשיו טוב לך מאד:

Segment 5
HE:
וישם את נפשו בכפו ויך את הפלשתי ויעש יהוה תשועה גדולה לכל ישראל ראית ותשמח ולמה תחטא בדם נקי להמית את דוד חנם:

Segment 6
HE:
וישמע שאול בקול יהונתן וישבע שאול חי יהוה אם יומת:

Segment 7
HE:
ויקרא יהונתן לדוד ויגד לו יהונתן את כל הדברים האלה ויבא יהונתן את דוד אל שאול ויהי לפניו כאתמול שלשום: (ס)

Segment 8
HE:
ותוסף המלחמה להיות ויצא דוד וילחם בפלשתים ויך בהם מכה גדולה וינסו מפניו:

Segment 9
HE:
ותהי רוח יהוה רעה אל שאול והוא בביתו יושב וחניתו בידו ודוד מנגן ביד:

Segment 10
HE:
ויבקש שאול להכות בחנית בדוד ובקיר ויפטר מפני שאול ויך את החנית בקיר ודוד נס וימלט בלילה הוא: (פ)

Segment 11
HE:
וישלח שאול מלאכים אל בית דוד לשמרו ולהמיתו בבקר ותגד לדוד מיכל אשתו לאמר אם אינך ממלט את נפשך הלילה מחר אתה מומת:

Segment 12
HE:
ותרד מיכל את דוד בעד החלון וילך ויברח וימלט:

Segment 13
HE:
ותקח מיכל את התרפים ותשם אל המטה ואת כביר העזים שמה מראשתיו ותכס בבגד: (ס)

Segment 14
HE:
וישלח שאול מלאכים לקחת את דוד ותאמר חלה הוא: (פ)

Segment 15
HE:
וישלח שאול את המלאכים לראות את דוד לאמר העלו אתו במטה אלי להמתו:

Segment 16
HE:
ויבאו המלאכים והנה התרפים אל המטה וכביר העזים מראשתיו:

Segment 17
HE:
ויאמר שאול אל מיכל למה ככה רמיתני ותשלחי את איבי וימלט ותאמר מיכל אל שאול הוא אמר אלי שלחני למה אמיתך:

Segment 18
HE:
ודוד ברח וימלט ויבא אל שמואל הרמתה ויגד לו את כל אשר עשה לו שאול וילך הוא ושמואל וישבו (בנוית) בניות:

Segment 19
HE:
ויגד לשאול לאמר הנה דוד (בנוית) בניות ברמה:

Segment 20
HE:
וישלח שאול מלאכים לקחת את דוד וירא את להקת הנביאים נבאים ושמואל עמד נצב עליהם ותהי על מלאכי שאול רוח אלהים ויתנבאו גם המה:

Segment 21
HE:
ויגדו לשאול וישלח מלאכים אחרים ויתנבאו גם המה ויסף שאול וישלח מלאכים שלשים ויתנבאו גם המה:

Segment 22
HE:
וילך גם הוא הרמתה ויבא עד בור הגדול אשר בשכו וישאל ויאמר איפה שמואל ודוד ויאמר הנה (בנוית) בניות ברמה:

Segment 23
HE:
וילך שם אל (נוית) ניות ברמה ותהי עליו גם הוא רוח אלהים וילך הלוך ויתנבא עד באו (בנוית) בניות ברמה:

Segment 24
HE:
ויפשט גם הוא בגדיו ויתנבא גם הוא לפני שמואל ויפל ערם כל היום ההוא וכל הלילה על כן יאמרו הגם שאול בנביאם: (פ)



# Samuel 1 Chapter 2
URL: https://ajew.org/reader-plain/tanach-shmuel-a/1/2/

Samuel 1 Chapter 2
שמואל א פרק ב
Source: https://ajew.org/reader/tanach-shmuel-a/1/2

Segment 1
HE:
ותתפלל חנה ותאמר עלץ לבי ביהוה רמה קרני ביהוה רחב פי על אויבי כי שמחתי בישועתך:

Segment 2
HE:
אין קדוש כיהוה כי אין בלתך ואין צור כאלהינו:

Segment 3
HE:
אל תרבו תדברו גבהה גבהה יצא עתק מפיכם כי אל דעות יהוה (ולא) ולו נתכנו עללות:

Segment 4
HE:
קשת גברים חתים ונכשלים אזרו חיל:

Segment 5
HE:
שבעים בלחם נשכרו ורעבים חדלו עד עקרה ילדה שבעה ורבת בנים אמללה:

Segment 6
HE:
יהוה ממית ומחיה מוריד שאול ויעל:

Segment 7
HE:
יהוה מוריש ומעשיר משפיל אף מרומם:

Segment 8
HE:
מקים מעפר דל מאשפת ירים אביון להושיב עם נדיבים וכסא כבוד ינחלם כי ליהוה מצקי ארץ וישת עליהם תבל:

Segment 9
HE:
רגלי (חסידו) חסידיו ישמר ורשעים בחשך ידמו כי לא בכח יגבר איש:

Segment 10
HE:
יהוה יחתו (מריבו) מריביו (עלו) עליו בשמים ירעם יהוה ידין אפסי ארץ ויתן עז למלכו וירם קרן משיחו: (פ)

Segment 11
HE:
וילך אלקנה הרמתה על ביתו והנער היה משרת את יהוה את פני עלי הכהן:

Segment 12
HE:
ובני עלי בני בליעל לא ידעו את יהוה:

Segment 13
HE:
ומשפט הכהנים את העם כל איש זבח זבח ובא נער הכהן כבשל הבשר והמזלג שלש השנים בידו:

Segment 14
HE:
והכה בכיור או בדוד או בקלחת או בפרור כל אשר יעלה המזלג יקח הכהן בו ככה יעשו לכל ישראל הבאים שם בשלה:

Segment 15
HE:
גם בטרם יקטרון את החלב ובא נער הכהן ואמר לאיש הזבח תנה בשר לצלות לכהן ולא יקח ממך בשר מבשל כי אם חי:

Segment 16
HE:
ויאמר אליו האיש קטר יקטירון כיום החלב וקח לך כאשר תאוה נפשך ואמר (לו) לא כי עתה תתן ואם לא לקחתי בחזקה:

Segment 17
HE:
ותהי חטאת הנערים גדולה מאד את פני יהוה כי נאצו האנשים את מנחת יהוה:

Segment 18
HE:
ושמואל משרת את פני יהוה נער חגור אפוד בד:

Segment 19
HE:
ומעיל קטן תעשה לו אמו והעלתה לו מימים ימימה בעלותה את אישה לזבח את זבח הימים:

Segment 20
HE:
וברך עלי את אלקנה ואת אשתו ואמר ישם יהוה לך זרע מן האשה הזאת תחת השאלה אשר שאל ליהוה והלכו למקמו:

Segment 21
HE:
כי פקד יהוה את חנה ותהר ותלד שלשה בנים ושתי בנות ויגדל הנער שמואל עם יהוה: (ס)

Segment 22
HE:
ועלי זקן מאד ושמע את כל אשר יעשון בניו לכל ישראל ואת אשר ישכבון את הנשים הצבאות פתח אהל מועד:

Segment 23
HE:
ויאמר להם למה תעשון כדברים האלה אשר אנכי שמע את דבריכם רעים מאת כל העם אלה:

Segment 24
HE:
אל בני כי לוא טובה השמעה אשר אנכי שמע מעברים עם יהוה:

Segment 25
HE:
אם יחטא איש לאיש ופללו אלהים ואם ליהוה יחטא איש מי יתפלל לו ולא ישמעו לקול אביהם כי חפץ יהוה להמיתם:

Segment 26
HE:
והנער שמואל הלך וגדל וטוב גם עם יהוה וגם עם אנשים: (ס)

Segment 27
HE:
ויבא איש אלהים אל עלי ויאמר אליו כה אמר יהוה הנגלה נגליתי אל בית אביך בהיותם במצרים לבית פרעה:

Segment 28
HE:
ובחר אתו מכל שבטי ישראל לי לכהן לעלות על מזבחי להקטיר קטרת לשאת אפוד לפני ואתנה לבית אביך את כל אשי בני ישראל:

Segment 29
HE:
למה תבעטו בזבחי ובמנחתי אשר צויתי מעון ותכבד את בניך ממני להבריאכם מראשית כל מנחת ישראל לעמי:

Segment 30
HE:
לכן נאם יהוה אלהי ישראל אמור אמרתי ביתך ובית אביך יתהלכו לפני עד עולם ועתה נאם יהוה חלילה לי כי מכבדי אכבד ובזי יקלו:

Segment 31
HE:
הנה ימים באים וגדעתי את זרעך ואת זרע בית אביך מהיות זקן בביתך:

Segment 32
HE:
והבטת צר מעון בכל אשר ייטיב את ישראל ולא יהיה זקן בביתך כל הימים:

Segment 33
HE:
ואיש לא אכרית לך מעם מזבחי לכלות את עיניך ולאדיב את נפשך וכל מרבית ביתך ימותו אנשים:

Segment 34
HE:
וזה לך האות אשר יבא אל שני בניך אל חפני ופינחס ביום אחד ימותו שניהם:

Segment 35
HE:
והקימתי לי כהן נאמן כאשר בלבבי ובנפשי יעשה ובניתי לו בית נאמן והתהלך לפני משיחי כל הימים:

Segment 36
HE:
והיה כל הנותר בביתך יבוא להשתחות לו לאגורת כסף וככר לחם ואמר ספחני נא אל אחת הכהנות לאכל פת לחם: (ס)



# Samuel 1 Chapter 20
URL: https://ajew.org/reader-plain/tanach-shmuel-a/1/20/

Samuel 1 Chapter 20
שמואל א פרק כ
Source: https://ajew.org/reader/tanach-shmuel-a/1/20

Segment 1
HE:
ויברח דוד (מנוות) מניות ברמה ויבא ויאמר לפני יהונתן מה עשיתי מה עוני ומה חטאתי לפני אביך כי מבקש את נפשי:

Segment 2
HE:
ויאמר לו חלילה לא תמות הנה (לו) (עשה) לא יעשה אבי דבר גדול או דבר קטן ולא יגלה את אזני ומדוע יסתיר אבי ממני את הדבר הזה אין זאת:

Segment 3
HE:
וישבע עוד דוד ויאמר ידע ידע אביך כי מצאתי חן בעיניך ויאמר אל ידע זאת יהונתן פן יעצב ואולם חי יהוה וחי נפשך כי כפשע ביני ובין המות:

Segment 4
HE:
ויאמר יהונתן אל דוד מה תאמר נפשך ואעשה לך: (פ)

Segment 5
HE:
ויאמר דוד אל יהונתן הנה חדש מחר ואנכי ישב אשב עם המלך לאכול ושלחתני ונסתרתי בשדה עד הערב השלשית:

Segment 6
HE:
אם פקד יפקדני אביך ואמרת נשאל נשאל ממני דוד לרוץ בית לחם עירו כי זבח הימים שם לכל המשפחה:

Segment 7
HE:
אם כה יאמר טוב שלום לעבדך ואם חרה יחרה לו דע כי כלתה הרעה מעמו:

Segment 8
HE:
ועשית חסד על עבדך כי בברית יהוה הבאת את עבדך עמך ואם יש בי עון המיתני אתה ועד אביך למה זה תביאני: (פ)

