Joshua Chapter 18
יהושע פרק יח
Source: https://ajew.org/reader/tanach-yehoshua/1/18

Segment 1
HE:
ויקהלו כל עדת בני ישראל שלה וישכינו שם את אהל מועד והארץ נכבשה לפניהם:

Segment 2
HE:
ויותרו בבני ישראל אשר לא חלקו את נחלתם שבעה שבטים:

Segment 3
HE:
ויאמר יהושע אל בני ישראל עד אנה אתם מתרפים לבוא לרשת את הארץ אשר נתן לכם יהוה אלהי אבותיכם:

Segment 4
HE:
הבו לכם שלשה אנשים לשבט ואשלחם ויקמו ויתהלכו בארץ ויכתבו אותה לפי נחלתם ויבאו אלי:

Segment 5
HE:
והתחלקו אתה לשבעה חלקים יהודה יעמד על גבולו מנגב ובית יוסף יעמדו על גבולם מצפון:

Segment 6
HE:
ואתם תכתבו את הארץ שבעה חלקים והבאתם אלי הנה ויריתי לכם גורל פה לפני יהוה אלהינו:

Segment 7
HE:
כי אין חלק ללוים בקרבכם כי כהנת יהוה נחלתו וגד וראובן וחצי שבט המנשה לקחו נחלתם מעבר לירדן מזרחה אשר נתן להם משה עבד יהוה:

Segment 8
HE:
ויקמו האנשים וילכו ויצו יהושע את ההלכים לכתב את הארץ לאמר לכו והתהלכו בארץ וכתבו אותה ושובו אלי ופה אשליך לכם גורל לפני יהוה בשלה:

Segment 9
HE:
וילכו האנשים ויעברו בארץ ויכתבוה לערים לשבעה חלקים על ספר ויבאו אל יהושע אל המחנה שלה:

Segment 10
HE:
וישלך להם יהושע גורל בשלה לפני יהוה ויחלק שם יהושע את הארץ לבני ישראל כמחלקתם: (פ)

Segment 11
HE:
ויעל גורל מטה בני בנימן למשפחתם ויצא גבול גורלם בין בני יהודה ובין בני יוסף:

Segment 12
HE:
ויהי להם הגבול לפאת צפונה מן הירדן ועלה הגבול אל כתף יריחו מצפון ועלה בהר ימה (והיה) והיו תצאתיו מדברה בית און:

Segment 13
HE:
ועבר משם הגבול לוזה אל כתף לוזה נגבה היא בית אל וירד הגבול עטרות אדר על ההר אשר מנגב לבית חרון תחתון:

Segment 14
HE:
ותאר הגבול ונסב לפאת ים נגבה מן ההר אשר על פני בית חרון נגבה (והיה) והיו תצאתיו אל קרית בעל היא קרית יערים עיר בני יהודה זאת פאת ים:

Segment 15
HE:
ופאת נגבה מקצה קרית יערים ויצא הגבול ימה ויצא אל מעין מי נפתוח:

Segment 16
HE:
וירד הגבול אל קצה ההר אשר על פני גי בן הנם אשר בעמק רפאים צפונה וירד גי הנם אל כתף היבוסי נגבה וירד עין רגל:

Segment 17
HE:
ותאר מצפון ויצא עין שמש ויצא אל גלילות אשר נכח מעלה אדמים וירד אבן בהן בן ראובן:

Segment 18
HE:
ועבר אל כתף מול הערבה צפונה וירד הערבתה:

Segment 19
HE:
ועבר הגבול אל כתף בית חגלה צפונה (והיה) והיו (תצאותיו) תצאות הגבול אל לשון ים המלח צפונה אל קצה הירדן נגבה זה גבול נגב:

Segment 20
HE:
והירדן יגבל אתו לפאת קדמה זאת נחלת בני בנימן לגבולתיה סביב למשפחתם:

Segment 21
HE:
והיו הערים למטה בני בנימן למשפחותיהם יריחו ובית חגלה ועמק קציץ:

Segment 22
HE:
ובית הערבה וצמרים ובית אל:

Segment 23
HE:
והעוים והפרה ועפרה:

Segment 24
HE:
וכפר (העמני) העמנה והעפני וגבע ערים שתים עשרה וחצריהן:

Segment 25
HE:
גבעון והרמה ובארות:

Segment 26
HE:
והמצפה והכפירה והמצה:

Segment 27
HE:
ורקם וירפאל ותראלה:

Segment 28
HE:
וצלע האלף והיבוסי היא ירושלם גבעת קרית ערים ארבע עשרה וחצריהן זאת נחלת בני בנימן למשפחתם: (פ)