Joshua Chapter 4
יהושע פרק ד
Source: https://ajew.org/reader/tanach-yehoshua/1/4

Segment 1
HE:
ויהי כאשר תמו כל הגוי לעבור את הירדן (פ) ויאמר יהוה אל יהושע לאמר:

Segment 2
HE:
קחו לכם מן העם שנים עשר אנשים איש אחד איש אחד משבט:

Segment 3
HE:
וצוו אותם לאמר שאו לכם מזה מתוך הירדן ממצב רגלי הכהנים הכין שתים עשרה אבנים והעברתם אותם עמכם והנחתם אותם במלון אשר תלינו בו הלילה: (ס)

Segment 4
HE:
ויקרא יהושע אל שנים העשר איש אשר הכין מבני ישראל איש אחד איש אחד משבט:

Segment 5
HE:
ויאמר להם יהושע עברו לפני ארון יהוה אלהיכם אל תוך הירדן והרימו לכם איש אבן אחת על שכמו למספר שבטי בני ישראל:

Segment 6
HE:
למען תהיה זאת אות בקרבכם כי ישאלון בניכם מחר לאמר מה האבנים האלה לכם:

Segment 7
HE:
ואמרתם להם אשר נכרתו מימי הירדן מפני ארון ברית יהוה בעברו בירדן נכרתו מי הירדן והיו האבנים האלה לזכרון לבני ישראל עד עולם:

Segment 8
HE:
ויעשו כן בני ישראל כאשר צוה יהושע וישאו שתי עשרה אבנים מתוך הירדן כאשר דבר יהוה אל יהושע למספר שבטי בני ישראל ויעברום עמם אל המלון וינחום שם:

Segment 9
HE:
ושתים עשרה אבנים הקים יהושע בתוך הירדן תחת מצב רגלי הכהנים נשאי ארון הברית ויהיו שם עד היום הזה:

Segment 10
HE:
והכהנים נשאי הארון עמדים בתוך הירדן עד תם כל הדבר אשר צוה יהוה את יהושע לדבר אל העם ככל אשר צוה משה את יהושע וימהרו העם ויעברו:

Segment 11
HE:
ויהי כאשר תם כל העם לעבור ויעבר ארון יהוה והכהנים לפני העם:

Segment 12
HE:
ויעברו בני ראובן ובני גד וחצי שבט המנשה חמשים לפני בני ישראל כאשר דבר אליהם משה:

Segment 13
HE:
כארבעים אלף חלוצי הצבא עברו לפני יהוה למלחמה אל ערבות יריחו: (ס)

Segment 14
HE:
ביום ההוא גדל יהוה את יהושע בעיני כל ישראל ויראו אתו כאשר יראו את משה כל ימי חייו: (פ)

Segment 15
HE:
ויאמר יהוה אל יהושע לאמר:

Segment 16
HE:
צוה את הכהנים נשאי ארון העדות ויעלו מן הירדן:

Segment 17
HE:
ויצו יהושע את הכהנים לאמר עלו מן הירדן:

Segment 18
HE:
ויהי (בעלות) כעלות הכהנים נשאי ארון ברית יהוה מתוך הירדן נתקו כפות רגלי הכהנים אל החרבה וישבו מי הירדן למקומם וילכו כתמול שלשום על כל גדותיו:

Segment 19
HE:
והעם עלו מן הירדן בעשור לחדש הראשון ויחנו בגלגל בקצה מזרח יריחו: (פ)

Segment 20
HE:
ואת שתים עשרה האבנים האלה אשר לקחו מן הירדן הקים יהושע בגלגל:

Segment 21
HE:
ויאמר אל בני ישראל לאמר אשר ישאלון בניכם מחר את אבותם לאמר מה האבנים האלה:

Segment 22
HE:
והודעתם את בניכם לאמר ביבשה עבר ישראל את הירדן הזה:

Segment 23
HE:
אשר הוביש יהוה אלהיכם את מי הירדן מפניכם עד עברכם כאשר עשה יהוה אלהיכם לים סוף אשר הוביש מפנינו עד עברנו:

Segment 24
HE:
למען דעת כל עמי הארץ את יד יהוה כי חזקה היא למען יראתם את יהוה אלהיכם כל הימים: (ס)