Segment 9
HE:
ויאמר יהונתן חלילה לך כי אם ידע אדע כי כלתה הרעה מעם אבי לבוא עליך ולא אתה אגיד לך: (ס)

Segment 10
HE:
ויאמר דוד אל יהונתן מי יגיד לי או מה יענך אביך קשה: (ס)

Segment 11
HE:
ויאמר יהונתן אל דוד לכה ונצא השדה ויצאו שניהם השדה: (ס)

Segment 12
HE:
ויאמר יהונתן אל דוד יהוה אלהי ישראל כי אחקר את אבי כעת מחר השלשית והנה טוב אל דוד ולא אז אשלח אליך וגליתי את אזנך:

Segment 13
HE:
כה יעשה יהוה ליהונתן וכה יסיף כי ייטב אל אבי את הרעה עליך וגליתי את אזנך ושלחתיך והלכת לשלום ויהי יהוה עמך כאשר היה עם אבי:

Segment 14
HE:
ולא אם עודני חי ולא תעשה עמדי חסד יהוה ולא אמות:

Segment 15
HE:
ולא תכרת את חסדך מעם ביתי עד עולם ולא בהכרת יהוה את איבי דוד איש מעל פני האדמה:

Segment 16
HE:
ויכרת יהונתן עם בית דוד ובקש יהוה מיד איבי דוד:

Segment 17
HE:
ויוסף יהונתן להשביע את דוד באהבתו אתו כי אהבת נפשו אהבו: (ס)

Segment 18
HE:
ויאמר לו יהונתן מחר חדש ונפקדת כי יפקד מושבך:

Segment 19
HE:
ושלשת תרד מאד ובאת אל המקום אשר נסתרת שם ביום המעשה וישבת אצל האבן האזל:

Segment 20
HE:
ואני שלשת החצים צדה אורה לשלח לי למטרה:

Segment 21
HE:
והנה אשלח את הנער לך מצא את החצים אם אמר אמר לנער הנה החצים ממך והנה קחנו ובאה כי שלום לך ואין דבר חי יהוה:

Segment 22
HE:
ואם כה אמר לעלם הנה החצים ממך והלאה לך כי שלחך יהוה:

Segment 23
HE:
והדבר אשר דברנו אני ואתה הנה יהוה ביני ובינך עד עולם: (ס)

Segment 24
HE:
ויסתר דוד בשדה ויהי החדש וישב המלך (על) אל הלחם לאכול:

Segment 25
HE:
וישב המלך על מושבו כפעם בפעם אל מושב הקיר ויקם יהונתן וישב אבנר מצד שאול ויפקד מקום דוד:

Segment 26
HE:
ולא דבר שאול מאומה ביום ההוא כי אמר מקרה הוא בלתי טהור הוא כי לא טהור: (ס)

Segment 27
HE:
ויהי ממחרת החדש השני ויפקד מקום דוד (ס) ויאמר שאול אל יהונתן בנו מדוע לא בא בן ישי גם תמול גם היום אל הלחם:

Segment 28
HE:
ויען יהונתן את שאול נשאל נשאל דוד מעמדי עד בית לחם:

Segment 29
HE:
ויאמר שלחני נא כי זבח משפחה לנו בעיר והוא צוה לי אחי ועתה אם מצאתי חן בעיניך אמלטה נא ואראה את אחי על כן לא בא אל שלחן המלך: (ס)

Segment 30
HE:
ויחר אף שאול ביהונתן ויאמר לו בן נעות המרדות הלוא ידעתי כי בחר אתה לבן ישי לבשתך ולבשת ערות אמך:

Segment 31
HE:
כי כל הימים אשר בן ישי חי על האדמה לא תכון אתה ומלכותך ועתה שלח וקח אתו אלי כי בן מות הוא: (ס)

Segment 32
HE:
ויען יהונתן את שאול אביו ויאמר אליו למה יומת מה עשה:

Segment 33
HE:
ויטל שאול את החנית עליו להכתו וידע יהונתן כי כלה היא מעם אביו להמית את דוד: (ס)

Segment 34
HE:
ויקם יהונתן מעם השלחן בחרי אף ולא אכל ביום החדש השני לחם כי נעצב אל דוד כי הכלמו אביו: (ס)

Segment 35
HE:
ויהי בבקר ויצא יהונתן השדה למועד דוד ונער קטן עמו:

Segment 36
HE:
ויאמר לנערו רץ מצא נא את החצים אשר אנכי מורה הנער רץ והוא ירה החצי להעברו:

Segment 37
HE:
ויבא הנער עד מקום החצי אשר ירה יהונתן ויקרא יהונתן אחרי הנער ויאמר הלוא החצי ממך והלאה:

Segment 38
HE:
ויקרא יהונתן אחרי הנער מהרה חושה אל תעמד וילקט נער יהונתן את (החצי) החצים ויבא אל אדניו:

Segment 39
HE:
והנער לא ידע מאומה אך יהונתן ודוד ידעו את הדבר:

Segment 40
HE:
ויתן יהונתן את כליו אל הנער אשר לו ויאמר לו לך הביא העיר:

Segment 41
HE:
הנער בא ודוד קם מאצל הנגב ויפל לאפיו ארצה וישתחו שלש פעמים וישקו איש את רעהו ויבכו איש את רעהו עד דוד הגדיל:

Segment 42
HE:
ויאמר יהונתן לדוד לך לשלום אשר נשבענו שנינו אנחנו בשם יהוה לאמר יהוה יהיה ביני ובינך ובין זרעי ובין זרעך עד עולם: (פ)



# Samuel 1 Chapter 21
URL: https://ajew.org/reader-plain/tanach-shmuel-a/1/21/

Samuel 1 Chapter 21
שמואל א פרק כא
Source: https://ajew.org/reader/tanach-shmuel-a/1/21

Segment 1
HE:
ויקם וילך ויהונתן בא העיר:

Segment 2
HE:
ויבא דוד נבה אל אחימלך הכהן ויחרד אחימלך לקראת דוד ויאמר לו מדוע אתה לבדך ואיש אין אתך:

Segment 3
HE:
ויאמר דוד לאחימלך הכהן המלך צוני דבר ויאמר אלי איש אל ידע מאומה את הדבר אשר אנכי שלחך ואשר צויתך ואת הנערים יודעתי אל מקום פלני אלמוני:

Segment 4
HE:
ועתה מה יש תחת ידך חמשה לחם תנה בידי או הנמצא:

Segment 5
HE:
ויען הכהן את דוד ויאמר אין לחם חל אל תחת ידי כי אם לחם קדש יש אם נשמרו הנערים אך מאשה: (פ)

Segment 6
HE:
ויען דוד את הכהן ויאמר לו כי אם אשה עצרה לנו כתמול שלשם בצאתי ויהיו כלי הנערים קדש והוא דרך חל ואף כי היום יקדש בכלי:

Segment 7
HE:
ויתן לו הכהן קדש כי לא היה שם לחם כי אם לחם הפנים המוסרים מלפני יהוה לשום לחם חם ביום הלקחו:

Segment 8
HE:
ושם איש מעבדי שאול ביום ההוא נעצר לפני יהוה ושמו דאג האדמי אביר הרעים אשר לשאול:

Segment 9
HE:
ויאמר דוד לאחימלך ואין יש פה תחת ידך חנית או חרב כי גם חרבי וגם כלי לא לקחתי בידי כי היה דבר המלך נחוץ: (ס)

Segment 10
HE:
ויאמר הכהן חרב גלית הפלשתי אשר הכית בעמק האלה הנה היא לוטה בשמלה אחרי האפוד אם אתה תקח לך קח כי אין אחרת זולתה בזה ויאמר דוד אין כמוה תננה לי:

Segment 11
HE:
ויקם דוד ויברח ביום ההוא מפני שאול ויבא אל אכיש מלך גת:

Segment 12
HE:
ויאמרו עבדי אכיש אליו הלוא זה דוד מלך הארץ הלוא לזה יענו במחלות לאמר הכה שאול (באלפו) באלפיו ודוד (ברבבתו) ברבבתיו:

Segment 13
HE:
וישם דוד את הדברים האלה בלבבו וירא מאד מפני אכיש מלך גת:

Segment 14
HE:
וישנו את טעמו בעיניהם ויתהלל בידם (ויתו) ויתיו על דלתות השער ויורד רירו אל זקנו:

Segment 15
HE:
ויאמר אכיש אל עבדיו הנה תראו איש משתגע למה תביאו אתו אלי:

Segment 16
HE:
חסר משגעים אני כי הבאתם את זה להשתגע עלי הזה יבוא אל ביתי: (ס)



# Samuel 1 Chapter 22
URL: https://ajew.org/reader-plain/tanach-shmuel-a/1/22/

Samuel 1 Chapter 22
שמואל א פרק כב
Source: https://ajew.org/reader/tanach-shmuel-a/1/22

Segment 1
HE:
וילך דוד משם וימלט אל מערת עדלם וישמעו אחיו וכל בית אביו וירדו אליו שמה:

Segment 2
HE:
ויתקבצו אליו כל איש מצוק וכל איש אשר לו נשא וכל איש מר נפש ויהי עליהם לשר ויהיו עמו כארבע מאות איש:

Segment 3
HE:
וילך דוד משם מצפה מואב ויאמר אל מלך מואב יצא נא אבי ואמי אתכם עד אשר אדע מה יעשה לי אלהים:

Segment 4
HE:
וינחם את פני מלך מואב וישבו עמו כל ימי היות דוד במצודה: (ס)

Segment 5
HE:
ויאמר גד הנביא אל דוד לא תשב במצודה לך ובאת לך ארץ יהודה וילך דוד ויבא יער חרת: (ס)

Segment 6
HE:
וישמע שאול כי נודע דוד ואנשים אשר אתו ושאול יושב בגבעה תחת האשל ברמה וחניתו בידו וכל עבדיו נצבים עליו:

Segment 7
HE:
ויאמר שאול לעבדיו הנצבים עליו שמעו נא בני ימיני גם לכלכם יתן בן ישי שדות וכרמים לכלכם ישים שרי אלפים ושרי מאות:

Segment 8
HE:
כי קשרתם כלכם עלי ואין גלה את אזני בכרת בני עם בן ישי ואין חלה מכם עלי וגלה את אזני כי הקים בני את עבדי עלי לארב כיום הזה: (ס)

Segment 9
HE:
ויען דאג האדמי והוא נצב על עבדי שאול ויאמר ראיתי את בן ישי בא נבה אל אחימלך בן אחטוב:

Segment 10
HE:
וישאל לו ביהוה וצידה נתן לו ואת חרב גלית הפלשתי נתן לו:

Segment 11
HE:
וישלח המלך לקרא את אחימלך בן אחיטוב הכהן ואת כל בית אביו הכהנים אשר בנב ויבאו כלם אל המלך: (ס)

Segment 12
HE:
ויאמר שאול שמע נא בן אחיטוב ויאמר הנני אדני:

Segment 13
HE:
ויאמר (אלו) אליו שאול למה קשרתם עלי אתה ובן ישי בתתך לו לחם וחרב ושאול לו באלהים לקום אלי לארב כיום הזה: (ס)

Segment 14
HE:
ויען אחימלך את המלך ויאמר ומי בכל עבדיך כדוד נאמן וחתן המלך וסר אל משמעתך ונכבד בביתך:

