Ezekiel Chapter 45
יחזקאל פרק מה
Source: https://ajew.org/reader/tanach-yechezkel/1/45

Segment 1
HE:
ובהפילכם את הארץ בנחלה תרימו תרומה ליהוה קדש מן הארץ ארך חמשה ועשרים אלף ארך ורחב עשרה אלף קדש הוא בכל גבולה סביב:

Segment 2
HE:
יהיה מזה אל הקדש חמש מאות בחמש מאות מרבע סביב וחמשים אמה מגרש לו סביב:

Segment 3
HE:
ומן המדה הזאת תמוד ארך (חמש) חמשה ועשרים אלף ורחב עשרת אלפים ובו יהיה המקדש קדש קדשים:

Segment 4
HE:
קדש מן הארץ הוא לכהנים משרתי המקדש יהיה הקרבים לשרת את יהוה והיה להם מקום לבתים ומקדש למקדש:

Segment 5
HE:
וחמשה ועשרים אלף ארך ועשרת אלפים רחב (יהיה) והיה ללוים משרתי הבית להם לאחזה עשרים לשכת:

Segment 6
HE:
ואחזת העיר תתנו חמשת אלפים רחב וארך חמשה ועשרים אלף לעמת תרומת הקדש לכל בית ישראל יהיה:

Segment 7
HE:
ולנשיא מזה ומזה לתרומת הקדש ולאחזת העיר אל פני תרומת הקדש ואל פני אחזת העיר מפאת ים ימה ומפאת קדמה קדימה וארך לעמות אחד החלקים מגבול ים אל גבול קדימה:

Segment 8
HE:
לארץ יהיה לו לאחזה בישראל ולא יונו עוד נשיאי את עמי והארץ יתנו לבית ישראל לשבטיהם: (פ)

Segment 9
HE:
כה אמר אדני יהוה רב לכם נשיאי ישראל חמס ושד הסירו ומשפט וצדקה עשו הרימו גרשתיכם מעל עמי נאם אדני יהוה:

Segment 10
HE:
מאזני צדק ואיפת צדק ובת צדק יהי לכם:

Segment 11
HE:
האיפה והבת תכן אחד יהיה לשאת מעשר החמר הבת ועשירת החמר האיפה אל החמר יהיה מתכנתו:

Segment 12
HE:
והשקל עשרים גרה עשרים שקלים חמשה ועשרים שקלים עשרה וחמשה שקל המנה יהיה לכם:

Segment 13
HE:
זאת התרומה אשר תרימו ששית האיפה מחמר החטים וששיתם האיפה מחמר השערים:

Segment 14
HE:
וחק השמן הבת השמן מעשר הבת מן הכר עשרת הבתים חמר כי עשרת הבתים חמר:

Segment 15
HE:
ושה אחת מן הצאן מן המאתים ממשקה ישראל למנחה ולעולה ולשלמים לכפר עליהם נאם אדני יהוה: (פ)

Segment 16
HE:
כל העם הארץ יהיו אל התרומה הזאת לנשיא בישראל:

Segment 17
HE:
ועל הנשיא יהיה העולות והמנחה והנסך בחגים ובחדשים ובשבתות בכל מועדי בית ישראל הוא יעשה את החטאת ואת המנחה ואת העולה ואת השלמים לכפר בעד בית ישראל: (ס)

Segment 18
HE:
כה אמר אדני יהוה בראשון באחד לחדש תקח פר בן בקר תמים וחטאת את המקדש:

Segment 19
HE:
ולקח הכהן מדם החטאת ונתן אל מזוזת הבית ואל ארבע פנות העזרה למזבח ועל מזוזת שער החצר הפנימית:

Segment 20
HE:
וכן תעשה בשבעה בחדש מאיש שגה ומפתי וכפרתם את הבית:

Segment 21
HE:
בראשון בארבעה עשר יום לחדש יהיה לכם הפסח חג שבעות ימים מצות יאכל:

Segment 22
HE:
ועשה הנשיא ביום ההוא בעדו ובעד כל עם הארץ פר חטאת:

Segment 23
HE:
ושבעת ימי החג יעשה עולה ליהוה שבעת פרים ושבעת אילים תמימם ליום שבעת הימים וחטאת שעיר עזים ליום:

Segment 24
HE:
ומנחה איפה לפר ואיפה לאיל יעשה ושמן הין לאיפה:

Segment 25
HE:
בשביעי בחמשה עשר יום לחדש בחג יעשה כאלה שבעת הימים כחטאת כעלה וכמנחה וכשמן: (ס)