Leviticus Chapter 10
ויקרא פרק י
Source: https://ajew.org/reader/tanach-vayikra/1/10

Segment 1
HE:
ויקחו בני אהרן נדב ואביהוא איש מחתתו ויתנו בהן אש וישימו עליה קטרת ויקריבו לפני יהוה אש זרה אשר לא צוה אתם:

Segment 2
HE:
ותצא אש מלפני יהוה ותאכל אותם וימתו לפני יהוה:

Segment 3
HE:
ויאמר משה אל אהרן הוא אשר דבר יהוה לאמר בקרבי אקדש ועל פני כל העם אכבד וידם אהרן:

Segment 4
HE:
ויקרא משה אל מישאל ואל אלצפן בני עזיאל דד אהרן ויאמר אלהם קרבו שאו את אחיכם מאת פני הקדש אל מחוץ למחנה:

Segment 5
HE:
ויקרבו וישאם בכתנתם אל מחוץ למחנה כאשר דבר משה:

Segment 6
HE:
ויאמר משה אל אהרן ולאלעזר ולאיתמר בניו ראשיכם אל תפרעו ובגדיכם לא תפרמו ולא תמתו ועל כל העדה יקצף ואחיכם כל בית ישראל יבכו את השרפה אשר שרף יהוה:

Segment 7
HE:
ומפתח אהל מועד לא תצאו פן תמתו כי שמן משחת יהוה עליכם ויעשו כדבר משה: (פ)

Segment 8
HE:
וידבר יהוה אל אהרן לאמר:

Segment 9
HE:
יין ושכר אל תשת אתה ובניך אתך בבאכם אל אהל מועד ולא תמתו חקת עולם לדרתיכם:

Segment 10
HE:
ולהבדיל בין הקדש ובין החל ובין הטמא ובין הטהור:

Segment 11
HE:
ולהורת את בני ישראל את כל החקים אשר דבר יהוה אליהם ביד משה: (פ)

Segment 12
HE:
רביעי  וידבר משה אל אהרן ואל אלעזר ואל איתמר בניו הנותרים קחו את המנחה הנותרת מאשי יהוה ואכלוה מצות אצל המזבח כי קדש קדשים הוא:

Segment 13
HE:
ואכלתם אתה במקום קדוש כי חקך וחק בניך הוא מאשי יהוה כי כן צויתי:

Segment 14
HE:
ואת חזה התנופה ואת שוק התרומה תאכלו במקום טהור אתה ובניך ובנתיך אתך כי חקך וחק בניך נתנו מזבחי שלמי בני ישראל:

Segment 15
HE:
שוק התרומה וחזה התנופה על אשי החלבים יביאו להניף תנופה לפני יהוה והיה לך ולבניך אתך לחק עולם כאשר צוה יהוה:

Segment 16
HE:
חמישי  ואת שעיר החטאת דרש דרש משה והנה שרף ויקצף על אלעזר ועל איתמר בני אהרן הנותרם לאמר:

Segment 17
HE:
מדוע לא אכלתם את החטאת במקום הקדש כי קדש קדשים הוא ואתה נתן לכם לשאת את עון העדה לכפר עליהם לפני יהוה:

Segment 18
HE:
הן לא הובא את דמה אל הקדש פנימה אכול תאכלו אתה בקדש כאשר צויתי:

Segment 19
HE:
וידבר אהרן אל משה הן היום הקריבו את חטאתם ואת עלתם לפני יהוה ותקראנה אתי כאלה ואכלתי חטאת היום הייטב בעיני יהוה:

Segment 20
HE:
וישמע משה וייטב בעיניו: (פ)