Segment 15
HE:
היום החלתי (לשאול) לשאל לו באלהים חלילה לי אל ישם המלך בעבדו דבר בכל בית אבי כי לא ידע עבדך בכל זאת דבר קטן או גדול:

Segment 16
HE:
ויאמר המלך מות תמות אחימלך אתה וכל בית אביך:

Segment 17
HE:
ויאמר המלך לרצים הנצבים עליו סבו והמיתו כהני יהוה כי גם ידם עם דוד וכי ידעו כי ברח הוא ולא גלו את (אזנו) אזני ולא אבו עבדי המלך לשלח את ידם לפגע בכהני יהוה: (ס)

Segment 18
HE:
ויאמר המלך (לדויג) לדואג סב אתה ופגע בכהנים ויסב (דויג) דואג האדמי ויפגע הוא בכהנים וימת ביום ההוא שמנים וחמשה איש נשא אפוד בד:

Segment 19
HE:
ואת נב עיר הכהנים הכה לפי חרב מאיש ועד אשה מעולל ועד יונק ושור וחמור ושה לפי חרב:

Segment 20
HE:
וימלט בן אחד לאחימלך בן אחטוב ושמו אביתר ויברח אחרי דוד:

Segment 21
HE:
ויגד אביתר לדוד כי הרג שאול את כהני יהוה:

Segment 22
HE:
ויאמר דוד לאביתר ידעתי ביום ההוא כי שם (דויג) דואג האדמי כי הגד יגיד לשאול אנכי סבתי בכל נפש בית אביך:

Segment 23
HE:
שבה אתי אל תירא כי אשר יבקש את נפשי יבקש את נפשך כי משמרת אתה עמדי:



# Samuel 1 Chapter 23
URL: https://ajew.org/reader-plain/tanach-shmuel-a/1/23/

Samuel 1 Chapter 23
שמואל א פרק כג
Source: https://ajew.org/reader/tanach-shmuel-a/1/23

Segment 1
HE:
ויגדו לדוד לאמר הנה פלשתים נלחמים בקעילה והמה שסים את הגרנות:

Segment 2
HE:
וישאל דוד ביהוה לאמר האלך והכיתי בפלשתים האלה (ס) ויאמר יהוה אל דוד לך והכית בפלשתים והושעת את קעילה:

Segment 3
HE:
ויאמרו אנשי דוד אליו הנה אנחנו פה ביהודה יראים ואף כי נלך קעלה אל מערכות פלשתים: (ס)

Segment 4
HE:
ויוסף עוד דוד לשאל ביהוה (ס) ויענהו יהוה ויאמר קום רד קעילה כי אני נתן את פלשתים בידך:

Segment 5
HE:
וילך דוד (ואנשו) ואנשיו קעילה וילחם בפלשתים וינהג את מקניהם ויך בהם מכה גדולה וישע דוד את ישבי קעילה: (ס)

Segment 6
HE:
ויהי בברח אביתר בן אחימלך אל דוד קעילה אפוד ירד בידו:

Segment 7
HE:
ויגד לשאול כי בא דוד קעילה ויאמר שאול נכר אתו אלהים בידי כי נסגר לבוא בעיר דלתים ובריח:

Segment 8
HE:
וישמע שאול את כל העם למלחמה לרדת קעילה לצור אל דוד ואל אנשיו:

Segment 9
HE:
וידע דוד כי עליו שאול מחריש הרעה ויאמר אל אביתר הכהן הגישה האפוד: (ס)

Segment 10
HE:
ויאמר דוד יהוה אלהי ישראל שמע שמע עבדך כי מבקש שאול לבוא אל קעילה לשחת לעיר בעבורי:

Segment 11
HE:
היסגרני בעלי קעילה בידו הירד שאול כאשר שמע עבדך יהוה אלהי ישראל הגד נא לעבדך (ס) ויאמר יהוה ירד:

Segment 12
HE:
ויאמר דוד היסגרו בעלי קעילה אתי ואת אנשי ביד שאול ויאמר יהוה יסגירו: (ס)

Segment 13
HE:
ויקם דוד ואנשיו כשש מאות איש ויצאו מקעלה ויתהלכו באשר יתהלכו ולשאול הגד כי נמלט דוד מקעילה ויחדל לצאת:

Segment 14
HE:
וישב דוד במדבר במצדות וישב בהר במדבר זיף ויבקשהו שאול כל הימים ולא נתנו אלהים בידו:

Segment 15
HE:
וירא דוד כי יצא שאול לבקש את נפשו ודוד במדבר זיף בחרשה: (ס)

Segment 16
HE:
ויקם יהונתן בן שאול וילך אל דוד חרשה ויחזק את ידו באלהים:

Segment 17
HE:
ויאמר אליו אל תירא כי לא תמצאך יד שאול אבי ואתה תמלך על ישראל ואנכי אהיה לך למשנה וגם שאול אבי ידע כן:

Segment 18
HE:
ויכרתו שניהם ברית לפני יהוה וישב דוד בחרשה ויהונתן הלך לביתו: (ס)

Segment 19
HE:
ויעלו זפים אל שאול הגבעתה לאמר הלוא דוד מסתתר עמנו במצדות בחרשה בגבעת החכילה אשר מימין הישימון:

Segment 20
HE:
ועתה לכל אות נפשך המלך לרדת רד ולנו הסגירו ביד המלך:

Segment 21
HE:
ויאמר שאול ברוכים אתם ליהוה כי חמלתם עלי:

Segment 22
HE:
לכו נא הכינו עוד ודעו וראו את מקומו אשר תהיה רגלו מי ראהו שם כי אמר אלי ערום יערם הוא:

Segment 23
HE:
וראו ודעו מכל המחבאים אשר יתחבא שם ושבתם אלי אל נכון והלכתי אתכם והיה אם ישנו בארץ וחפשתי אתו בכל אלפי יהודה:

Segment 24
HE:
ויקומו וילכו זיפה לפני שאול ודוד ואנשיו במדבר מעון בערבה אל ימין הישימון:

Segment 25
HE:
וילך שאול ואנשיו לבקש ויגדו לדוד וירד הסלע וישב במדבר מעון וישמע שאול וירדף אחרי דוד מדבר מעון:

Segment 26
HE:
וילך שאול מצד ההר מזה ודוד ואנשיו מצד ההר מזה ויהי דוד נחפז ללכת מפני שאול ושאול ואנשיו עטרים אל דוד ואל אנשיו לתפשם:

Segment 27
HE:
ומלאך בא אל שאול לאמר מהרה ולכה כי פשטו פלשתים על הארץ:

Segment 28
HE:
וישב שאול מרדף אחרי דוד וילך לקראת פלשתים על כן קראו למקום ההוא סלע המחלקות:



# Samuel 1 Chapter 24
URL: https://ajew.org/reader-plain/tanach-shmuel-a/1/24/

Samuel 1 Chapter 24
שמואל א פרק כד
Source: https://ajew.org/reader/tanach-shmuel-a/1/24

Segment 1
HE:
ויעל דוד משם וישב במצדות עין גדי: (ס)

Segment 2
HE:
ויהי כאשר שב שאול מאחרי פלשתים ויגדו לו לאמר הנה דוד במדבר עין גדי:

Segment 3
HE:
ויקח שאול שלשת אלפים איש בחור מכל ישראל וילך לבקש את דוד ואנשיו על פני צורי היעלים:

Segment 4
HE:
ויבא אל גדרות הצאן על הדרך ושם מערה ויבא שאול להסך את רגליו ודוד ואנשיו בירכתי המערה ישבים:

Segment 5
HE:
ויאמרו אנשי דוד אליו הנה היום אשר אמר יהוה אליך הנה אנכי נתן את (איביך) איבך בידך ועשית לו כאשר יטב בעיניך ויקם דוד ויכרת את כנף המעיל אשר לשאול בלט: (ס)

Segment 6
HE:
ויהי אחרי כן ויך לב דוד אתו על אשר כרת את כנף אשר לשאול:

Segment 7
HE:
ויאמר לאנשיו חלילה לי מיהוה אם אעשה את הדבר הזה לאדני למשיח יהוה לשלח ידי בו כי משיח יהוה הוא: (ס)

Segment 8
HE:
וישסע דוד את אנשיו בדברים ולא נתנם לקום אל שאול ושאול קם מהמערה וילך בדרך: (ס)

Segment 9
HE:
ויקם דוד אחרי כן ויצא (מן) (המערה) מהמערה ויקרא אחרי שאול לאמר אדני המלך ויבט שאול אחריו ויקד דוד אפים ארצה וישתחו:

Segment 10
HE:
ויאמר דוד לשאול למה תשמע את דברי אדם לאמר הנה דוד מבקש רעתך:

Segment 11
HE:
הנה היום הזה ראו עיניך את אשר נתנך יהוה היום בידי במערה ואמר להרגך ותחס עליך ואמר לא אשלח ידי באדני כי משיח יהוה הוא:

Segment 12
HE:
ואבי ראה גם ראה את כנף מעילך בידי כי בכרתי את כנף מעילך ולא הרגתיך דע וראה כי אין בידי רעה ופשע ולא חטאתי לך ואתה צדה את נפשי לקחתה:

Segment 13
HE:
ישפט יהוה ביני ובינך ונקמני יהוה ממך וידי לא תהיה בך:

Segment 14
HE:
כאשר יאמר משל הקדמני מרשעים יצא רשע וידי לא תהיה בך:

Segment 15
HE:
אחרי מי יצא מלך ישראל אחרי מי אתה רדף אחרי כלב מת אחרי פרעש אחד: (פ)

Segment 16
HE:
והיה יהוה לדין ושפט ביני ובינך וירא וירב את ריבי וישפטני מידך:

Segment 17
HE:
ויהי ככלות דוד לדבר את הדברים האלה אל שאול ויאמר שאול הקלך זה בני דוד וישא שאול קלו ויבך:

Segment 18
HE:
ויאמר אל דוד צדיק אתה ממני כי אתה גמלתני הטובה ואני גמלתיך הרעה:

Segment 19
HE:
(ואת) ואתה הגדת היום את אשר עשיתה אתי טובה את אשר סגרני יהוה בידך ולא הרגתני:

Segment 20
HE:
וכי ימצא איש את איבו ושלחו בדרך טובה ויהוה ישלמך טובה תחת היום הזה אשר עשיתה לי:

Segment 21
HE:
ועתה הנה ידעתי כי מלך תמלוך וקמה בידך ממלכת ישראל:

Segment 22
HE:
ועתה השבעה לי ביהוה אם תכרית את זרעי אחרי ואם תשמיד את שמי מבית אבי: (פ)

Segment 23
HE:
וישבע דוד לשאול וילך שאול אל ביתו ודוד ואנשיו עלו על המצודה:



# Samuel 1 Chapter 25
URL: https://ajew.org/reader-plain/tanach-shmuel-a/1/25/

Samuel 1 Chapter 25
שמואל א פרק כה
Source: https://ajew.org/reader/tanach-shmuel-a/1/25

Segment 1
HE:
וימת שמואל ויקבצו כל ישראל ויספדו לו ויקברהו בביתו ברמה ויקם דוד וירד אל מדבר פארן: (ס)

