Judges Chapter 8
שופטים פרק ח
Source: https://ajew.org/reader/tanach-shoftim/1/8

Segment 1
HE:
ויאמרו אליו איש אפרים מה הדבר הזה עשית לנו לבלתי קראות לנו כי הלכת להלחם במדין ויריבון אתו בחזקה:

Segment 2
HE:
ויאמר אליהם מה עשיתי עתה ככם הלוא טוב עללות אפרים מבציר אביעזר:

Segment 3
HE:
בידכם נתן אלהים את שרי מדין את ערב ואת זאב ומה יכלתי עשות ככם אז רפתה רוחם מעליו בדברו הדבר הזה:

Segment 4
HE:
ויבא גדעון הירדנה עבר הוא ושלש מאות האיש אשר אתו עיפים ורדפים:

Segment 5
HE:
ויאמר לאנשי סכות תנו נא ככרות לחם לעם אשר ברגלי כי עיפים הם ואנכי רדף אחרי זבח וצלמנע מלכי מדין:

Segment 6
HE:
ויאמר שרי סכות הכף זבח וצלמנע עתה בידך כי נתן לצבאך לחם:

Segment 7
HE:
ויאמר גדעון לכן בתת יהוה את זבח ואת צלמנע בידי ודשתי את בשרכם את קוצי המדבר ואת הברקנים:

Segment 8
HE:
ויעל משם פנואל וידבר אליהם כזאת ויענו אותו אנשי פנואל כאשר ענו אנשי סכות:

Segment 9
HE:
ויאמר גם לאנשי פנואל לאמר בשובי בשלום אתץ את המגדל הזה: (פ)

Segment 10
HE:
וזבח וצלמנע בקרקר ומחניהם עמם כחמשת עשר אלף כל הנותרים מכל מחנה בני קדם והנפלים מאה ועשרים אלף איש שלף חרב:

Segment 11
HE:
ויעל גדעון דרך השכוני באהלים מקדם לנבח ויגבהה ויך את המחנה והמחנה היה בטח:

Segment 12
HE:
וינוסו זבח וצלמנע וירדף אחריהם וילכד את שני מלכי מדין את זבח ואת צלמנע וכל המחנה החריד:

Segment 13
HE:
וישב גדעון בן יואש מן המלחמה מלמעלה החרס:

Segment 14
HE:
וילכד נער מאנשי סכות וישאלהו ויכתב אליו את שרי סכות ואת זקניה שבעים ושבעה איש:

Segment 15
HE:
ויבא אל אנשי סכות ויאמר הנה זבח וצלמנע אשר חרפתם אותי לאמר הכף זבח וצלמנע עתה בידך כי נתן לאנשיך היעפים לחם:

Segment 16
HE:
ויקח את זקני העיר ואת קוצי המדבר ואת הברקנים וידע בהם את אנשי סכות:

Segment 17
HE:
ואת מגדל פנואל נתץ ויהרג את אנשי העיר:

Segment 18
HE:
ויאמר אל זבח ואל צלמנע איפה האנשים אשר הרגתם בתבור ויאמרו כמוך כמוהם אחד כתאר בני המלך:

Segment 19
HE:
ויאמר אחי בני אמי הם חי יהוה לו החיתם אותם לא הרגתי אתכם:

Segment 20
HE:
ויאמר ליתר בכורו קום הרג אותם ולא שלף הנער חרבו כי ירא כי עודנו נער:

Segment 21
HE:
ויאמר זבח וצלמנע קום אתה ופגע בנו כי כאיש גבורתו ויקם גדעון ויהרג את זבח ואת צלמנע ויקח את השהרנים אשר בצוארי גמליהם:

Segment 22
HE:
ויאמרו איש ישראל אל גדעון משל בנו גם אתה גם בנך גם בן בנך כי הושעתנו מיד מדין:

Segment 23
HE:
ויאמר אלהם גדעון לא אמשל אני בכם ולא ימשל בני בכם יהוה ימשל בכם:

Segment 24
HE:
ויאמר אלהם גדעון אשאלה מכם שאלה ותנו לי איש נזם שללו כי נזמי זהב להם כי ישמעאלים הם:

Segment 25
HE:
ויאמרו נתון נתן ויפרשו את השמלה וישליכו שמה איש נזם שללו:

Segment 26
HE:
ויהי משקל נזמי הזהב אשר שאל אלף ושבע מאות זהב לבד מן השהרנים והנטפות ובגדי הארגמן שעל מלכי מדין ולבד מן הענקות אשר בצוארי גמליהם:

Segment 27
HE:
ויעש אותו גדעון לאפוד ויצג אותו בעירו בעפרה ויזנו כל ישראל אחריו שם ויהי לגדעון ולביתו למוקש:

Segment 28
HE:
ויכנע מדין לפני בני ישראל ולא יספו לשאת ראשם ותשקט הארץ ארבעים שנה בימי גדעון: (פ)

Segment 29
HE:
וילך ירבעל בן יואש וישב בביתו:

Segment 30
HE:
ולגדעון היו שבעים בנים יצאי ירכו כי נשים רבות היו לו:

Segment 31
HE:
ופילגשו אשר בשכם ילדה לו גם היא בן וישם את שמו אבימלך:

Segment 32
HE:
וימת גדעון בן יואש בשיבה טובה ויקבר בקבר יואש אביו בעפרה אבי העזרי: (פ)

Segment 33
HE:
ויהי כאשר מת גדעון וישובו בני ישראל ויזנו אחרי הבעלים וישימו להם בעל ברית לאלהים:

Segment 34
HE:
ולא זכרו בני ישראל את יהוה אלהיהם המציל אותם מיד כל איביהם מסביב:

Segment 35
HE:
ולא עשו חסד עם בית ירבעל גדעון ככל הטובה אשר עשה עם ישראל: (פ)