Ezekiel Chapter 33
יחזקאל פרק לג
Source: https://ajew.org/reader/tanach-yechezkel/1/33

Segment 1
HE:
ויהי דבר יהוה אלי לאמר:

Segment 2
HE:
בן אדם דבר אל בני עמך ואמרת אליהם ארץ כי אביא עליה חרב ולקחו עם הארץ איש אחד מקציהם ונתנו אתו להם לצפה:

Segment 3
HE:
וראה את החרב באה על הארץ ותקע בשופר והזהיר את העם:

Segment 4
HE:
ושמע השמע את קול השופר ולא נזהר ותבוא חרב ותקחהו דמו בראשו יהיה:

Segment 5
HE:
את קול השופר שמע ולא נזהר דמו בו יהיה והוא נזהר נפשו מלט:

Segment 6
HE:
והצפה כי יראה את החרב באה ולא תקע בשופר והעם לא נזהר ותבוא חרב ותקח מהם נפש הוא בעונו נלקח ודמו מיד הצפה אדרש: (פ)

Segment 7
HE:
ואתה בן אדם צפה נתתיך לבית ישראל ושמעת מפי דבר והזהרת אתם ממני:

Segment 8
HE:
באמרי לרשע רשע מות תמות ולא דברת להזהיר רשע מדרכו הוא רשע בעונו ימות ודמו מידך אבקש:

Segment 9
HE:
ואתה כי הזהרת רשע מדרכו לשוב ממנה ולא שב מדרכו הוא בעונו ימות ואתה נפשך הצלת: (פ)

Segment 10
HE:
ואתה בן אדם אמר אל בית ישראל כן אמרתם לאמר כי פשעינו וחטאתינו עלינו ובם אנחנו נמקים ואיך נחיה:

Segment 11
HE:
אמר אליהם חי אני נאם אדני יהוה אם אחפץ במות הרשע כי אם בשוב רשע מדרכו וחיה שובו שובו מדרכיכם הרעים ולמה תמותו בית ישראל: (פ)

Segment 12
HE:
ואתה בן אדם אמר אל בני עמך צדקת הצדיק לא תצילנו ביום פשעו ורשעת הרשע לא יכשל בה ביום שובו מרשעו וצדיק לא יוכל לחיות בה ביום חטאתו:

Segment 13
HE:
באמרי לצדיק חיה יחיה והוא בטח על צדקתו ועשה עול כל (צדקתו) צדקתיו לא תזכרנה ובעולו אשר עשה בו ימות:

Segment 14
HE:
ובאמרי לרשע מות תמות ושב מחטאתו ועשה משפט וצדקה:

Segment 15
HE:
חבל ישיב רשע גזלה ישלם בחקות החיים הלך לבלתי עשות עול חיו יחיה לא ימות:

Segment 16
HE:
כל (חטאתו) חטאתיו אשר חטא לא תזכרנה לו משפט וצדקה עשה חיו יחיה:

Segment 17
HE:
ואמרו בני עמך לא יתכן דרך אדני והמה דרכם לא יתכן:

Segment 18
HE:
בשוב צדיק מצדקתו ועשה עול ומת בהם:

Segment 19
HE:
ובשוב רשע מרשעתו ועשה משפט וצדקה עליהם הוא יחיה:

Segment 20
HE:
ואמרתם לא יתכן דרך אדני איש כדרכיו אשפוט אתכם בית ישראל: (פ)

Segment 21
HE:
ויהי בשתי עשרה שנה בעשרי בחמשה לחדש לגלותנו בא אלי הפליט מירושלם לאמר הכתה העיר:

Segment 22
HE:
ויד יהוה היתה אלי בערב לפני בוא הפליט ויפתח את פי עד בוא אלי בבקר ויפתח פי ולא נאלמתי עוד: (פ)

Segment 23
HE:
ויהי דבר יהוה אלי לאמר:

Segment 24
HE:
בן אדם ישבי החרבות האלה על אדמת ישראל אמרים לאמר אחד היה אברהם ויירש את הארץ ואנחנו רבים לנו נתנה הארץ למורשה: (ס)

Segment 25
HE:
לכן אמר אליהם כה אמר אדני יהוה על הדם תאכלו ועינכם תשאו אל גלוליכם ודם תשפכו והארץ תירשו:

Segment 26
HE:
עמדתם על חרבכם עשיתן תועבה ואיש את אשת רעהו טמאתם והארץ תירשו: (ס)

Segment 27
HE:
כה תאמר אלהם כה אמר אדני יהוה חי אני אם לא אשר בחרבות בחרב יפלו ואשר על פני השדה לחיה נתתיו לאכלו ואשר במצדות ובמערות בדבר ימותו:

Segment 28
HE:
ונתתי את הארץ שממה ומשמה ונשבת גאון עזה ושממו הרי ישראל מאין עובר:

Segment 29
HE:
וידעו כי אני יהוה בתתי את הארץ שממה ומשמה על כל תועבתם אשר עשו: (פ)

Segment 30
HE:
ואתה בן אדם בני עמך הנדברים בך אצל הקירות ובפתחי הבתים ודבר חד את אחד איש את אחיו לאמר באו נא ושמעו מה הדבר היוצא מאת יהוה:

Segment 31
HE:
ויבואו אליך כמבוא עם וישבו לפניך עמי ושמעו את דבריך ואותם לא יעשו כי עגבים בפיהם המה עשים אחרי בצעם לבם הלך:

Segment 32
HE:
והנך להם כשיר עגבים יפה קול ומטב נגן ושמעו את דבריך ועשים אינם אותם:

Segment 33
HE:
ובבאה הנה באה וידעו כי נביא היה בתוכם: (פ)