Segment 2
HE:
ואיש במעון ומעשהו בכרמל והאיש גדול מאד ולו צאן שלשת אלפים ואלף עזים ויהי בגזז את צאנו בכרמל:

Segment 3
HE:
ושם האיש נבל ושם אשתו אבגיל והאשה טובת שכל ויפת תאר והאיש קשה ורע מעללים והוא (כלבו) כלבי:

Segment 4
HE:
וישמע דוד במדבר כי גזז נבל את צאנו:

Segment 5
HE:
וישלח דוד עשרה נערים ויאמר דוד לנערים עלו כרמלה ובאתם אל נבל ושאלתם לו בשמי לשלום:

Segment 6
HE:
ואמרתם כה לחי ואתה שלום וביתך שלום וכל אשר לך שלום:

Segment 7
HE:
ועתה שמעתי כי גזזים לך עתה הרעים אשר לך היו עמנו לא הכלמנום ולא נפקד להם מאומה כל ימי היותם בכרמל:

Segment 8
HE:
שאל את נעריך ויגידו לך וימצאו הנערים חן בעיניך כי על יום טוב בנו תנה נא את אשר תמצא ידך לעבדיך ולבנך לדוד:

Segment 9
HE:
ויבאו נערי דוד וידברו אל נבל ככל הדברים האלה בשם דוד וינוחו:

Segment 10
HE:
ויען נבל את עבדי דוד ויאמר מי דוד ומי בן ישי היום רבו עבדים המתפרצים איש מפני אדניו:

Segment 11
HE:
ולקחתי את לחמי ואת מימי ואת טבחתי אשר טבחתי לגזזי ונתתי לאנשים אשר לא ידעתי אי מזה המה:

Segment 12
HE:
ויהפכו נערי דוד לדרכם וישבו ויבאו ויגדו לו ככל הדברים האלה:

Segment 13
HE:
ויאמר דוד לאנשיו חגרו איש את חרבו ויחגרו איש את חרבו ויחגר גם דוד את חרבו ויעלו אחרי דוד כארבע מאות איש ומאתים ישבו על הכלים:

Segment 14
HE:
ולאביגיל אשת נבל הגיד נער אחד מהנערים לאמר הנה שלח דוד מלאכים מהמדבר לברך את אדנינו ויעט בהם:

Segment 15
HE:
והאנשים טבים לנו מאד ולא הכלמנו ולא פקדנו מאומה כל ימי התהלכנו אתם בהיותנו בשדה:

Segment 16
HE:
חומה היו עלינו גם לילה גם יומם כל ימי היותנו עמם רעים הצאן:

Segment 17
HE:
ועתה דעי וראי מה תעשי כי כלתה הרעה אל אדנינו ועל כל ביתו והוא בן בליעל מדבר אליו:

Segment 18
HE:
ותמהר (אבוגיל) אביגיל ותקח מאתים לחם ושנים נבלי יין וחמש צאן (עשוות) עשוית וחמש סאים קלי ומאה צמקים ומאתים דבלים ותשם על החמרים:

Segment 19
HE:
ותאמר לנעריה עברו לפני הנני אחריכם באה ולאישה נבל לא הגידה:

Segment 20
HE:
והיה היא רכבת על החמור וירדת בסתר ההר והנה דוד ואנשיו ירדים לקראתה ותפגש אתם:

Segment 21
HE:
ודוד אמר אך לשקר שמרתי את כל אשר לזה במדבר ולא נפקד מכל אשר לו מאומה וישב לי רעה תחת טובה:

Segment 22
HE:
כה יעשה אלהים לאיבי דוד וכה יסיף אם אשאיר מכל אשר לו עד הבקר משתין בקיר:

Segment 23
HE:
ותרא אביגיל את דוד ותמהר ותרד מעל החמור ותפל לאפי דוד על פניה ותשתחו ארץ:

Segment 24
HE:
ותפל על רגליו ותאמר בי אני אדני העון ותדבר נא אמתך באזניך ושמע את דברי אמתך:

Segment 25
HE:
אל נא ישים אדני את לבו אל איש הבליעל הזה על נבל כי כשמו כן הוא נבל שמו ונבלה עמו ואני אמתך לא ראיתי את נערי אדני אשר שלחת:

Segment 26
HE:
ועתה אדני חי יהוה וחי נפשך אשר מנעך יהוה מבוא בדמים והושע ידך לך ועתה יהיו כנבל איביך והמבקשים אל אדני רעה:

Segment 27
HE:
ועתה הברכה הזאת אשר הביא שפחתך לאדני ונתנה לנערים המתהלכים ברגלי אדני:

Segment 28
HE:
שא נא לפשע אמתך כי עשה יעשה יהוה לאדני בית נאמן כי מלחמות יהוה אדני נלחם ורעה לא תמצא בך מימיך:

Segment 29
HE:
ויקם אדם לרדפך ולבקש את נפשך והיתה נפש אדני צרורה בצרור החיים את יהוה אלהיך ואת נפש איביך יקלענה בתוך כף הקלע:

Segment 30
HE:
והיה כי יעשה יהוה לאדני ככל אשר דבר את הטובה עליך וצוך לנגיד על ישראל:

Segment 31
HE:
ולא תהיה זאת לך לפוקה ולמכשול לב לאדני ולשפך דם חנם ולהושיע אדני לו והיטב יהוה לאדני וזכרת את אמתך:

Segment 32
HE:
ויאמר דוד לאביגל ברוך יהוה אלהי ישראל אשר שלחך היום הזה לקראתי:

Segment 33
HE:
וברוך טעמך וברוכה את אשר כלתני היום הזה מבוא בדמים והשע ידי לי:

Segment 34
HE:
ואולם חי יהוה אלהי ישראל אשר מנעני מהרע אתך כי לולי מהרת (ותבאתי) ותבאת לקראתי כי אם נותר לנבל עד אור הבקר משתין בקיר:

Segment 35
HE:
ויקח דוד מידה את אשר הביאה לו ולה אמר עלי לשלום לביתך ראי שמעתי בקולך ואשא פניך:

Segment 36
HE:
ותבא אביגיל אל נבל והנה לו משתה בביתו כמשתה המלך ולב נבל טוב עליו והוא שכר עד מאד ולא הגידה לו דבר קטן וגדול עד אור הבקר:

Segment 37
HE:
ויהי בבקר בצאת היין מנבל ותגד לו אשתו את הדברים האלה וימת לבו בקרבו והוא היה לאבן:

Segment 38
HE:
ויהי כעשרת הימים ויגף יהוה את נבל וימת:

Segment 39
HE:
וישמע דוד כי מת נבל ויאמר ברוך יהוה אשר רב את ריב חרפתי מיד נבל ואת עבדו חשך מרעה ואת רעת נבל השיב יהוה בראשו וישלח דוד וידבר באביגיל לקחתה לו לאשה:

Segment 40
HE:
ויבאו עבדי דוד אל אביגיל הכרמלה וידברו אליה לאמר דוד שלחנו אליך לקחתך לו לאשה:

Segment 41
HE:
ותקם ותשתחו אפים ארצה ותאמר הנה אמתך לשפחה לרחץ רגלי עבדי אדני:

Segment 42
HE:
ותמהר ותקם אביגיל ותרכב על החמור וחמש נערתיה ההלכות לרגלה ותלך אחרי מלאכי דוד ותהי לו לאשה:

Segment 43
HE:
ואת אחינעם לקח דוד מיזרעאל ותהיין גם שתיהן לו לנשים: (ס)

Segment 44
HE:
ושאול נתן את מיכל בתו אשת דוד לפלטי בן ליש אשר מגלים:



# Samuel 1 Chapter 26
URL: https://ajew.org/reader-plain/tanach-shmuel-a/1/26/

Samuel 1 Chapter 26
שמואל א פרק כו
Source: https://ajew.org/reader/tanach-shmuel-a/1/26

Segment 1
HE:
ויבאו הזפים אל שאול הגבעתה לאמר הלוא דוד מסתתר בגבעת החכילה על פני הישימן:

Segment 2
HE:
ויקם שאול וירד אל מדבר זיף ואתו שלשת אלפים איש בחורי ישראל לבקש את דוד במדבר זיף:

Segment 3
HE:
ויחן שאול בגבעת החכילה אשר על פני הישימן על הדרך ודוד ישב במדבר וירא כי בא שאול אחריו המדברה:

Segment 4
HE:
וישלח דוד מרגלים וידע כי בא שאול אל נכון:

Segment 5
HE:
ויקם דוד ויבא אל המקום אשר חנה שם שאול וירא דוד את המקום אשר שכב שם שאול ואבנר בן נר שר צבאו ושאול שכב במעגל והעם חנים (סביבתו) סביבתיו:

Segment 6
HE:
ויען דוד ויאמר אל אחימלך החתי ואל אבישי בן צרויה אחי יואב לאמר מי ירד אתי אל שאול אל המחנה ויאמר אבישי אני ארד עמך:

Segment 7
HE:
ויבא דוד ואבישי אל העם לילה והנה שאול שכב ישן במעגל וחניתו מעוכה בארץ (מראשתו) מראשתיו ואבנר והעם שכבים (סביבתו) סביבתיו: (ס)

Segment 8
HE:
ויאמר אבישי אל דוד סגר אלהים היום את אויבך בידך ועתה אכנו נא בחנית ובארץ פעם אחת ולא אשנה לו:

Segment 9
HE:
ויאמר דוד אל אבישי אל תשחיתהו כי מי שלח ידו במשיח יהוה ונקה:

Segment 10
HE:
ויאמר דוד חי יהוה כי אם יהוה יגפנו או יומו יבוא ומת או במלחמה ירד ונספה: (פ)

Segment 11
HE:
חלילה לי מיהוה משלח ידי במשיח יהוה ועתה קח נא את החנית אשר (מראשתו) מראשתיו ואת צפחת המים ונלכה לנו:

Segment 12
HE:
ויקח דוד את החנית ואת צפחת המים מראשתי שאול וילכו להם ואין ראה ואין יודע ואין מקיץ כי כלם ישנים כי תרדמת יהוה נפלה עליהם:

Segment 13
HE:
ויעבר דוד העבר ויעמד על ראש ההר מרחק רב המקום ביניהם:

Segment 14
HE:
ויקרא דוד אל העם ואל אבנר בן נר לאמר הלוא תענה אבנר ויען אבנר ויאמר מי אתה קראת אל המלך: (פ)

Segment 15
HE:
ויאמר דוד אל אבנר הלוא איש אתה ומי כמוך בישראל ולמה לא שמרת אל אדניך המלך כי בא אחד העם להשחית את המלך אדניך:

Segment 16
HE:
לא טוב הדבר הזה אשר עשית חי יהוה כי בני מות אתם אשר לא שמרתם על אדניכם על משיח יהוה ועתה ראה אי חנית המלך ואת צפחת המים אשר (מראשתו) מראשתיו:

Segment 17
HE:
ויכר שאול את קול דוד ויאמר הקולך זה בני דוד ויאמר דוד קולי אדני המלך:

Segment 18
HE:
ויאמר למה זה אדני רדף אחרי עבדו כי מה עשיתי ומה בידי רעה:

Segment 19
HE:
ועתה ישמע נא אדני המלך את דברי עבדו אם יהוה הסיתך בי ירח מנחה ואם בני האדם ארורים הם לפני יהוה כי גרשוני היום מהסתפח בנחלת יהוה לאמר לך עבד אלהים אחרים:

