Samuel 2 Chapter 11
שמואל ב פרק יא
Source: https://ajew.org/reader/tanach-shmuel-b/1/11

Segment 1
HE:
ויהי לתשובת השנה לעת צאת המלאכים וישלח דוד את יואב ואת עבדיו עמו ואת כל ישראל וישחתו את בני עמון ויצרו על רבה ודוד יושב בירושלם: (ס)

Segment 2
HE:
ויהי לעת הערב ויקם דוד מעל משכבו ויתהלך על גג בית המלך וירא אשה רחצת מעל הגג והאשה טובת מראה מאד:

Segment 3
HE:
וישלח דוד וידרש לאשה ויאמר הלוא זאת בת שבע בת אליעם אשת אוריה החתי:

Segment 4
HE:
וישלח דוד מלאכים ויקחה ותבוא אליו וישכב עמה והיא מתקדשת מטמאתה ותשב אל ביתה:

Segment 5
HE:
ותהר האשה ותשלח ותגד לדוד ותאמר הרה אנכי:

Segment 6
HE:
וישלח דוד אל יואב שלח אלי את אוריה החתי וישלח יואב את אוריה אל דוד:

Segment 7
HE:
ויבא אוריה אליו וישאל דוד לשלום יואב ולשלום העם ולשלום המלחמה:

Segment 8
HE:
ויאמר דוד לאוריה רד לביתך ורחץ רגליך ויצא אוריה מבית המלך ותצא אחריו משאת המלך:

Segment 9
HE:
וישכב אוריה פתח בית המלך את כל עבדי אדניו ולא ירד אל ביתו:

Segment 10
HE:
ויגדו לדוד לאמר לא ירד אוריה אל ביתו ויאמר דוד אל אוריה הלוא מדרך אתה בא מדוע לא ירדת אל ביתך:

Segment 11
HE:
ויאמר אוריה אל דוד הארון וישראל ויהודה ישבים בסכות ואדני יואב ועבדי אדני על פני השדה חנים ואני אבוא אל ביתי לאכל ולשתות ולשכב עם אשתי חיך וחי נפשך אם אעשה את הדבר הזה:

Segment 12
HE:
ויאמר דוד אל אוריה שב בזה גם היום ומחר אשלחך וישב אוריה בירושלם ביום ההוא וממחרת:

Segment 13
HE:
ויקרא לו דוד ויאכל לפניו וישת וישכרהו ויצא בערב לשכב במשכבו עם עבדי אדניו ואל ביתו לא ירד:

Segment 14
HE:
ויהי בבקר ויכתב דוד ספר אל יואב וישלח ביד אוריה:

Segment 15
HE:
ויכתב בספר לאמר הבו את אוריה אל מול פני המלחמה החזקה ושבתם מאחריו ונכה ומת: (ס)

Segment 16
HE:
ויהי בשמור יואב אל העיר ויתן את אוריה אל המקום אשר ידע כי אנשי חיל שם:

Segment 17
HE:
ויצאו אנשי העיר וילחמו את יואב ויפל מן העם מעבדי דוד וימת גם אוריה החתי:

Segment 18
HE:
וישלח יואב ויגד לדוד את כל דברי המלחמה:

Segment 19
HE:
ויצו את המלאך לאמר ככלותך את כל דברי המלחמה לדבר אל המלך:

Segment 20
HE:
והיה אם תעלה חמת המלך ואמר לך מדוע נגשתם אל העיר להלחם הלוא ידעתם את אשר ירו מעל החומה:

Segment 21
HE:
מי הכה את אבימלך בן ירבשת הלוא אשה השליכה עליו פלח רכב מעל החומה וימת בתבץ למה נגשתם אל החומה ואמרת גם עבדך אוריה החתי מת:

Segment 22
HE:
וילך המלאך ויבא ויגד לדוד את כל אשר שלחו יואב:

Segment 23
HE:
ויאמר המלאך אל דוד כי גברו עלינו האנשים ויצאו אלינו השדה ונהיה עליהם עד פתח השער:

Segment 24
HE:
(ויראו) וירו (המוראים) המורים אל עבדך מעל החומה וימותו מעבדי המלך וגם עבדך אוריה החתי מת: (ס)

Segment 25
HE:
ויאמר דוד אל המלאך כה תאמר אל יואב אל ירע בעיניך את הדבר הזה כי כזה וכזה תאכל החרב החזק מלחמתך אל העיר והרסה וחזקהו:

Segment 26
HE:
ותשמע אשת אוריה כי מת אוריה אישה ותספד על בעלה:

Segment 27
HE:
ויעבר האבל וישלח דוד ויאספה אל ביתו ותהי לו לאשה ותלד לו בן וירע הדבר אשר עשה דוד בעיני יהוה: (פ)