Zephaniah Chapter 1
צפניה פרק א
Source: https://ajew.org/reader/tanach-tzefanya/1/1

Segment 1
HE:
דבר יהוה אשר היה אל צפניה בן כושי בן גדליה בן אמריה בן חזקיה בימי יאשיהו בן אמון מלך יהודה:

Segment 2
HE:
אסף אסף כל מעל פני האדמה נאם יהוה:

Segment 3
HE:
אסף אדם ובהמה אסף עוף השמים ודגי הים והמכשלות את הרשעים והכרתי את האדם מעל פני האדמה נאם יהוה:

Segment 4
HE:
ונטיתי ידי על יהודה ועל כל יושבי ירושלם והכרתי מן המקום הזה את שאר הבעל את שם הכמרים עם הכהנים:

Segment 5
HE:
ואת המשתחוים על הגגות לצבא השמים ואת המשתחוים הנשבעים ליהוה והנשבעים במלכם:

Segment 6
HE:
ואת הנסוגים מאחרי יהוה ואשר לא בקשו את יהוה ולא דרשהו:

Segment 7
HE:
הס מפני אדני יהוה כי קרוב יום יהוה כי הכין יהוה זבח הקדיש קראיו:

Segment 8
HE:
והיה ביום זבח יהוה ופקדתי על השרים ועל בני המלך ועל כל הלבשים מלבוש נכרי:

Segment 9
HE:
ופקדתי על כל הדולג על המפתן ביום ההוא הממלאים בית אדניהם חמס ומרמה:

Segment 10
HE:
והיה ביום ההוא נאם יהוה קול צעקה משער הדגים ויללה מן המשנה ושבר גדול מהגבעות:

Segment 11
HE:
הילילו ישבי המכתש כי נדמה כל עם כנען נכרתו כל נטילי כסף: (ס)

Segment 12
HE:
והיה בעת ההיא אחפש את ירושלם בנרות ופקדתי על האנשים הקפאים על שמריהם האמרים בלבבם לא ייטיב יהוה ולא ירע:

Segment 13
HE:
והיה חילם למשסה ובתיהם לשממה ובנו בתים ולא ישבו ונטעו כרמים ולא ישתו את יינם:

Segment 14
HE:
קרוב יום יהוה הגדול קרוב ומהר מאד קול יום יהוה מר צרח שם גבור:

Segment 15
HE:
יום עברה היום ההוא יום צרה ומצוקה יום שאה ומשואה יום חשך ואפלה יום ענן וערפל:

Segment 16
HE:
יום שופר ותרועה על הערים הבצרות ועל הפנות הגבהות:

Segment 17
HE:
והצרתי לאדם והלכו כעורים כי ליהוה חטאו ושפך דמם כעפר ולחמם כגללים:

Segment 18
HE:
גם כספם גם זהבם לא יוכל להצילם ביום עברת יהוה ובאש קנאתו תאכל כל הארץ כי כלה אך נבהלה יעשה את כל ישבי הארץ: (ס)