Segment 20
HE:
ועתה אל יפל דמי ארצה מנגד פני יהוה כי יצא מלך ישראל לבקש את פרעש אחד כאשר ירדף הקרא בהרים:

Segment 21
HE:
ויאמר שאול חטאתי שוב בני דוד כי לא ארע לך עוד תחת אשר יקרה נפשי בעיניך היום הזה הנה הסכלתי ואשגה הרבה מאד:

Segment 22
HE:
ויען דוד ויאמר הנה (החנית) חנית המלך ויעבר אחד מהנערים ויקחה:

Segment 23
HE:
ויהוה ישיב לאיש את צדקתו ואת אמנתו אשר נתנך יהוה היום ביד ולא אביתי לשלח ידי במשיח יהוה:

Segment 24
HE:
והנה כאשר גדלה נפשך היום הזה בעיני כן תגדל נפשי בעיני יהוה ויצלני מכל צרה: (פ)

Segment 25
HE:
ויאמר שאול אל דוד ברוך אתה בני דוד גם עשה תעשה וגם יכל תוכל וילך דוד לדרכו ושאול שב למקומו: (פ)



# Samuel 1 Chapter 27
URL: https://ajew.org/reader-plain/tanach-shmuel-a/1/27/

Samuel 1 Chapter 27
שמואל א פרק כז
Source: https://ajew.org/reader/tanach-shmuel-a/1/27

Segment 1
HE:
ויאמר דוד אל לבו עתה אספה יום אחד ביד שאול אין לי טוב כי המלט אמלט אל ארץ פלשתים ונואש ממני שאול לבקשני עוד בכל גבול ישראל ונמלטתי מידו:

Segment 2
HE:
ויקם דוד ויעבר הוא ושש מאות איש אשר עמו אל אכיש בן מעוך מלך גת:

Segment 3
HE:
וישב דוד עם אכיש בגת הוא ואנשיו איש וביתו דוד ושתי נשיו אחינעם היזרעאלית ואביגיל אשת נבל הכרמלית:

Segment 4
HE:
ויגד לשאול כי ברח דוד גת ולא (יוסף) יסף עוד לבקשו: (ס)

Segment 5
HE:
ויאמר דוד אל אכיש אם נא מצאתי חן בעיניך יתנו לי מקום באחת ערי השדה ואשבה שם ולמה ישב עבדך בעיר הממלכה עמך:

Segment 6
HE:
ויתן לו אכיש ביום ההוא את צקלג לכן היתה צקלג למלכי יהודה עד היום הזה: (פ)

Segment 7
HE:
ויהי מספר הימים אשר ישב דוד בשדה פלשתים ימים וארבעה חדשים:

Segment 8
HE:
ויעל דוד ואנשיו ויפשטו אל הגשורי (והגרזי) והגזרי והעמלקי כי הנה ישבות הארץ אשר מעולם בואך שורה ועד ארץ מצרים:

Segment 9
HE:
והכה דוד את הארץ ולא יחיה איש ואשה ולקח צאן ובקר וחמרים וגמלים ובגדים וישב ויבא אל אכיש:

Segment 10
HE:
ויאמר אכיש אל פשטתם היום ויאמר דוד על נגב יהודה ועל נגב הירחמאלי ואל נגב הקיני:

Segment 11
HE:
ואיש ואשה לא יחיה דוד להביא גת לאמר פן יגדו עלינו לאמר כה עשה דוד וכה משפטו כל הימים אשר ישב בשדה פלשתים:

Segment 12
HE:
ויאמן אכיש בדוד לאמר הבאש הבאיש בעמו בישראל והיה לי לעבד עולם: (פ)



# Samuel 1 Chapter 28
URL: https://ajew.org/reader-plain/tanach-shmuel-a/1/28/

Samuel 1 Chapter 28
שמואל א פרק כח
Source: https://ajew.org/reader/tanach-shmuel-a/1/28

Segment 1
HE:
ויהי בימים ההם ויקבצו פלשתים את מחניהם לצבא להלחם בישראל ויאמר אכיש אל דוד ידע תדע כי אתי תצא במחנה אתה ואנשיך:

Segment 2
HE:
ויאמר דוד אל אכיש לכן אתה תדע את אשר יעשה עבדך ויאמר אכיש אל דוד לכן שמר לראשי אשימך כל הימים: (פ)

Segment 3
HE:
ושמואל מת ויספדו לו כל ישראל ויקברהו ברמה ובעירו ושאול הסיר האבות ואת הידענים מהארץ:

Segment 4
HE:
ויקבצו פלשתים ויבאו ויחנו בשונם ויקבץ שאול את כל ישראל ויחנו בגלבע:

Segment 5
HE:
וירא שאול את מחנה פלשתים וירא ויחרד לבו מאד:

Segment 6
HE:
וישאל שאול ביהוה ולא ענהו יהוה גם בחלמות גם באורים גם בנביאם:

Segment 7
HE:
ויאמר שאול לעבדיו בקשו לי אשת בעלת אוב ואלכה אליה ואדרשה בה ויאמרו עבדיו אליו הנה אשת בעלת אוב בעין דור:

Segment 8
HE:
ויתחפש שאול וילבש בגדים אחרים וילך הוא ושני אנשים עמו ויבאו אל האשה לילה ויאמר (קסומי) קסמי נא לי באוב והעלי לי את אשר אמר אליך:

Segment 9
HE:
ותאמר האשה אליו הנה אתה ידעת את אשר עשה שאול אשר הכרית את האבות ואת הידעני מן הארץ ולמה אתה מתנקש בנפשי להמיתני:

Segment 10
HE:
וישבע לה שאול ביהוה לאמר חי יהוה אם יקרך עון בדבר הזה:

Segment 11
HE:
ותאמר האשה את מי אעלה לך ויאמר את שמואל העלי לי:

Segment 12
HE:
ותרא האשה את שמואל ותזעק בקול גדול ותאמר האשה אל שאול לאמר למה רמיתני ואתה שאול:

Segment 13
HE:
ויאמר לה המלך אל תיראי כי מה ראית ותאמר האשה אל שאול אלהים ראיתי עלים מן הארץ:

Segment 14
HE:
ויאמר לה מה תארו ותאמר איש זקן עלה והוא עטה מעיל וידע שאול כי שמואל הוא ויקד אפים ארצה וישתחו: (ס)

Segment 15
HE:
ויאמר שמואל אל שאול למה הרגזתני להעלות אתי ויאמר שאול צר לי מאד ופלשתים נלחמים בי ואלהים סר מעלי ולא ענני עוד גם ביד הנביאם גם בחלמות ואקראה לך להודיעני מה אעשה: (ס)

Segment 16
HE:
ויאמר שמואל ולמה תשאלני ויהוה סר מעליך ויהי ערך:

Segment 17
HE:
ויעש יהוה לו כאשר דבר בידי ויקרע יהוה את הממלכה מידך ויתנה לרעך לדוד:

Segment 18
HE:
כאשר לא שמעת בקול יהוה ולא עשית חרון אפו בעמלק על כן הדבר הזה עשה לך יהוה היום הזה:

Segment 19
HE:
ויתן יהוה גם את ישראל עמך ביד פלשתים ומחר אתה ובניך עמי גם את מחנה ישראל יתן יהוה ביד פלשתים:

Segment 20
HE:
וימהר שאול ויפל מלא קומתו ארצה וירא מאד מדברי שמואל גם כח לא היה בו כי לא אכל לחם כל היום וכל הלילה:

Segment 21
HE:
ותבוא האשה אל שאול ותרא כי נבהל מאד ותאמר אליו הנה שמעה שפחתך בקולך ואשים נפשי בכפי ואשמע את דבריך אשר דברת אלי:

Segment 22
HE:
ועתה שמע נא גם אתה בקול שפחתך ואשמה לפניך פת לחם ואכול ויהי בך כח כי תלך בדרך:

Segment 23
HE:
וימאן ויאמר לא אכל ויפרצו בו עבדיו וגם האשה וישמע לקלם ויקם מהארץ וישב אל המטה:

Segment 24
HE:
ולאשה עגל מרבק בבית ותמהר ותזבחהו ותקח קמח ותלש ותפהו מצות:

Segment 25
HE:
ותגש לפני שאול ולפני עבדיו ויאכלו ויקמו וילכו בלילה ההוא: (פ)



# Samuel 1 Chapter 29
URL: https://ajew.org/reader-plain/tanach-shmuel-a/1/29/

Samuel 1 Chapter 29
שמואל א פרק כט
Source: https://ajew.org/reader/tanach-shmuel-a/1/29

Segment 1
HE:
ויקבצו פלשתים את כל מחניהם אפקה וישראל חנים בעין אשר ביזרעאל:

Segment 2
HE:
וסרני פלשתים עברים למאות ולאלפים ודוד ואנשיו עברים באחרנה עם אכיש:

Segment 3
HE:
ויאמרו שרי פלשתים מה העברים האלה ויאמר אכיש אל שרי פלשתים הלוא זה דוד עבד שאול מלך ישראל אשר היה אתי זה ימים או זה שנים ולא מצאתי בו מאומה מיום נפלו עד היום הזה: (פ)

Segment 4
HE:
ויקצפו עליו שרי פלשתים ויאמרו לו שרי פלשתים השב את האיש וישב אל מקומו אשר הפקדתו שם ולא ירד עמנו במלחמה ולא יהיה לנו לשטן במלחמה ובמה יתרצה זה אל אדניו הלוא בראשי האנשים ההם:

Segment 5
HE:
הלוא זה דוד אשר יענו לו במחלות לאמר הכה שאול באלפיו ודוד (ברבבתו) ברבבתיו: (ס)

Segment 6
HE:
ויקרא אכיש אל דוד ויאמר אליו חי יהוה כי ישר אתה וטוב בעיני צאתך ובאך אתי במחנה כי לא מצאתי בך רעה מיום באך אלי עד היום הזה ובעיני הסרנים לא טוב אתה:

Segment 7
HE:
ועתה שוב ולך בשלום ולא תעשה רע בעיני סרני פלשתים: (ס)

Segment 8
HE:
ויאמר דוד אל אכיש כי מה עשיתי ומה מצאת בעבדך מיום אשר הייתי לפניך עד היום הזה כי לא אבוא ונלחמתי באיבי אדני המלך:

Segment 9
HE:
ויען אכיש ויאמר אל דוד ידעתי כי טוב אתה בעיני כמלאך אלהים אך שרי פלשתים אמרו לא יעלה עמנו במלחמה:

Segment 10
HE:
ועתה השכם בבקר ועבדי אדניך אשר באו אתך והשכמתם בבקר ואור לכם ולכו:

Segment 11
HE:
וישכם דוד הוא ואנשיו ללכת בבקר לשוב אל ארץ פלשתים ופלשתים עלו יזרעאל: (ס)



# Samuel 1 Chapter 3
URL: https://ajew.org/reader-plain/tanach-shmuel-a/1/3/

Samuel 1 Chapter 3
שמואל א פרק ג
Source: https://ajew.org/reader/tanach-shmuel-a/1/3

Segment 1
HE:
והנער שמואל משרת את יהוה לפני עלי ודבר יהוה היה יקר בימים ההם אין חזון נפרץ: (ס)

