Ezekiel Chapter 44
יחזקאל פרק מד
Source: https://ajew.org/reader/tanach-yechezkel/1/44

Segment 1
HE:
וישב אתי דרך שער המקדש החיצון הפנה קדים והוא סגור:

Segment 2
HE:
ויאמר אלי יהוה השער הזה סגור יהיה לא יפתח ואיש לא יבא בו כי יהוה אלהי ישראל בא בו והיה סגור:

Segment 3
HE:
את הנשיא נשיא הוא ישב בו (לאכול) לאכל לחם לפני יהוה מדרך אלם השער יבוא ומדרכו יצא:

Segment 4
HE:
ויביאני דרך שער הצפון אל פני הבית וארא והנה מלא כבוד יהוה את בית יהוה ואפל אל פני:

Segment 5
HE:
ויאמר אלי יהוה בן אדם שים לבך וראה בעיניך ובאזניך שמע את כל אשר אני מדבר אתך לכל חקות בית יהוה ולכל (תורתו) תורתיו ושמת לבך למבוא הבית בכל מוצאי המקדש:

Segment 6
HE:
ואמרת אל מרי אל בית ישראל כה אמר אדני יהוה רב לכם מכל תועבותיכם בית ישראל:

Segment 7
HE:
בהביאכם בני נכר ערלי לב וערלי בשר להיות במקדשי לחללו את ביתי בהקריבכם את לחמי חלב ודם ויפרו את בריתי אל כל תועבותיכם:

Segment 8
HE:
ולא שמרתם משמרת קדשי ותשימון לשמרי משמרתי במקדשי לכם: (ס)

Segment 9
HE:
כה אמר אדני יהוה כל בן נכר ערל לב וערל בשר לא יבוא אל מקדשי לכל בן נכר אשר בתוך בני ישראל:

Segment 10
HE:
כי אם הלוים אשר רחקו מעלי בתעות ישראל אשר תעו מעלי אחרי גלוליהם ונשאו עונם:

Segment 11
HE:
והיו במקדשי משרתים פקדות אל שערי הבית ומשרתים את הבית המה ישחטו את העלה ואת הזבח לעם והמה יעמדו לפניהם לשרתם:

Segment 12
HE:
יען אשר ישרתו אותם לפני גלוליהם והיו לבית ישראל למכשול עון על כן נשאתי ידי עליהם נאם אדני יהוה ונשאו עונם:

Segment 13
HE:
ולא יגשו אלי לכהן לי ולגשת על כל קדשי אל קדשי הקדשים ונשאו כלמתם ותועבותם אשר עשו:

Segment 14
HE:
ונתתי אותם שמרי משמרת הבית לכל עבדתו ולכל אשר יעשה בו: (פ)

Segment 15
HE:
והכהנים הלוים בני צדוק אשר שמרו את משמרת מקדשי בתעות בני ישראל מעלי המה יקרבו אלי לשרתני ועמדו לפני להקריב לי חלב ודם נאם אדני יהוה:

Segment 16
HE:
המה יבאו אל מקדשי והמה יקרבו אל שלחני לשרתני ושמרו את משמרתי:

Segment 17
HE:
והיה בבואם אל שערי החצר הפנימית בגדי פשתים ילבשו ולא יעלה עליהם צמר בשרתם בשערי החצר הפנימית וביתה:

Segment 18
HE:
פארי פשתים יהיו על ראשם ומכנסי פשתים יהיו על מתניהם לא יחגרו ביזע:

Segment 19
HE:
ובצאתם אל החצר החיצונה אל החצר החיצונה אל העם יפשטו את בגדיהם אשר המה משרתם בם והניחו אותם בלשכת הקדש ולבשו בגדים אחרים ולא יקדשו את העם בבגדיהם:

Segment 20
HE:
וראשם לא יגלחו ופרע לא ישלחו כסום יכסמו את ראשיהם:

Segment 21
HE:
ויין לא ישתו כל כהן בבואם אל החצר הפנימית:

Segment 22
HE:
ואלמנה וגרושה לא יקחו להם לנשים כי אם בתולת מזרע בית ישראל והאלמנה אשר תהיה אלמנה מכהן יקחו:

Segment 23
HE:
ואת עמי יורו בין קדש לחל ובין טמא לטהור יודעם:

Segment 24
HE:
ועל ריב המה יעמדו (לשפט) למשפט במשפטי (ושפטהו) ישפטוהו ואת תורתי ואת חקתי בכל מועדי ישמרו ואת שבתותי יקדשו:

Segment 25
HE:
ואל מת אדם לא יבוא לטמאה כי אם לאב ולאם ולבן ולבת לאח ולאחות אשר לא היתה לאיש יטמאו:

Segment 26
HE:
ואחרי טהרתו שבעת ימים יספרו לו:

Segment 27
HE:
וביום באו אל הקדש אל החצר הפנימית לשרת בקדש יקריב חטאתו נאם אדני יהוה:

Segment 28
HE:
והיתה להם לנחלה אני נחלתם ואחזה לא תתנו להם בישראל אני אחזתם:

Segment 29
HE:
המנחה והחטאת והאשם המה יאכלום וכל חרם בישראל להם יהיה:

Segment 30
HE:
וראשית כל בכורי כל וכל תרומת כל מכל תרומותיכם לכהנים יהיה וראשית ערסותיכם תתנו לכהן להניח ברכה אל ביתך:

Segment 31
HE:
כל נבלה וטרפה מן העוף ומן הבהמה לא יאכלו הכהנים: (פ)