Samuel 2 Chapter 7
שמואל ב פרק ז
Source: https://ajew.org/reader/tanach-shmuel-b/1/7

Segment 1
HE:
ויהי כי ישב המלך בביתו ויהוה הניח לו מסביב מכל איביו:

Segment 2
HE:
ויאמר המלך אל נתן הנביא ראה נא אנכי יושב בבית ארזים וארון האלהים ישב בתוך היריעה:

Segment 3
HE:
ויאמר נתן אל המלך כל אשר בלבבך לך עשה כי יהוה עמך: (ס)

Segment 4
HE:
ויהי בלילה ההוא ויהי דבר יהוה אל נתן לאמר:

Segment 5
HE:
לך ואמרת אל עבדי אל דוד כה אמר יהוה האתה תבנה לי בית לשבתי:

Segment 6
HE:
כי לא ישבתי בבית למיום העלתי את בני ישראל ממצרים ועד היום הזה ואהיה מתהלך באהל ובמשכן:

Segment 7
HE:
בכל אשר התהלכתי בכל בני ישראל הדבר דברתי את אחד שבטי ישראל אשר צויתי לרעות את עמי את ישראל לאמר למה לא בניתם לי בית ארזים:

Segment 8
HE:
ועתה כה תאמר לעבדי לדוד כה אמר יהוה צבאות אני לקחתיך מן הנוה מאחר הצאן להיות נגיד על עמי על ישראל:

Segment 9
HE:
ואהיה עמך בכל אשר הלכת ואכרתה את כל איביך מפניך ועשתי לך שם גדול כשם הגדלים אשר בארץ:

Segment 10
HE:
ושמתי מקום לעמי לישראל ונטעתיו ושכן תחתיו ולא ירגז עוד ולא יסיפו בני עולה לענותו כאשר בראשונה:

Segment 11
HE:
ולמן היום אשר צויתי שפטים על עמי ישראל והניחתי לך מכל איביך והגיד לך יהוה כי בית יעשה לך יהוה:

Segment 12
HE:
כי ימלאו ימיך ושכבת את אבתיך והקימתי את זרעך אחריך אשר יצא ממעיך והכינתי את ממלכתו:

Segment 13
HE:
הוא יבנה בית לשמי וכננתי את כסא ממלכתו עד עולם:

Segment 14
HE:
אני אהיה לו לאב והוא יהיה לי לבן אשר בהעותו והכחתיו בשבט אנשים ובנגעי בני אדם:

Segment 15
HE:
וחסדי לא יסור ממנו כאשר הסרתי מעם שאול אשר הסרתי מלפניך:

Segment 16
HE:
ונאמן ביתך וממלכתך עד עולם לפניך כסאך יהיה נכון עד עולם:

Segment 17
HE:
ככל הדברים האלה וככל החזיון הזה כן דבר נתן אל דוד: (ס)

Segment 18
HE:
ויבא המלך דוד וישב לפני יהוה ויאמר מי אנכי אדני יהוה ומי ביתי כי הביאתני עד הלם:

Segment 19
HE:
ותקטן עוד זאת בעיניך אדני יהוה ותדבר גם אל בית עבדך למרחוק וזאת תורת האדם אדני יהוה:

Segment 20
HE:
ומה יוסיף דוד עוד לדבר אליך ואתה ידעת את עבדך אדני יהוה:

Segment 21
HE:
בעבור דברך וכלבך עשית את כל הגדולה הזאת להודיע את עבדך:

Segment 22
HE:
על כן גדלת אדני יהוה כי אין כמוך ואין אלהים זולתך בכל אשר שמענו באזנינו:

Segment 23
HE:
ומי כעמך כישראל גוי אחד בארץ אשר הלכו אלהים לפדות לו לעם ולשום לו שם ולעשות לכם הגדולה ונראות לארצך מפני עמך אשר פדית לך ממצרים גוים ואלהיו:

Segment 24
HE:
ותכונן לך את עמך ישראל לך לעם עד עולם ואתה יהוה היית להם לאלהים: (ס)

Segment 25
HE:
ועתה יהוה אלהים הדבר אשר דברת על עבדך ועל ביתו הקם עד עולם ועשה כאשר דברת:

Segment 26
HE:
ויגדל שמך עד עולם לאמר יהוה צבאות אלהים על ישראל ובית עבדך דוד יהיה נכון לפניך:

Segment 27
HE:
כי אתה יהוה צבאות אלהי ישראל גליתה את אזן עבדך לאמר בית אבנה לך על כן מצא עבדך את לבו להתפלל אליך את התפלה הזאת:

Segment 28
HE:
ועתה אדני יהוה אתה הוא האלהים ודבריך יהיו אמת ותדבר אל עבדך את הטובה הזאת:

Segment 29
HE:
ועתה הואל וברך את בית עבדך להיות לעולם לפניך כי אתה אדני יהוה דברת ומברכתך יברך בית עבדך לעולם: (פ)