Segment 2
HE:
ויהי ביום ההוא ועלי שכב במקמו (ועינו) ועיניו החלו כהות לא יוכל לראות:

Segment 3
HE:
ונר אלהים טרם יכבה ושמואל שכב בהיכל יהוה אשר שם ארון אלהים: (פ)

Segment 4
HE:
ויקרא יהוה אל שמואל ויאמר הנני:

Segment 5
HE:
וירץ אל עלי ויאמר הנני כי קראת לי ויאמר לא קראתי שוב שכב וילך וישכב: (ס)

Segment 6
HE:
ויסף יהוה קרא עוד שמואל ויקם שמואל וילך אל עלי ויאמר הנני כי קראת לי ויאמר לא קראתי בני שוב שכב:

Segment 7
HE:
ושמואל טרם ידע את יהוה וטרם יגלה אליו דבר יהוה:

Segment 8
HE:
ויסף יהוה קרא שמואל בשלשית ויקם וילך אל עלי ויאמר הנני כי קראת לי ויבן עלי כי יהוה קרא לנער:

Segment 9
HE:
ויאמר עלי לשמואל לך שכב והיה אם יקרא אליך ואמרת דבר יהוה כי שמע עבדך וילך שמואל וישכב במקומו:

Segment 10
HE:
ויבא יהוה ויתיצב ויקרא כפעם בפעם שמואל שמואל ויאמר שמואל דבר כי שמע עבדך: (פ)

Segment 11
HE:
ויאמר יהוה אל שמואל הנה אנכי עשה דבר בישראל אשר כל שמעו תצלינה שתי אזניו:

Segment 12
HE:
ביום ההוא אקים אל עלי את כל אשר דברתי אל ביתו החל וכלה:

Segment 13
HE:
והגדתי לו כי שפט אני את ביתו עד עולם בעון אשר ידע כי מקללים להם בניו ולא כהה בם:

Segment 14
HE:
ולכן נשבעתי לבית עלי אם יתכפר עון בית עלי בזבח ובמנחה עד עולם:

Segment 15
HE:
וישכב שמואל עד הבקר ויפתח את דלתות בית יהוה ושמואל ירא מהגיד את המראה אל עלי:

Segment 16
HE:
ויקרא עלי את שמואל ויאמר שמואל בני ויאמר הנני:

Segment 17
HE:
ויאמר מה הדבר אשר דבר אליך אל נא תכחד ממני כה יעשה לך אלהים וכה יוסיף אם תכחד ממני דבר מכל הדבר אשר דבר אליך:

Segment 18
HE:
ויגד לו שמואל את כל הדברים ולא כחד ממנו ויאמר יהוה הוא הטוב בעינו יעשה: (פ)

Segment 19
HE:
ויגדל שמואל ויהוה היה עמו ולא הפיל מכל דבריו ארצה:

Segment 20
HE:
וידע כל ישראל מדן ועד באר שבע כי נאמן שמואל לנביא ליהוה:

Segment 21
HE:
ויסף יהוה להראה בשלה כי נגלה יהוה אל שמואל בשלו בדבר יהוה: (פ)



# Samuel 1 Chapter 30
URL: https://ajew.org/reader-plain/tanach-shmuel-a/1/30/

Samuel 1 Chapter 30
שמואל א פרק ל
Source: https://ajew.org/reader/tanach-shmuel-a/1/30

Segment 1
HE:
ויהי בבא דוד ואנשיו צקלג ביום השלישי ועמלקי פשטו אל נגב ואל צקלג ויכו את צקלג וישרפו אתה באש:

Segment 2
HE:
וישבו את הנשים אשר בה מקטן ועד גדול לא המיתו איש וינהגו וילכו לדרכם:

Segment 3
HE:
ויבא דוד ואנשיו אל העיר והנה שרופה באש ונשיהם ובניהם ובנתיהם נשבו:

Segment 4
HE:
וישא דוד והעם אשר אתו את קולם ויבכו עד אשר אין בהם כח לבכות:

Segment 5
HE:
ושתי נשי דוד נשבו אחינעם היזרעלית ואביגיל אשת נבל הכרמלי:

Segment 6
HE:
ותצר לדוד מאד כי אמרו העם לסקלו כי מרה נפש כל העם איש על (בנו) בניו ועל בנתיו ויתחזק דוד ביהוה אלהיו: (ס)

Segment 7
HE:
ויאמר דוד אל אביתר הכהן בן אחימלך הגישה נא לי האפד ויגש אביתר את האפד אל דוד:

Segment 8
HE:
וישאל דוד ביהוה לאמר ארדף אחרי הגדוד הזה האשגנו ויאמר לו רדף כי השג תשיג והצל תציל:

Segment 9
HE:
וילך דוד הוא ושש מאות איש אשר אתו ויבאו עד נחל הבשור והנותרים עמדו:

Segment 10
HE:
וירדף דוד הוא וארבע מאות איש ויעמדו מאתים איש אשר פגרו מעבר את נחל הבשור:

Segment 11
HE:
וימצאו איש מצרי בשדה ויקחו אתו אל דוד ויתנו לו לחם ויאכל וישקהו מים:

Segment 12
HE:
ויתנו לו פלח דבלה ושני צמקים ויאכל ותשב רוחו אליו כי לא אכל לחם ולא שתה מים שלשה ימים ושלשה לילות: (ס)

Segment 13
HE:
ויאמר לו דוד למי אתה ואי מזה אתה ויאמר נער מצרי אנכי עבד לאיש עמלקי ויעזבני אדני כי חליתי היום שלשה:

Segment 14
HE:
אנחנו פשטנו נגב הכרתי ועל אשר ליהודה ועל נגב כלב ואת צקלג שרפנו באש:

Segment 15
HE:
ויאמר אליו דוד התורדני אל הגדוד הזה ויאמר השבעה לי באלהים אם תמיתני ואם תסגרני ביד אדני ואורדך אל הגדוד הזה:

Segment 16
HE:
וירדהו והנה נטשים על פני כל הארץ אכלים ושתים וחגגים בכל השלל הגדול אשר לקחו מארץ פלשתים ומארץ יהודה:

Segment 17
HE:
ויכם דוד מהנשף ועד הערב למחרתם ולא נמלט מהם איש כי אם ארבע מאות איש נער אשר רכבו על הגמלים וינסו:

Segment 18
HE:
ויצל דוד את כל אשר לקחו עמלק ואת שתי נשיו הציל דוד:

Segment 19
HE:
ולא נעדר להם מן הקטן ועד הגדול ועד בנים ובנות ומשלל ועד כל אשר לקחו להם הכל השיב דוד:

Segment 20
HE:
ויקח דוד את כל הצאן והבקר נהגו לפני המקנה ההוא ויאמרו זה שלל דוד:

Segment 21
HE:
ויבא דוד אל מאתים האנשים אשר פגרו מלכת אחרי דוד וישיבם בנחל הבשור ויצאו לקראת דוד ולקראת העם אשר אתו ויגש דוד את העם וישאל להם לשלום: (ס)

Segment 22
HE:
ויען כל איש רע ובליעל מהאנשים אשר הלכו עם דוד ויאמרו יען אשר לא הלכו עמי לא נתן להם מהשלל אשר הצלנו כי אם איש את אשתו ואת בניו וינהגו וילכו: (ס)

Segment 23
HE:
ויאמר דוד לא תעשו כן אחי את אשר נתן יהוה לנו וישמר אתנו ויתן את הגדוד הבא עלינו בידנו:

Segment 24
HE:
ומי ישמע לכם לדבר הזה כי כחלק הירד במלחמה וכחלק הישב על הכלים יחדו יחלקו: (ס)

Segment 25
HE:
ויהי מהיום ההוא ומעלה וישמה לחק ולמשפט לישראל עד היום הזה: (פ)

Segment 26
HE:
ויבא דוד אל צקלג וישלח מהשלל לזקני יהודה לרעהו לאמר הנה לכם ברכה משלל איבי יהוה:

Segment 27
HE:
לאשר בבית אל ולאשר ברמות נגב ולאשר ביתר:

Segment 28
HE:
ולאשר בערער ולאשר בשפמות ולאשר באשתמע: (פ)

Segment 29
HE:
ולאשר ברכל ולאשר בערי הירחמאלי ולאשר בערי הקיני:

Segment 30
HE:
ולאשר בחרמה ולאשר בבור עשן ולאשר בעתך:

Segment 31
HE:
ולאשר בחברון ולכל המקמות אשר התהלך שם דוד הוא ואנשיו: (פ)



# Samuel 1 Chapter 31
URL: https://ajew.org/reader-plain/tanach-shmuel-a/1/31/

Samuel 1 Chapter 31
שמואל א פרק לא
Source: https://ajew.org/reader/tanach-shmuel-a/1/31

Segment 1
HE:
ופלשתים נלחמים בישראל וינסו אנשי ישראל מפני פלשתים ויפלו חללים בהר הגלבע:

Segment 2
HE:
וידבקו פלשתים את שאול ואת בניו ויכו פלשתים את יהונתן ואת אבינדב ואת מלכי שוע בני שאול:

Segment 3
HE:
ותכבד המלחמה אל שאול וימצאהו המורים אנשים בקשת ויחל מאד מהמורים:

Segment 4
HE:
ויאמר שאול לנשא כליו שלף חרבך ודקרני בה פן יבואו הערלים האלה ודקרני והתעללו בי ולא אבה נשא כליו כי ירא מאד ויקח שאול את החרב ויפל עליה:

Segment 5
HE:
וירא נשא כליו כי מת שאול ויפל גם הוא על חרבו וימת עמו:

Segment 6
HE:
וימת שאול ושלשת בניו ונשא כליו גם כל אנשיו ביום ההוא יחדו:

Segment 7
HE:
ויראו אנשי ישראל אשר בעבר העמק ואשר בעבר הירדן כי נסו אנשי ישראל וכי מתו שאול ובניו ויעזבו את הערים וינסו ויבאו פלשתים וישבו בהן: (ס)

Segment 8
HE:
ויהי ממחרת ויבאו פלשתים לפשט את החללים וימצאו את שאול ואת שלשת בניו נפלים בהר הגלבע:

Segment 9
HE:
ויכרתו את ראשו ויפשיטו את כליו וישלחו בארץ פלשתים סביב לבשר בית עצביהם ואת העם:

Segment 10
HE:
וישמו את כליו בית עשתרות ואת גויתו תקעו בחומת בית שן:

Segment 11
HE:
וישמעו אליו ישבי יביש גלעד את אשר עשו פלשתים לשאול:

Segment 12
HE:
ויקומו כל איש חיל וילכו כל הלילה ויקחו את גוית שאול ואת גוית בניו מחומת בית שן ויבאו יבשה וישרפו אתם שם:

Segment 13
HE:
ויקחו את עצמתיהם ויקברו תחת האשל ביבשה ויצמו שבעת ימים: (חזק)



# Samuel 1 Chapter 4
URL: https://ajew.org/reader-plain/tanach-shmuel-a/1/4/

Samuel 1 Chapter 4
שמואל א פרק ד
Source: https://ajew.org/reader/tanach-shmuel-a/1/4

Segment 1
HE:
ויהי דבר שמואל לכל ישראל ויצא ישראל לקראת פלשתים למלחמה ויחנו על האבן העזר ופלשתים חנו באפק:

Segment 2
HE:
ויערכו פלשתים לקראת ישראל ותטש המלחמה וינגף ישראל לפני פלשתים ויכו במערכה בשדה כארבעת אלפים איש:

Segment 3
HE:
ויבא העם אל המחנה ויאמרו זקני ישראל למה נגפנו יהוה היום לפני פלשתים נקחה אלינו משלה את ארון ברית יהוה ויבא בקרבנו וישענו מכף איבינו:

Segment 4
HE:
וישלח העם שלה וישאו משם את ארון ברית יהוה צבאות ישב הכרבים ושם שני בני עלי עם ארון ברית האלהים חפני ופינחס:

Segment 5
HE:
ויהי כבוא ארון ברית יהוה אל המחנה וירעו כל ישראל תרועה גדולה ותהם הארץ:

Segment 6
HE:
וישמעו פלשתים את קול התרועה ויאמרו מה קול התרועה הגדולה הזאת במחנה העברים וידעו כי ארון יהוה בא אל המחנה:

Segment 7
HE:
ויראו הפלשתים כי אמרו בא אלהים אל המחנה ויאמרו אוי לנו כי לא היתה כזאת אתמול שלשם:

Segment 8
HE:
אוי לנו מי יצילנו מיד האלהים האדירים האלה אלה הם האלהים המכים את מצרים בכל מכה במדבר:

Segment 9
HE:
התחזקו והיו לאנשים פלשתים פן תעבדו לעברים כאשר עבדו לכם והייתם לאנשים ונלחמתם:

Segment 10
HE:
וילחמו פלשתים וינגף ישראל וינסו איש לאהליו ותהי המכה גדולה מאד ויפל מישראל שלשים אלף רגלי:

Segment 11
HE:
וארון אלהים נלקח ושני בני עלי מתו חפני ופינחס:

Segment 12
HE:
וירץ איש בנימן מהמערכה ויבא שלה ביום ההוא ומדיו קרעים ואדמה על ראשו:

Segment 13
HE:
ויבוא והנה עלי ישב על הכסא (יך) יד דרך מצפה כי היה לבו חרד על ארון האלהים והאיש בא להגיד בעיר ותזעק כל העיר:

Segment 14
HE:
וישמע עלי את קול הצעקה ויאמר מה קול ההמון הזה והאיש מהר ויבא ויגד לעלי:

Segment 15
HE:
ועלי בן תשעים ושמנה שנה ועיניו קמה ולא יכול לראות:

Segment 16
HE:
ויאמר האיש אל עלי אנכי הבא מן המערכה ואני מן המערכה נסתי היום ויאמר מה היה הדבר בני:

Segment 17
HE:
ויען המבשר ויאמר נס ישראל לפני פלשתים וגם מגפה גדולה היתה בעם וגם שני בניך מתו חפני ופינחס וארון האלהים נלקחה: (פ)

Segment 18
HE:
ויהי כהזכירו את ארון האלהים ויפל מעל הכסא אחרנית בעד יד השער ותשבר מפרקתו וימת כי זקן האיש וכבד והוא שפט את ישראל ארבעים שנה:

Segment 19
HE:
וכלתו אשת פינחס הרה ללת ותשמע את השמעה אל הלקח ארון האלהים ומת חמיה ואישה ותכרע ותלד כי נהפכו עליה צריה:

Segment 20
HE:
וכעת מותה ותדברנה הנצבות עליה אל תיראי כי בן ילדת ולא ענתה ולא שתה לבה:

Segment 21
HE:
ותקרא לנער אי כבוד לאמר גלה כבוד מישראל אל הלקח ארון האלהים ואל חמיה ואישה:

Segment 22
HE:
ותאמר גלה כבוד מישראל כי נלקח ארון האלהים: (פ)



# Samuel 1 Chapter 5
URL: https://ajew.org/reader-plain/tanach-shmuel-a/1/5/

Samuel 1 Chapter 5
שמואל א פרק ה
Source: https://ajew.org/reader/tanach-shmuel-a/1/5

Segment 1
HE:
ופלשתים לקחו את ארון האלהים ויבאהו מאבן העזר אשדודה:

Segment 2
HE:
ויקחו פלשתים את ארון האלהים ויביאו אתו בית דגון ויציגו אתו אצל דגון:

Segment 3
HE:
וישכמו אשדודים ממחרת והנה דגון נפל לפניו ארצה לפני ארון יהוה ויקחו את דגון וישבו אתו למקומו:

Segment 4
HE:
וישכמו בבקר ממחרת והנה דגון נפל לפניו ארצה לפני ארון יהוה וראש דגון ושתי כפות ידיו כרתות אל המפתן רק דגון נשאר עליו:

Segment 5
HE:
על כן לא ידרכו כהני דגון וכל הבאים בית דגון על מפתן דגון באשדוד עד היום הזה: (ס)

Segment 6
HE:
ותכבד יד יהוה אל האשדודים וישמם ויך אתם (בעפלים) בטחרים את אשדוד ואת גבוליה:

Segment 7
HE:
ויראו אנשי אשדוד כי כן ואמרו לא ישב ארון אלהי ישראל עמנו כי קשתה ידו עלינו ועל דגון אלהינו:

Segment 8
HE:
וישלחו ויאספו את כל סרני פלשתים אליהם ויאמרו מה נעשה לארון אלהי ישראל ויאמרו גת יסב ארון אלהי ישראל ויסבו את ארון אלהי ישראל: (ס)

Segment 9
HE:
ויהי אחרי הסבו אתו ותהי יד יהוה בעיר מהומה גדולה מאד ויך את אנשי העיר מקטן ועד גדול וישתרו להם (עפלים) טחרים:

Segment 10
HE:
וישלחו את ארון האלהים עקרון ויהי כבוא ארון האלהים עקרון ויזעקו העקרנים לאמר הסבו אלי את ארון אלהי ישראל להמיתני ואת עמי:

Segment 11
HE:
וישלחו ויאספו את כל סרני פלשתים ויאמרו שלחו את ארון אלהי ישראל וישב למקמו ולא ימית אתי ואת עמי כי היתה מהומת מות בכל העיר כבדה מאד יד האלהים שם:

Segment 12
HE:
והאנשים אשר לא מתו הכו (בעפלים) בטחרים ותעל שועת העיר השמים:



# Samuel 1 Chapter 6
URL: https://ajew.org/reader-plain/tanach-shmuel-a/1/6/

Samuel 1 Chapter 6
שמואל א פרק ו
Source: https://ajew.org/reader/tanach-shmuel-a/1/6

Segment 1
HE:
ויהי ארון יהוה בשדה פלשתים שבעה חדשים:

Segment 2
HE:
ויקראו פלשתים לכהנים ולקסמים לאמר מה נעשה לארון יהוה הודענו במה נשלחנו למקומו:

Segment 3
HE:
ויאמרו אם משלחים את ארון אלהי ישראל אל תשלחו אתו ריקם כי השב תשיבו לו אשם אז תרפאו ונודע לכם למה לא תסור ידו מכם:

Segment 4
HE:
ויאמרו מה האשם אשר נשיב לו ויאמרו מספר סרני פלשתים חמשה (עפלי) טחרי זהב וחמשה עכברי זהב כי מגפה אחת לכלם ולסרניכם:

Segment 5
HE:
ועשיתם צלמי (עפליכם) טחריכם וצלמי עכבריכם המשחיתם את הארץ ונתתם לאלהי ישראל כבוד אולי יקל את ידו מעליכם ומעל אלהיכם ומעל ארצכם:

Segment 6
HE:
ולמה תכבדו את לבבכם כאשר כבדו מצרים ופרעה את לבם הלוא כאשר התעלל בהם וישלחום וילכו:

Segment 7
HE:
ועתה קחו ועשו עגלה חדשה אחת ושתי פרות עלות אשר לא עלה עליהם על ואסרתם את הפרות בעגלה והשיבתם בניהם מאחריהם הביתה:

Segment 8
HE:
ולקחתם את ארון יהוה ונתתם אתו אל העגלה ואת כלי הזהב אשר השבתם לו אשם תשימו בארגז מצדו ושלחתם אתו והלך:

Segment 9
HE:
וראיתם אם דרך גבולו יעלה בית שמש הוא עשה לנו את הרעה הגדולה הזאת ואם לא וידענו כי לא ידו נגעה בנו מקרה הוא היה לנו:

Segment 10
HE:
ויעשו האנשים כן ויקחו שתי פרות עלות ויאסרום בעגלה ואת בניהם כלו בבית:

Segment 11
HE:
וישמו את ארון יהוה אל העגלה ואת הארגז ואת עכברי הזהב ואת צלמי טחריהם:

Segment 12
HE:
וישרנה הפרות בדרך על דרך בית שמש במסלה אחת הלכו הלך וגעו ולא סרו ימין ושמאול וסרני פלשתים הלכים אחריהם עד גבול בית שמש:

Segment 13
HE:
ובית שמש קצרים קציר חטים בעמק וישאו את עיניהם ויראו את הארון וישמחו לראות:

Segment 14
HE:
והעגלה באה אל שדה יהושע בית השמשי ותעמד שם ושם אבן גדולה ויבקעו את עצי העגלה ואת הפרות העלו עלה ליהוה: (ס)

Segment 15
HE:
והלוים הורידו את ארון יהוה ואת הארגז אשר אתו אשר בו כלי זהב וישמו אל האבן הגדולה ואנשי בית שמש העלו עלות ויזבחו זבחים ביום ההוא ליהוה:

Segment 16
HE:
וחמשה סרני פלשתים ראו וישבו עקרון ביום ההוא: (ס)

Segment 17
HE:
ואלה טחרי הזהב אשר השיבו פלשתים אשם ליהוה לאשדוד אחד לעזה אחד לאשקלון אחד לגת אחד לעקרון אחד: (ס)

Segment 18
HE:
ועכברי הזהב מספר כל ערי פלשתים לחמשת הסרנים מעיר מבצר ועד כפר הפרזי ועד אבל הגדולה אשר הניחו עליה את ארון יהוה עד היום הזה בשדה יהושע בית השמשי:

Segment 19
HE:
ויך באנשי בית שמש כי ראו בארון יהוה ויך בעם שבעים איש חמשים אלף איש ויתאבלו העם כי הכה יהוה בעם מכה גדולה

Segment 20
HE:
ויאמרו אנשי בית שמש מי יוכל לעמד לפני יהוה האלהים הקדוש הזה ואל מי יעלה מעלינו: (ס)

Segment 21
HE:
וישלחו מלאכים אל יושבי קרית יערים לאמר השבו פלשתים את ארון יהוה רדו העלו אתו אליכם:



# Samuel 1 Chapter 7
URL: https://ajew.org/reader-plain/tanach-shmuel-a/1/7/

Samuel 1 Chapter 7
שמואל א פרק ז
Source: https://ajew.org/reader/tanach-shmuel-a/1/7

Segment 1
HE:
ויבאו אנשי קרית יערים ויעלו את ארון יהוה ויבאו אתו אל בית אבינדב בגבעה ואת אלעזר בנו קדשו לשמר את ארון יהוה: (פ)

Segment 2
HE:
ויהי מיום שבת הארון בקרית יערים וירבו הימים ויהיו עשרים שנה וינהו כל בית ישראל אחרי יהוה: (ס)

