Jeremiah Chapter 28
ירמיהו פרק כח
Source: https://ajew.org/reader/tanach-yirmiyahu/1/28

Segment 1
HE:
ויהי בשנה ההיא בראשית ממלכת צדקיה מלך יהודה (בשנת) בשנה הרבעית בחדש החמישי אמר אלי חנניה בן עזור הנביא אשר מגבעון בבית יהוה לעיני הכהנים וכל העם לאמר:

Segment 2
HE:
כה אמר יהוה צבאות אלהי ישראל לאמר שברתי את על מלך בבל:

Segment 3
HE:
בעוד שנתים ימים אני משיב אל המקום הזה את כל כלי בית יהוה אשר לקח נבוכדנאצר מלך בבל מן המקום הזה ויביאם בבל:

Segment 4
HE:
ואת יכניה בן יהויקים מלך יהודה ואת כל גלות יהודה הבאים בבלה אני משיב אל המקום הזה נאם יהוה כי אשבר את על מלך בבל:

Segment 5
HE:
ויאמר ירמיה הנביא אל חנניה הנביא לעיני הכהנים ולעיני כל העם העמדים בבית יהוה:

Segment 6
HE:
ויאמר ירמיה הנביא אמן כן יעשה יהוה יקם יהוה את דבריך אשר נבאת להשיב כלי בית יהוה וכל הגולה מבבל אל המקום הזה:

Segment 7
HE:
אך שמע נא הדבר הזה אשר אנכי דבר באזניך ובאזני כל העם:

Segment 8
HE:
הנביאים אשר היו לפני ולפניך מן העולם וינבאו אל ארצות רבות ועל ממלכות גדלות למלחמה ולרעה ולדבר:

Segment 9
HE:
הנביא אשר ינבא לשלום בבא דבר הנביא יודע הנביא אשר שלחו יהוה באמת:

Segment 10
HE:
ויקח חנניה הנביא את המוטה מעל צואר ירמיה הנביא וישברהו:

Segment 11
HE:
ויאמר חנניה לעיני כל העם לאמר כה אמר יהוה ככה אשבר את על נבכדנאצר מלך בבל בעוד שנתים ימים מעל צואר כל הגוים וילך ירמיה הנביא לדרכו:

Segment 12
HE:
ויהי דבר יהוה אל ירמיה אחרי שבור חנניה הנביא את המוטה מעל צואר ירמיה הנביא לאמר:

Segment 13
HE:
הלוך ואמרת אל חנניה לאמר כה אמר יהוה מוטת עץ שברת ועשית תחתיהן מטות ברזל:

Segment 14
HE:
כי כה אמר יהוה צבאות אלהי ישראל על ברזל נתתי על צואר כל הגוים האלה לעבד את נבכדנאצר מלך בבל ועבדהו וגם את חית השדה נתתי לו:

Segment 15
HE:
ויאמר ירמיה הנביא אל חנניה הנביא שמע נא חנניה לא שלחך יהוה ואתה הבטחת את העם הזה על שקר:

Segment 16
HE:
לכן כה אמר יהוה הנני משלחך מעל פני האדמה השנה אתה מת כי סרה דברת אל יהוה:

Segment 17
HE:
וימת חנניה הנביא בשנה ההיא בחדש השביעי: (פ)