Jeremiah Chapter 25
ירמיהו פרק כה
Source: https://ajew.org/reader/tanach-yirmiyahu/1/25

Segment 1
HE:
הדבר אשר היה על ירמיהו על כל עם יהודה בשנה הרבעית ליהויקים בן יאשיהו מלך יהודה היא השנה הראשנית לנבוכדראצר מלך בבל:

Segment 2
HE:
אשר דבר ירמיהו הנביא על כל עם יהודה ואל כל ישבי ירושלם לאמר:

Segment 3
HE:
מן שלש עשרה שנה ליאשיהו בן אמון מלך יהודה ועד היום הזה זה שלש ועשרים שנה היה דבר יהוה אלי ואדבר אליכם אשכים ודבר ולא שמעתם:

Segment 4
HE:
ושלח יהוה אליכם את כל עבדיו הנבאים השכם ושלח ולא שמעתם ולא הטיתם את אזנכם לשמע:

Segment 5
HE:
לאמר שובו נא איש מדרכו הרעה ומרע מעלליכם ושבו על האדמה אשר נתן יהוה לכם ולאבותיכם למן עולם ועד עולם:

Segment 6
HE:
ואל תלכו אחרי אלהים אחרים לעבדם ולהשתחות להם ולא תכעיסו אותי במעשה ידיכם ולא ארע לכם:

Segment 7
HE:
ולא שמעתם אלי נאם יהוה למען (הכעסוני) הכעיסני במעשה ידיכם לרע לכם: (פ)

Segment 8
HE:
לכן כה אמר יהוה צבאות יען אשר לא שמעתם את דברי:

Segment 9
HE:
הנני שלח ולקחתי את כל משפחות צפון נאם יהוה ואל נבוכדראצר מלך בבל עבדי והבאתים על הארץ הזאת ועל ישביה ועל כל הגוים האלה סביב והחרמתים ושמתים לשמה ולשרקה ולחרבות עולם:

Segment 10
HE:
והאבדתי מהם קול ששון וקול שמחה קול חתן וקול כלה קול רחים ואור נר:

Segment 11
HE:
והיתה כל הארץ הזאת לחרבה לשמה ועבדו הגוים האלה את מלך בבל שבעים שנה:

Segment 12
HE:
והיה כמלאות שבעים שנה אפקד על מלך בבל ועל הגוי ההוא נאם יהוה את עונם ועל ארץ כשדים ושמתי אתו לשממות עולם:

Segment 13
HE:
(והבאיתי) והבאתי על הארץ ההיא את כל דברי אשר דברתי עליה את כל הכתוב בספר הזה אשר נבא ירמיהו על כל הגוים:

Segment 14
HE:
כי עבדו בם גם המה גוים רבים ומלכים גדולים ושלמתי להם כפעלם וכמעשה ידיהם: (פ)

Segment 15
HE:
כי כה אמר יהוה אלהי ישראל אלי קח את כוס היין החמה הזאת מידי והשקיתה אתו את כל הגוים אשר אנכי שלח אותך אליהם:

Segment 16
HE:
ושתו והתגעשו והתהללו מפני החרב אשר אנכי שלח בינתם:

Segment 17
HE:
ואקח את הכוס מיד יהוה ואשקה את כל הגוים אשר שלחני יהוה אליהם:

Segment 18
HE:
את ירושלם ואת ערי יהודה ואת מלכיה את שריה לתת אתם לחרבה לשמה לשרקה ולקללה כיום הזה:

Segment 19
HE:
את פרעה מלך מצרים ואת עבדיו ואת שריו ואת כל עמו:

Segment 20
HE:
ואת כל הערב ואת כל מלכי ארץ העוץ ואת כל מלכי ארץ פלשתים ואת אשקלון ואת עזה ואת עקרון ואת שארית אשדוד:

Segment 21
HE:
את אדום ואת מואב ואת בני עמון:

Segment 22
HE:
ואת כל מלכי צר ואת כל מלכי צידון ואת מלכי האי אשר בעבר הים:

Segment 23
HE:
ואת דדן ואת תימא ואת בוז ואת כל קצוצי פאה:

Segment 24
HE:
ואת כל מלכי ערב ואת כל מלכי הערב השכנים במדבר:

Segment 25
HE:
ואת כל מלכי זמרי ואת כל מלכי עילם ואת כל מלכי מדי:

Segment 26
HE:
ואת כל מלכי הצפון הקרבים והרחקים איש אל אחיו ואת כל הממלכות הארץ אשר על פני האדמה ומלך ששך ישתה אחריהם:

Segment 27
HE:
ואמרת אליהם (פ) כה אמר יהוה צבאות אלהי ישראל שתו ושכרו וקיו ונפלו ולא תקומו מפני החרב אשר אנכי שלח ביניכם:

Segment 28
HE:
והיה כי ימאנו לקחת הכוס מידך לשתות ואמרת אליהם כה אמר יהוה צבאות שתו תשתו:

Segment 29
HE:
כי הנה בעיר אשר נקרא שמי עליה אנכי מחל להרע ואתם הנקה תנקו לא תנקו כי חרב אני קרא על כל ישבי הארץ נאם יהוה צבאות:

Segment 30
HE:
ואתה תנבא אליהם את כל הדברים האלה ואמרת אליהם יהוה ממרום ישאג וממעון קדשו יתן קולו שאג ישאג על נוהו הידד כדרכים יענה אל כל ישבי הארץ:

Segment 31
HE:
בא שאון עד קצה הארץ כי ריב ליהוה בגוים נשפט הוא לכל בשר הרשעים נתנם לחרב נאם יהוה: (ס)

Segment 32
HE:
כה אמר יהוה צבאות הנה רעה יצאת מגוי אל גוי וסער גדול יעור מירכתי ארץ:

Segment 33
HE:
והיו חללי יהוה ביום ההוא מקצה הארץ ועד קצה הארץ לא יספדו ולא יאספו ולא יקברו לדמן על פני האדמה יהיו:

Segment 34
HE:
הילילו הרעים וזעקו והתפלשו אדירי הצאן כי מלאו ימיכם לטבוח ותפוצותיכם ונפלתם ככלי חמדה:

Segment 35
HE:
ואבד מנוס מן הרעים ופליטה מאדירי הצאן:

Segment 36
HE:
קול צעקת הרעים ויללת אדירי הצאן כי שדד יהוה את מרעיתם:

Segment 37
HE:
ונדמו נאות השלום מפני חרון אף יהוה:

Segment 38
HE:
עזב ככפיר סכו כי היתה ארצם לשמה מפני חרון היונה ומפני חרון אפו: (פ)