Ezekiel Chapter 8
יחזקאל פרק ח
Source: https://ajew.org/reader/tanach-yechezkel/1/8

Segment 1
HE:
ויהי בשנה הששית בששי בחמשה לחדש אני יושב בביתי וזקני יהודה יושבים לפני ותפל עלי שם יד אדני יהוה:

Segment 2
HE:
ואראה והנה דמות כמראה אש ממראה מתניו ולמטה אש וממתניו ולמעלה כמראה זהר כעין החשמלה:

Segment 3
HE:
וישלח תבנית יד ויקחני בציצת ראשי ותשא אתי רוח בין הארץ ובין השמים ותבא אתי ירושלמה במראות אלהים אל פתח שער הפנימית הפונה צפונה אשר שם מושב סמל הקנאה המקנה:

Segment 4
HE:
והנה שם כבוד אלהי ישראל כמראה אשר ראיתי בבקעה:

Segment 5
HE:
ויאמר אלי בן אדם שא נא עיניך דרך צפונה ואשא עיני דרך צפונה והנה מצפון לשער המזבח סמל הקנאה הזה בבאה:

Segment 6
HE:
ויאמר אלי בן אדם הראה אתה (מהם) מה הם עשים תועבות גדלות אשר בית ישראל עשים פה לרחקה מעל מקדשי ועוד תשוב תראה תועבות גדלות: (פ)

Segment 7
HE:
ויבא אתי אל פתח החצר ואראה והנה חר אחד בקיר:

Segment 8
HE:
ויאמר אלי בן אדם חתר נא בקיר ואחתר בקיר והנה פתח אחד: (ס)

Segment 9
HE:
ויאמר אלי בא וראה את התועבות הרעות אשר הם עשים פה:

Segment 10
HE:
ואבוא ואראה והנה כל תבנית רמש ובהמה שקץ וכל גלולי בית ישראל מחקה על הקיר סביב סביב:

Segment 11
HE:
ושבעים איש מזקני בית ישראל ויאזניהו בן שפן עמד בתוכם עמדים לפניהם ואיש מקטרתו בידו ועתר ענן הקטרת עלה:

Segment 12
HE:
ויאמר אלי הראית בן אדם אשר זקני בית ישראל עשים בחשך איש בחדרי משכיתו כי אמרים אין יהוה ראה אתנו עזב יהוה את הארץ:

Segment 13
HE:
ויאמר אלי עוד תשוב תראה תועבות גדלות אשר המה עשים:

Segment 14
HE:
ויבא אתי אל פתח שער בית יהוה אשר אל הצפונה והנה שם הנשים ישבות מבכות את התמוז: (ס)

Segment 15
HE:
ויאמר אלי הראית בן אדם עוד תשוב תראה תועבות גדלות מאלה:

Segment 16
HE:
ויבא אתי אל חצר בית יהוה הפנימית והנה פתח היכל יהוה בין האולם ובין המזבח כעשרים וחמשה איש אחריהם אל היכל יהוה ופניהם קדמה והמה משתחויתם קדמה לשמש:

Segment 17
HE:
ויאמר אלי הראית בן אדם הנקל לבית יהודה מעשות את התועבות אשר עשו פה כי מלאו את הארץ חמס וישבו להכעיסני והנם שלחים את הזמורה אל אפם:

Segment 18
HE:
וגם אני אעשה בחמה לא תחוס עיני ולא אחמל וקראו באזני קול גדול ולא אשמע אותם: