Samuel 2 Chapter 18
שמואל ב פרק יח
Source: https://ajew.org/reader/tanach-shmuel-b/1/18

Segment 1
HE:
ויפקד דוד את העם אשר אתו וישם עליהם שרי אלפים ושרי מאות:

Segment 2
HE:
וישלח דוד את העם השלשית ביד יואב והשלשית ביד אבישי בן צרויה אחי יואב והשלשת ביד אתי הגתי (ס) ויאמר המלך אל העם יצא אצא גם אני עמכם:

Segment 3
HE:
ויאמר העם לא תצא כי אם נס ננוס לא ישימו אלינו לב ואם ימתו חצינו לא ישימו אלינו לב כי עתה כמנו עשרה אלפים ועתה טוב כי תהיה לנו מעיר (לעזיר) לעזור: (ס)

Segment 4
HE:
ויאמר אליהם המלך אשר ייטב בעיניכם אעשה ויעמד המלך אל יד השער וכל העם יצאו למאות ולאלפים:

Segment 5
HE:
ויצו המלך את יואב ואת אבישי ואת אתי לאמר לאט לי לנער לאבשלום וכל העם שמעו בצות המלך את כל השרים על דבר אבשלום:

Segment 6
HE:
ויצא העם השדה לקראת ישראל ותהי המלחמה ביער אפרים:

Segment 7
HE:
וינגפו שם עם ישראל לפני עבדי דוד ותהי שם המגפה גדולה ביום ההוא עשרים אלף:

Segment 8
HE:
ותהי שם המלחמה (נפצית) נפצת על פני כל הארץ וירב היער לאכל בעם מאשר אכלה החרב ביום ההוא:

Segment 9
HE:
ויקרא אבשלום לפני עבדי דוד ואבשלום רכב על הפרד ויבא הפרד תחת שובך האלה הגדולה ויחזק ראשו באלה ויתן בין השמים ובין הארץ והפרד אשר תחתיו עבר:

Segment 10
HE:
וירא איש אחד ויגד ליואב ויאמר הנה ראיתי את אבשלם תלוי באלה:

Segment 11
HE:
ויאמר יואב לאיש המגיד לו והנה ראית ומדוע לא הכיתו שם ארצה ועלי לתת לך עשרה כסף וחגרה אחת:

Segment 12
HE:
ויאמר האיש אל יואב (ולא) ולוא אנכי שקל על כפי אלף כסף לא אשלח ידי אל בן המלך כי באזנינו צוה המלך אתך ואת אבישי ואת אתי לאמר שמרו מי בנער באבשלום:

Segment 13
HE:
או עשיתי (בנפשו) בנפשי שקר וכל דבר לא יכחד מן המלך ואתה תתיצב מנגד:

Segment 14
HE:
ויאמר יואב לא כן אחילה לפניך ויקח שלשה שבטים בכפו ויתקעם בלב אבשלום עודנו חי בלב האלה:

Segment 15
HE:
ויסבו עשרה נערים נשאי כלי יואב ויכו את אבשלום וימיתהו:

Segment 16
HE:
ויתקע יואב בשפר וישב העם מרדף אחרי ישראל כי חשך יואב את העם:

Segment 17
HE:
ויקחו את אבשלום וישליכו אתו ביער אל הפחת הגדול ויצבו עליו גל אבנים גדול מאד וכל ישראל נסו איש (לאהלו) לאהליו: (ס)

Segment 18
HE:
ואבשלם לקח ויצב לו (בחיו) בחייו את מצבת אשר בעמק המלך כי אמר אין לי בן בעבור הזכיר שמי ויקרא למצבת על שמו ויקרא לה יד אבשלם עד היום הזה: (ס)

Segment 19
HE:
ואחימעץ בן צדוק אמר ארוצה נא ואבשרה את המלך כי שפטו יהוה מיד איביו:

Segment 20
HE:
ויאמר לו יואב לא איש בשרה אתה היום הזה ובשרת ביום אחר והיום הזה לא תבשר כי (על) על כן בן המלך מת:

Segment 21
HE:
ויאמר יואב לכושי לך הגד למלך אשר ראיתה וישתחו כושי ליואב וירץ:

Segment 22
HE:
ויסף עוד אחימעץ בן צדוק ויאמר אל יואב ויהי מה ארצה נא גם אני אחרי הכושי ויאמר יואב למה זה אתה רץ בני ולכה אין בשורה מצאת:

Segment 23
HE:
ויהי מה ארוץ ויאמר לו רוץ וירץ אחימעץ דרך הככר ויעבר את הכושי:

Segment 24
HE:
ודוד יושב בין שני השערים וילך הצפה אל גג השער אל החומה וישא את עיניו וירא והנה איש רץ לבדו:

Segment 25
HE:
ויקרא הצפה ויגד למלך ויאמר המלך אם לבדו בשורה בפיו וילך הלוך וקרב:

Segment 26
HE:
וירא הצפה איש אחר רץ ויקרא הצפה אל השער ויאמר הנה איש רץ לבדו ויאמר המלך גם זה מבשר:

Segment 27
HE:
ויאמר הצפה אני ראה את מרוצת הראשון כמרצת אחימעץ בן צדוק ויאמר המלך איש טוב זה ואל בשורה טובה יבוא:

Segment 28
HE:
ויקרא אחימעץ ויאמר אל המלך שלום וישתחו למלך לאפיו ארצה (ס) ויאמר ברוך יהוה אלהיך אשר סגר את האנשים אשר נשאו את ידם באדני המלך:

Segment 29
HE:
ויאמר המלך שלום לנער לאבשלום ויאמר אחימעץ ראיתי ההמון הגדול לשלח את עבד המלך יואב ואת עבדך ולא ידעתי מה:

Segment 30
HE:
ויאמר המלך סב התיצב כה ויסב ויעמד:

Segment 31
HE:
והנה הכושי בא ויאמר הכושי יתבשר אדני המלך כי שפטך יהוה היום מיד כל הקמים עליך: (ס)

Segment 32
HE:
ויאמר המלך אל הכושי השלום לנער לאבשלום ויאמר הכושי יהיו כנער איבי אדני המלך וכל אשר קמו עליך לרעה: (ס)