Samuel 2 Chapter 13
שמואל ב פרק יג
Source: https://ajew.org/reader/tanach-shmuel-b/1/13

Segment 1
HE:
ויהי אחרי כן ולאבשלום בן דוד אחות יפה ושמה תמר ויאהבה אמנון בן דוד:

Segment 2
HE:
ויצר לאמנון להתחלות בעבור תמר אחתו כי בתולה היא ויפלא בעיני אמנון לעשות לה מאומה:

Segment 3
HE:
ולאמנון רע ושמו יונדב בן שמעה אחי דוד ויונדב איש חכם מאד:

Segment 4
HE:
ויאמר לו מדוע אתה ככה דל בן המלך בבקר בבקר הלוא תגיד לי ויאמר לו אמנון את תמר אחות אבשלם אחי אני אהב:

Segment 5
HE:
ויאמר לו יהונדב שכב על משכבך והתחל ובא אביך לראותך ואמרת אליו תבא נא תמר אחותי ותברני לחם ועשתה לעיני את הבריה למען אשר אראה ואכלתי מידה:

Segment 6
HE:
וישכב אמנון ויתחל ויבא המלך לראתו ויאמר אמנון אל המלך תבוא נא תמר אחתי ותלבב לעיני שתי לבבות ואברה מידה:

Segment 7
HE:
וישלח דוד אל תמר הביתה לאמר לכי נא בית אמנון אחיך ועשי לו הבריה:

Segment 8
HE:
ותלך תמר בית אמנון אחיה והוא שכב ותקח את הבצק (ותלוש) ותלש ותלבב לעיניו ותבשל את הלבבות:

Segment 9
HE:
ותקח את המשרת ותצק לפניו וימאן לאכול ויאמר אמנון הוציאו כל איש מעלי ויצאו כל איש מעליו:

Segment 10
HE:
ויאמר אמנון אל תמר הביאי הבריה החדר ואברה מידך ותקח תמר את הלבבות אשר עשתה ותבא לאמנון אחיה החדרה:

Segment 11
HE:
ותגש אליו לאכל ויחזק בה ויאמר לה בואי שכבי עמי אחותי:

Segment 12
HE:
ותאמר לו אל אחי אל תענני כי לא יעשה כן בישראל אל תעשה את הנבלה הזאת:

Segment 13
HE:
ואני אנה אוליך את חרפתי ואתה תהיה כאחד הנבלים בישראל ועתה דבר נא אל המלך כי לא ימנעני ממך:

Segment 14
HE:
ולא אבה לשמע בקולה ויחזק ממנה ויענה וישכב אתה:

Segment 15
HE:
וישנאה אמנון שנאה גדולה מאד כי גדולה השנאה אשר שנאה מאהבה אשר אהבה ויאמר לה אמנון קומי לכי:

Segment 16
HE:
ותאמר לו אל אודת הרעה הגדולה הזאת מאחרת אשר עשית עמי לשלחני ולא אבה לשמע לה:

Segment 17
HE:
ויקרא את נערו משרתו ויאמר שלחו נא את זאת מעלי החוצה ונעל הדלת אחריה:

Segment 18
HE:
ועליה כתנת פסים כי כן תלבשן בנות המלך הבתולת מעילים ויצא אותה משרתו החוץ ונעל הדלת אחריה:

Segment 19
HE:
ותקח תמר אפר על ראשה וכתנת הפסים אשר עליה קרעה ותשם ידה על ראשה ותלך הלוך וזעקה:

Segment 20
HE:
ויאמר אליה אבשלום אחיה האמינון אחיך היה עמך ועתה אחותי החרישי אחיך הוא אל תשיתי את לבך לדבר הזה ותשב תמר ושממה בית אבשלום אחיה:

Segment 21
HE:
והמלך דוד שמע את כל הדברים האלה ויחר לו מאד:

Segment 22
HE:
ולא דבר אבשלום עם אמנון למרע ועד טוב כי שנא אבשלום את אמנון על דבר אשר ענה את תמר אחתו: (פ)

Segment 23
HE:
ויהי לשנתים ימים ויהיו גזזים לאבשלום בבעל חצור אשר עם אפרים ויקרא אבשלום לכל בני המלך:

Segment 24
HE:
ויבא אבשלום אל המלך ויאמר הנה נא גזזים לעבדך ילך נא המלך ועבדיו עם עבדך:

Segment 25
HE:
ויאמר המלך אל אבשלום אל בני אל נא נלך כלנו ולא נכבד עליך ויפרץ בו ולא אבה ללכת ויברכהו:

Segment 26
HE:
ויאמר אבשלום ולא ילך נא אתנו אמנון אחי ויאמר לו המלך למה ילך עמך:

Segment 27
HE:
ויפרץ בו אבשלום וישלח אתו את אמנון ואת כל בני המלך: (ס)

Segment 28
HE:
ויצו אבשלום את נעריו לאמר ראו נא כטוב לב אמנון ביין ואמרתי אליכם הכו את אמנון והמתם אתו אל תיראו הלוא כי אנכי צויתי אתכם חזקו והיו לבני חיל:

Segment 29
HE:
ויעשו נערי אבשלום לאמנון כאשר צוה אבשלום ויקמו כל בני המלך וירכבו איש על פרדו וינסו:

Segment 30
HE:
ויהי המה בדרך והשמעה באה אל דוד לאמר הכה אבשלום את כל בני המלך ולא נותר מהם אחד: (ס)

Segment 31
HE:
ויקם המלך ויקרע את בגדיו וישכב ארצה וכל עבדיו נצבים קרעי בגדים: (ס)

Segment 32
HE:
ויען יונדב בן שמעה אחי דוד ויאמר אל יאמר אדני את כל הנערים בני המלך המיתו כי אמנון לבדו מת כי על פי אבשלום היתה שומה מיום ענתו את תמר אחתו:

Segment 33
HE:
ועתה אל ישם אדני המלך אל לבו דבר לאמר כל בני המלך מתו כי אם אמנון לבדו מת: (פ)

Segment 34
HE:
ויברח אבשלום וישא הנער הצפה את (עינו) עיניו וירא והנה עם רב הלכים מדרך אחריו מצד ההר:

Segment 35
HE:
ויאמר יונדב אל המלך הנה בני המלך באו כדבר עבדך כן היה:

Segment 36
HE:
ויהי ככלתו לדבר והנה בני המלך באו וישאו קולם ויבכו וגם המלך וכל עבדיו בכו בכי גדול מאד:

Segment 37
HE:
ואבשלום ברח וילך אל תלמי בן (עמיחור) עמיהוד מלך גשור ויתאבל על בנו כל הימים:

Segment 38
HE:
ואבשלום ברח וילך גשור ויהי שם שלש שנים:

Segment 39
HE:
ותכל דוד המלך לצאת אל אבשלום כי נחם על אמנון כי מת: (ס)