Ezekiel Chapter 4
יחזקאל פרק ד
Source: https://ajew.org/reader/tanach-yechezkel/1/4

Segment 1
HE:
ואתה בן אדם קח לך לבנה ונתתה אותה לפניך וחקות עליה עיר את ירושלם:

Segment 2
HE:
ונתתה עליה מצור ובנית עליה דיק ושפכת עליה סללה ונתתה עליה מחנות ושים עליה כרים סביב:

Segment 3
HE:
ואתה קח לך מחבת ברזל ונתתה אותה קיר ברזל בינך ובין העיר והכינתה את פניך אליה והיתה במצור וצרת עליה אות היא לבית ישראל: (פ)

Segment 4
HE:
ואתה שכב על צדך השמאלי ושמת את עון בית ישראל עליו מספר הימים אשר תשכב עליו תשא את עונם:

Segment 5
HE:
ואני נתתי לך את שני עונם למספר ימים שלש מאות ותשעים יום ונשאת עון בית ישראל:

Segment 6
HE:
וכלית את אלה ושכבת על צדך (הימוני) הימני שנית ונשאת את עון בית יהודה ארבעים יום יום לשנה יום לשנה נתתיו לך:

Segment 7
HE:
ואל מצור ירושלם תכין פניך וזרעך חשופה ונבאת עליה:

Segment 8
HE:
והנה נתתי עליך עבותים ולא תהפך מצדך אל צדך עד כלותך ימי מצורך:

Segment 9
HE:
ואתה קח לך חטין ושערים ופול ועדשים ודחן וכסמים ונתתה אותם בכלי אחד ועשית אותם לך ללחם מספר הימים אשר אתה שוכב על צדך שלש מאות ותשעים יום תאכלנו:

Segment 10
HE:
ומאכלך אשר תאכלנו במשקול עשרים שקל ליום מעת עד עת תאכלנו:

Segment 11
HE:
ומים במשורה תשתה ששית ההין מעת עד עת תשתה:

Segment 12
HE:
ועגת שערים תאכלנה והיא בגללי צאת האדם תעגנה לעיניהם: (ס)

Segment 13
HE:
ויאמר יהוה ככה יאכלו בני ישראל את לחמם טמא בגוים אשר אדיחם שם:

Segment 14
HE:
ואמר אהה אדני יהוה הנה נפשי לא מטמאה ונבלה וטרפה לא אכלתי מנעורי ועד עתה ולא בא בפי בשר פגול: (ס)

Segment 15
HE:
ויאמר אלי ראה נתתי לך את (צפועי) צפיעי הבקר תחת גללי האדם ועשית את לחמך עליהם: (ס)

Segment 16
HE:
ויאמר אלי בן אדם הנני שבר מטה לחם בירושלם ואכלו לחם במשקל ובדאגה ומים במשורה ובשממון ישתו:

Segment 17
HE:
למען יחסרו לחם ומים ונשמו איש ואחיו ונמקו בעונם: (פ)