Isaiah Chapter 64
ישעיהו פרק סד
Source: https://ajew.org/reader/tanach-yeshayahu/1/64

Segment 1
HE:
כקדח אש המסים מים תבעה אש להודיע שמך לצריך מפניך גוים ירגזו:

Segment 2
HE:
בעשותך נוראות לא נקוה ירדת מפניך הרים נזלו: (ס)

Segment 3
HE:
ומעולם לא שמעו לא האזינו עין לא ראתה אלהים זולתך יעשה למחכה לו:

Segment 4
HE:
פגעת את שש ועשה צדק בדרכיך יזכרוך הן אתה קצפת ונחטא בהם עולם ונושע:

Segment 5
HE:
ונהי כטמא כלנו וכבגד עדים כל צדקתינו ונבל כעלה כלנו ועוננו כרוח ישאנו:

Segment 6
HE:
ואין קורא בשמך מתעורר להחזיק בך כי הסתרת פניך ממנו ותמוגנו ביד עוננו:

Segment 7
HE:
ועתה יהוה אבינו אתה אנחנו החמר ואתה יצרנו ומעשה ידך כלנו:

Segment 8
HE:
אל תקצף יהוה עד מאד ואל לעד תזכר עון הן הבט נא עמך כלנו:

Segment 9
HE:
ערי קדשך היו מדבר ציון מדבר היתה ירושלם שממה:

Segment 10
HE:
בית קדשנו ותפארתנו אשר הללוך אבתינו היה לשרפת אש וכל מחמדינו היה לחרבה:

Segment 11
HE:
העל אלה תתאפק יהוה תחשה ותעננו עד מאד: (פ)