Judges Chapter 4
שופטים פרק ד
Source: https://ajew.org/reader/tanach-shoftim/1/4

Segment 1
HE:
ויספו בני ישראל לעשות הרע בעיני יהוה ואהוד מת:

Segment 2
HE:
וימכרם יהוה ביד יבין מלך כנען אשר מלך בחצור ושר צבאו סיסרא והוא יושב בחרשת הגוים:

Segment 3
HE:
ויצעקו בני ישראל אל יהוה כי תשע מאות רכב ברזל לו והוא לחץ את בני ישראל בחזקה עשרים שנה: (ס)

Segment 4
HE:
ודבורה אשה נביאה אשת לפידות היא שפטה את ישראל בעת ההיא:

Segment 5
HE:
והיא יושבת תחת תמר דבורה בין הרמה ובין בית אל בהר אפרים ויעלו אליה בני ישראל למשפט:

Segment 6
HE:
ותשלח ותקרא לברק בן אבינעם מקדש נפתלי ותאמר אליו הלא צוה יהוה אלהי ישראל לך ומשכת בהר תבור ולקחת עמך עשרת אלפים איש מבני נפתלי ומבני זבלון:

Segment 7
HE:
ומשכתי אליך אל נחל קישון את סיסרא שר צבא יבין ואת רכבו ואת המונו ונתתיהו בידך:

Segment 8
HE:
ויאמר אליה ברק אם תלכי עמי והלכתי ואם לא תלכי עמי לא אלך:

Segment 9
HE:
ותאמר הלך אלך עמך אפס כי לא תהיה תפארתך על הדרך אשר אתה הולך כי ביד אשה ימכר יהוה את סיסרא ותקם דבורה ותלך עם ברק קדשה:

Segment 10
HE:
ויזעק ברק את זבולן ואת נפתלי קדשה ויעל ברגליו עשרת אלפי איש ותעל עמו דבורה:

Segment 11
HE:
וחבר הקיני נפרד מקין מבני חבב חתן משה ויט אהלו עד אלון (בצענים) בצעננים אשר את קדש:

Segment 12
HE:
ויגדו לסיסרא כי עלה ברק בן אבינעם הר תבור: (ס)

Segment 13
HE:
ויזעק סיסרא את כל רכבו תשע מאות רכב ברזל ואת כל העם אשר אתו מחרשת הגוים אל נחל קישון:

Segment 14
HE:
ותאמר דברה אל ברק קום כי זה היום אשר נתן יהוה את סיסרא בידך הלא יהוה יצא לפניך וירד ברק מהר תבור ועשרת אלפים איש אחריו:

Segment 15
HE:
ויהם יהוה את סיסרא ואת כל הרכב ואת כל המחנה לפי חרב לפני ברק וירד סיסרא מעל המרכבה וינס ברגליו:

Segment 16
HE:
וברק רדף אחרי הרכב ואחרי המחנה עד חרשת הגוים ויפל כל מחנה סיסרא לפי חרב לא נשאר עד אחד:

Segment 17
HE:
וסיסרא נס ברגליו אל אהל יעל אשת חבר הקיני כי שלום בין יבין מלך חצור ובין בית חבר הקיני:

Segment 18
HE:
ותצא יעל לקראת סיסרא ותאמר אליו סורה אדני סורה אלי אל תירא ויסר אליה האהלה ותכסהו בשמיכה:

Segment 19
HE:
ויאמר אליה השקיני נא מעט מים כי צמאתי ותפתח את נאוד החלב ותשקהו ותכסהו:

Segment 20
HE:
ויאמר אליה עמד פתח האהל והיה אם איש יבוא ושאלך ואמר היש פה איש ואמרת אין:

Segment 21
HE:
ותקח יעל אשת חבר את יתד האהל ותשם את המקבת בידה ותבוא אליו בלאט ותתקע את היתד ברקתו ותצנח בארץ והוא נרדם ויעף וימת:

Segment 22
HE:
והנה ברק רדף את סיסרא ותצא יעל לקראתו ותאמר לו לך ואראך את האיש אשר אתה מבקש ויבא אליה והנה סיסרא נפל מת והיתד ברקתו:

Segment 23
HE:
ויכנע אלהים ביום ההוא את יבין מלך כנען לפני בני ישראל:

Segment 24
HE:
ותלך יד בני ישראל הלוך וקשה על יבין מלך כנען עד אשר הכריתו את יבין מלך כנען: (פ)