Psalms Chapter 79
תהלים פרק עט
Source: https://ajew.org/reader/tanach-tehillim/1/79

Segment 1
HE:
מזמור לאסף אלהים באו גוים בנחלתך טמאו את היכל קדשך שמו את ירושלם לעיים:

Segment 2
HE:
נתנו את נבלת עבדיך מאכל לעוף השמים בשר חסידיך לחיתו ארץ:

Segment 3
HE:
שפכו דמם כמים סביבות ירושלם ואין קובר:

Segment 4
HE:
היינו חרפה לשכנינו לעג וקלס לסביבותינו:

Segment 5
HE:
עד מה יהוה תאנף לנצח תבער כמו אש קנאתך:

Segment 6
HE:
שפך חמתך אל הגוים אשר לא ידעוך ועל ממלכות אשר בשמך לא קראו:

Segment 7
HE:
כי אכל את יעקב ואת נוהו השמו:

Segment 8
HE:
אל תזכר לנו עונת ראשנים מהר יקדמונו רחמיך כי דלונו מאד:

Segment 9
HE:
עזרנו אלהי ישענו על דבר כבוד שמך והצילנו וכפר על חטאתינו למען שמך:

Segment 10
HE:
למה יאמרו הגוים איה אלהיהם יודע (בגיים) בגוים לעינינו נקמת דם עבדיך השפוך:

Segment 11
HE:
תבוא לפניך אנקת אסיר כגדל זרועך הותר בני תמותה:

Segment 12
HE:
והשב לשכנינו שבעתים אל חיקם חרפתם אשר חרפוך אדני:

Segment 13
HE:
ואנחנו עמך וצאן מרעיתך נודה לך לעולם לדר ודר נספר תהלתך: (פ)