Samuel 2 Chapter 20
שמואל ב פרק כ
Source: https://ajew.org/reader/tanach-shmuel-b/1/20

Segment 1
HE:
ושם נקרא איש בליעל ושמו שבע בן בכרי איש ימיני ויתקע בשפר ויאמר אין לנו חלק בדוד ולא נחלה לנו בבן ישי איש לאהליו ישראל:

Segment 2
HE:
ויעל כל איש ישראל מאחרי דוד אחרי שבע בן בכרי ואיש יהודה דבקו במלכם מן הירדן ועד ירושלם:

Segment 3
HE:
ויבא דוד אל ביתו ירושלם ויקח המלך את עשר נשים פלגשים אשר הניח לשמר הבית ויתנם בית משמרת ויכלכלם ואליהם לא בא ותהיינה צררות עד יום מתן אלמנות חיות: (ס)

Segment 4
HE:
ויאמר המלך אל עמשא הזעק לי את איש יהודה שלשת ימים ואתה פה עמד:

Segment 5
HE:
וילך עמשא להזעיק את יהודה (וייחר) ויוחר מן המועד אשר יעדו: (ס)

Segment 6
HE:
ויאמר דוד אל אבישי עתה ירע לנו שבע בן בכרי מן אבשלום אתה קח את עבדי אדניך ורדף אחריו פן מצא לו ערים בצרות והציל עיננו:

Segment 7
HE:
ויצאו אחריו אנשי יואב והכרתי והפלתי וכל הגברים ויצאו מירושלם לרדף אחרי שבע בן בכרי:

Segment 8
HE:
הם עם האבן הגדולה אשר בגבעון ועמשא בא לפניהם ויואב חגור מדו לבשו (ועלו) ועליו חגור חרב מצמדת על מתניו בתערה והוא יצא ותפל: (ס)

Segment 9
HE:
ויאמר יואב לעמשא השלום אתה אחי ותחז יד ימין יואב בזקן עמשא לנשק לו:

Segment 10
HE:
ועמשא לא נשמר בחרב אשר ביד יואב ויכהו בה אל החמש וישפך מעיו ארצה ולא שנה לו וימת (ס) ויואב ואבישי אחיו רדף אחרי שבע בן בכרי:

Segment 11
HE:
ואיש עמד עליו מנערי יואב ויאמר מי אשר חפץ ביואב ומי אשר לדוד אחרי יואב:

Segment 12
HE:
ועמשא מתגלל בדם בתוך המסלה וירא האיש כי עמד כל העם ויסב את עמשא מן המסלה השדה וישלך עליו בגד כאשר ראה כל הבא עליו ועמד:

Segment 13
HE:
כאשר הגה מן המסלה עבר כל איש אחרי יואב לרדף אחרי שבע בן בכרי:

Segment 14
HE:
ויעבר בכל שבטי ישראל אבלה ובית מעכה וכל הברים (ס) (ויקלהו) ויקהלו ויבאו אף אחריו:

Segment 15
HE:
ויבאו ויצרו עליו באבלה בית המעכה וישפכו סללה אל העיר ותעמד בחל וכל העם אשר את יואב משחיתם להפיל החומה:

Segment 16
HE:
ותקרא אשה חכמה מן העיר שמעו שמעו אמרו נא אל יואב קרב עד הנה ואדברה אליך:

Segment 17
HE:
ויקרב אליה ותאמר האשה האתה יואב ויאמר אני ותאמר לו שמע דברי אמתך ויאמר שמע אנכי:

Segment 18
HE:
ותאמר לאמר דבר ידברו בראשנה לאמר שאל ישאלו באבל וכן התמו:

Segment 19
HE:
אנכי שלמי אמוני ישראל אתה מבקש להמית עיר ואם בישראל למה תבלע נחלת יהוה: (פ)

Segment 20
HE:
ויען יואב ויאמר חלילה חלילה לי אם אבלע ואם אשחית:

Segment 21
HE:
לא כן הדבר כי איש מהר אפרים שבע בן בכרי שמו נשא ידו במלך בדוד תנו אתו לבדו ואלכה מעל העיר ותאמר האשה אל יואב הנה ראשו משלך אליך בעד החומה:

Segment 22
HE:
ותבוא האשה אל כל העם בחכמתה ויכרתו את ראש שבע בן בכרי וישלכו אל יואב ויתקע בשופר ויפצו מעל העיר איש לאהליו ויואב שב ירושלם אל המלך: (ס)

Segment 23
HE:
ויואב אל כל הצבא ישראל ובניה בן יהוידע על (הכרי) הכרתי ועל הפלתי:

Segment 24
HE:
ואדרם על המס ויהושפט בן אחילוד המזכיר:

Segment 25
HE:
(ושיא) ושוא ספר וצדוק ואביתר כהנים:

Segment 26
HE:
וגם עירא היארי היה כהן לדוד: (ס)