Segment 3
HE:
ויאמר שמואל אל כל בית ישראל לאמר אם בכל לבבכם אתם שבים אל יהוה הסירו את אלהי הנכר מתוככם והעשתרות והכינו לבבכם אל יהוה ועבדהו לבדו ויצל אתכם מיד פלשתים:

Segment 4
HE:
ויסירו בני ישראל את הבעלים ואת העשתרת ויעבדו את יהוה לבדו: (ס)

Segment 5
HE:
ויאמר שמואל קבצו את כל ישראל המצפתה ואתפלל בעדכם אל יהוה:

Segment 6
HE:
ויקבצו המצפתה וישאבו מים וישפכו לפני יהוה ויצומו ביום ההוא ויאמרו שם חטאנו ליהוה וישפט שמואל את בני ישראל במצפה:

Segment 7
HE:
וישמעו פלשתים כי התקבצו בני ישראל המצפתה ויעלו סרני פלשתים אל ישראל וישמעו בני ישראל ויראו מפני פלשתים:

Segment 8
HE:
ויאמרו בני ישראל אל שמואל אל תחרש ממנו מזעק אל יהוה אלהינו וישענו מיד פלשתים:

Segment 9
HE:
ויקח שמואל טלה חלב אחד (ויעלה) ויעלהו עולה כליל ליהוה ויזעק שמואל אל יהוה בעד ישראל ויענהו יהוה:

Segment 10
HE:
ויהי שמואל מעלה העולה ופלשתים נגשו למלחמה בישראל וירעם יהוה בקול גדול ביום ההוא על פלשתים ויהמם וינגפו לפני ישראל:

Segment 11
HE:
ויצאו אנשי ישראל מן המצפה וירדפו את פלשתים ויכום עד מתחת לבית כר:

Segment 12
HE:
ויקח שמואל אבן אחת וישם בין המצפה ובין השן ויקרא את שמה אבן העזר ויאמר עד הנה עזרנו יהוה:

Segment 13
HE:
ויכנעו הפלשתים ולא יספו עוד לבוא בגבול ישראל ותהי יד יהוה בפלשתים כל ימי שמואל:

Segment 14
HE:
ותשבנה הערים אשר לקחו פלשתים מאת ישראל לישראל מעקרון ועד גת ואת גבולן הציל ישראל מיד פלשתים ויהי שלום בין ישראל ובין האמרי:

Segment 15
HE:
וישפט שמואל את ישראל כל ימי חייו:

Segment 16
HE:
והלך מדי שנה בשנה וסבב בית אל והגלגל והמצפה ושפט את ישראל את כל המקומות האלה:

Segment 17
HE:
ותשבתו הרמתה כי שם ביתו ושם שפט את ישראל ויבן שם מזבח ליהוה: (פ)



# Samuel 1 Chapter 8
URL: https://ajew.org/reader-plain/tanach-shmuel-a/1/8/

Samuel 1 Chapter 8
שמואל א פרק ח
Source: https://ajew.org/reader/tanach-shmuel-a/1/8

Segment 1
HE:
ויהי כאשר זקן שמואל וישם את בניו שפטים לישראל:

Segment 2
HE:
ויהי שם בנו הבכור יואל ושם משנהו אביה שפטים בבאר שבע:

Segment 3
HE:
ולא הלכו בניו (בדרכו) בדרכיו ויטו אחרי הבצע ויקחו שחד ויטו משפט: (פ)

Segment 4
HE:
ויתקבצו כל זקני ישראל ויבאו אל שמואל הרמתה:

Segment 5
HE:
ויאמרו אליו הנה אתה זקנת ובניך לא הלכו בדרכיך עתה שימה לנו מלך לשפטנו ככל הגוים:

Segment 6
HE:
וירע הדבר בעיני שמואל כאשר אמרו תנה לנו מלך לשפטנו ויתפלל שמואל אל יהוה: (פ)

Segment 7
HE:
ויאמר יהוה אל שמואל שמע בקול העם לכל אשר יאמרו אליך כי לא אתך מאסו כי אתי מאסו ממלך עליהם:

Segment 8
HE:
ככל המעשים אשר עשו מיום העלתי אתם ממצרים ועד היום הזה ויעזבני ויעבדו אלהים אחרים כן המה עשים גם לך:

Segment 9
HE:
ועתה שמע בקולם אך כי העד תעיד בהם והגדת להם משפט המלך אשר ימלך עליהם: (ס)

Segment 10
HE:
ויאמר שמואל את כל דברי יהוה אל העם השאלים מאתו מלך: (ס)

Segment 11
HE:
ויאמר זה יהיה משפט המלך אשר ימלך עליכם את בניכם יקח ושם לו במרכבתו ובפרשיו ורצו לפני מרכבתו:

Segment 12
HE:
ולשום לו שרי אלפים ושרי חמשים ולחרש חרישו ולקצר קצירו ולעשות כלי מלחמתו וכלי רכבו:

Segment 13
HE:
ואת בנותיכם יקח לרקחות ולטבחות ולאפות:

Segment 14
HE:
ואת שדותיכם ואת כרמיכם וזיתיכם הטובים יקח ונתן לעבדיו:

Segment 15
HE:
וזרעיכם וכרמיכם יעשר ונתן לסריסיו ולעבדיו:

Segment 16
HE:
ואת עבדיכם ואת שפחותיכם ואת בחוריכם הטובים ואת חמוריכם יקח ועשה למלאכתו:

Segment 17
HE:
צאנכם יעשר ואתם תהיו לו לעבדים:

Segment 18
HE:
וזעקתם ביום ההוא מלפני מלככם אשר בחרתם לכם ולא יענה יהוה אתכם ביום ההוא:

Segment 19
HE:
וימאנו העם לשמע בקול שמואל ויאמרו לא כי אם מלך יהיה עלינו:

Segment 20
HE:
והיינו גם אנחנו ככל הגוים ושפטנו מלכנו ויצא לפנינו ונלחם את מלחמתנו:

Segment 21
HE:
וישמע שמואל את כל דברי העם וידברם באזני יהוה: (פ)

Segment 22
HE:
ויאמר יהוה אל שמואל שמע בקולם והמלכת להם מלך ויאמר שמואל אל אנשי ישראל לכו איש לעירו: (פ)



# Samuel 1 Chapter 9
URL: https://ajew.org/reader-plain/tanach-shmuel-a/1/9/

Samuel 1 Chapter 9
שמואל א פרק ט
Source: https://ajew.org/reader/tanach-shmuel-a/1/9

Segment 1
HE:
ויהי איש (מבן) (ימין) מבנימין ושמו קיש בן אביאל בן צרור בן בכורת בן אפיח בן איש ימיני גבור חיל:

Segment 2
HE:
ולו היה בן ושמו שאול בחור וטוב ואין איש מבני ישראל טוב ממנו משכמו ומעלה גבה מכל העם:

Segment 3
HE:
ותאבדנה האתנות לקיש אבי שאול ויאמר קיש אל שאול בנו קח נא אתך את אחד מהנערים וקום לך בקש את האתנת:

Segment 4
HE:
ויעבר בהר אפרים ויעבר בארץ שלשה ולא מצאו ויעברו בארץ שעלים ואין ויעבר בארץ ימיני ולא מצאו:

Segment 5
HE:
המה באו בארץ צוף ושאול אמר לנערו אשר עמו לכה ונשובה פן יחדל אבי מן האתנות ודאג לנו:

Segment 6
HE:
ויאמר לו הנה נא איש אלהים בעיר הזאת והאיש נכבד כל אשר ידבר בוא יבוא עתה נלכה שם אולי יגיד לנו את דרכנו אשר הלכנו עליה:

Segment 7
HE:
ויאמר שאול לנערו והנה נלך ומה נביא לאיש כי הלחם אזל מכלינו ותשורה אין להביא לאיש האלהים מה אתנו:

Segment 8
HE:
ויסף הנער לענות את שאול ויאמר הנה נמצא בידי רבע שקל כסף ונתתי לאיש האלהים והגיד לנו את דרכנו:

Segment 9
HE:
לפנים בישראל כה אמר האיש בלכתו לדרוש אלהים לכו ונלכה עד הראה כי לנביא היום יקרא לפנים הראה:

Segment 10
HE:
ויאמר שאול לנערו טוב דברך לכה נלכה וילכו אל העיר אשר שם איש האלהים:

Segment 11
HE:
המה עלים במעלה העיר והמה מצאו נערות יצאות לשאב מים ויאמרו להן היש בזה הראה:

Segment 12
HE:
ותענינה אותם ותאמרנה יש הנה לפניך מהר עתה כי היום בא לעיר כי זבח היום לעם בבמה:

Segment 13
HE:
כבאכם העיר כן תמצאון אתו בטרם יעלה הבמתה לאכל כי לא יאכל העם עד באו כי הוא יברך הזבח אחרי כן יאכלו הקראים ועתה עלו כי אתו כהיום תמצאון אתו:

Segment 14
HE:
ויעלו העיר המה באים בתוך העיר והנה שמואל יצא לקראתם לעלות הבמה: (ס)

Segment 15
HE:
ויהוה גלה את אזן שמואל יום אחד לפני בוא שאול לאמר:

Segment 16
HE:
כעת מחר אשלח אליך איש מארץ בנימן ומשחתו לנגיד על עמי ישראל והושיע את עמי מיד פלשתים כי ראיתי את עמי כי באה צעקתו אלי:

Segment 17
HE:
ושמואל ראה את שאול ויהוה ענהו הנה האיש אשר אמרתי אליך זה יעצר בעמי:

Segment 18
HE:
ויגש שאול את שמואל בתוך השער ויאמר הגידה נא לי אי זה בית הראה:

Segment 19
HE:
ויען שמואל את שאול ויאמר אנכי הראה עלה לפני הבמה ואכלתם עמי היום ושלחתיך בבקר וכל אשר בלבבך אגיד לך:

Segment 20
HE:
ולאתנות האבדות לך היום שלשת הימים אל תשם את לבך להם כי נמצאו ולמי כל חמדת ישראל הלוא לך ולכל בית אביך:

Segment 21
HE:
ויען שאול ויאמר הלוא בן ימיני אנכי מקטני שבטי ישראל ומשפחתי הצערה מכל משפחות שבטי בנימן ולמה דברת אלי כדבר הזה: (ס)

Segment 22
HE:
ויקח שמואל את שאול ואת נערו ויביאם לשכתה ויתן להם מקום בראש הקרואים והמה כשלשים איש:

Segment 23
HE:
ויאמר שמואל לטבח תנה את המנה אשר נתתי לך אשר אמרתי אליך שים אתה עמך:

Segment 24
HE:
וירם הטבח את השוק והעליה וישם לפני שאול ויאמר הנה הנשאר שים לפניך אכל כי למועד שמור לך לאמר העם קראתי ויאכל שאול עם שמואל ביום ההוא:

Segment 25
HE:
וירדו מהבמה העיר וידבר עם שאול על הגג:

Segment 26
HE:
וישכמו ויהי כעלות השחר ויקרא שמואל אל שאול (הגג) הגגה לאמר קומה ואשלחך ויקם שאול ויצאו שניהם הוא ושמואל החוצה:

Segment 27
HE:
המה יורדים בקצה העיר ושמואל אמר אל שאול אמר לנער ויעבר לפנינו ויעבר ואתה עמד כיום ואשמיעך את דבר אלהים: (פ)